[新手][校園] 當你中六果年先遇到教畜，最好嘅解決辦法就係‧‧‧‧‧‧: 31. 你又嚟搞我？ (四)

我哋十個就好似個守衛咁企咗係個禮堂出面，啲老師經過都會用一個好好奇嘅眼光望住我哋。我哋十條友捧住本書企係度，好似成個和尚誦經修仔咁。
 
比利︰「喂！頭先做乜唔拗落去呀，我哋仲佔緊上風呀！」
力仔︰「你冇野呀，咁都叫上風！隨時越講越出事呀！」
比利︰「我哋依家咁搞法，隨時影響咗自己呀！Practice Paper又冇得考，Mock又可能唔比我哋考。同埋我哋咁樣點溫書呀？！」
 
比利講嘅嘢，其實都係我哋咁多個嘅擔心。但係聽到威廉話佢搞得掂，我哋就好似班細嘅係後面聽指令咁，所以咩都唔做。
 
威廉︰「你就唔洗咁慌住，到適當嘅時機我就會一鑊翹起佢。總之喱段短時間內，我哋就受一受苦先。你想坐返低做自己嘢姐，喱個問題就簡單喇！」
河童︰「就喇，Practice Paper 我哋可以上EAA網down嚟做，佢個mock你覺得有參考價值咩。至於溫書，你企偽度溫咪仲精神。」




 
我哋幾個好盡力咁去安撫比利個情緒，因為我哋都知道今次反抗，我哋要成功十個人就一定要團結。
 
 
企到腳都軟埋終於到lunch time。喱個時候大口仔都落咗嚟搵我哋。
大口仔︰「喂，成朝唔見係哋嘅？去咗邊呀？」
我︰「咪無段段比人莫須有咁罰囉！」
大口仔︰「叫咗你哋唔好玩咁盡咖喇！」
比利︰「你要嚟攞景就可以走咖喇，冇人有興趣聽你廢嗡！」
大口仔︰「唔係呀，其實我收到啲風係一姐講嘅，盲係話你哋喱單嘢係若菲、gabrielle同Cherry夾手夾腳搞出嚟，一姐仲話聽到佢哋講要咩你哋大鑊，夾埋張sir投訴你哋行為不當。」




我︰「但係佢哋無理由都知道我哋個secret group同埋入面啲內容咖！」其實我哋由始至終懷疑嘅位都係邊個洩密。
大口仔︰「喱個我就唔清楚咁多喇！嗱，喱度係今日派啲Practice Paper，幫你哋hold起咗份。」大口仔遞咗十份橙色cover嘅試卷比我哋。喱一刻，我都有啲滾動，雖然我哋成日排斥佢，但係係我哋落難果陣依然仲幫我哋。
大口仔︰「去食lunch先喇，吹風吹咗成朝。我試吓幫你哋收多啲風返嚟。」
力仔︰「真係thank you你！」力仔合十雙手當佢係恩人咁拜。