[新手][校園] 當你中六果年先遇到教畜，最好嘅解決辦法就係‧‧‧‧‧‧: 21. 聖誕聯歡會大作戰
最終我哋OSC都係分組賽出局，一勝一負三分，三隊排第二，無緣準決賽。不過，係人都知我哋嘅目的唔係出線，所以贏到喱一場重要勝仗就已經夠。第一個計劃成功咗，第二個行動就要開始plan。Christmas Party係下個星期舉行，我哋一邊慶祝贏波，一邊開始係度諗啲games嘅細節。
「Yeah！」又係我哋指定動作，凍檸茶乾杯。
「今場真係爽，尤其係文仔，你果幾嘢串到教畜一棟都冇，真係大快人心呀！」我哋嘅領隊威廉仲hyper過我哋。
「喂！仲有下個星期呀，我哋喱個聖誕賤人報復大行動仲未完咖！」阿毛個奸樣又出晒嚟。
「係係係！咁我哋諗下有咩game喇！」威廉即刻擺番個正經樣出嚟。
「game喇喎，我一早度好咗幾個。第一個就係智障恐龍。所謂智障恐龍就梗係好似隻恐龍咁喇。每個人手同腳嘅關節位要夾住支飲管，然之後行去指定地點做mission，至於做咩mission喇喎，到時大家就知。」力仔用一個陰森恐怖tone講出嚟，搞到我都有啲寒寒地。
「至於第二個，就係踩死你大戰。照字面嚟講睇，好明顯就係鬥踩喇。每個人每邊腳踭位就綁一個氣波，然之後個task就係分兩組踩爆晒對面組啲氣球就贏喇。睇你哋個衰樣，啱啱場波梗係未踢夠腳未批夠踭喇，阿風你同菲gay cher有咩仇口。喱個回合就各位自便喇。」嘩，真係睇唔出你條友深不可測，以後真係唔好得罪你。
「最後一個，梗係要玩番啲平凡啲喇，開口中變奏版，冇乜特別大家都識，不過唔會玩擲cream。就係咁多！多謝大家！」其實力仔唔聲唔聲都幾多橋吓，如果佢拍埋威廉一齊hold game，應該可以搞到獎門人咁。
決定咗玩咩game之後我哋就分工負責去prep啲game同埋買物資。由於食物一早有班女子組認投咗，所以我哋男仔可以專心諗個party點樣可以玩大佢。我同河童仲有比利負責第一個game，去買飲管喇設計啲task喇仲有整啲紙波。阿風同埋聰哥負責去整好晒第二個game啲氣球。小夫同阿毛就負責整好啲開口中嘅紙版同其他啲decoration。
我︰「喂，你兩個咩都唔洗做嘅？」
威廉︰「我哋兩個負責主持，帶你班傻的嗎玩game咁辛苦仲要我prep呀？！」
力仔︰「我哋兩個梗係扮演一啲重要角色喇！」
就咁樣，我哋第二個聖誕賤人報復大行動第二回就咁就計劃，一切只等一個星期後Christmas Party嘅來臨。