[新手][校園] 當你中六果年先遇到教畜，最好嘅解決辦法就係‧‧‧‧‧‧: 20. 一笑泯恩仇
「咇咇咇」對面隊一開番波，球證就即刻吹雞完場。終於，喱場大戰，憑住我同小夫嘅入球贏二比零。場邊亦都響起雷動嘅掌聲祝賀我哋贏波。
「好波！」小夫行咗去比利度搵佢擊掌。「射得妙呀！」比利同小夫擊掌完之後嚟咗個輕輕嘅擁抱。我望到喱個場面都覺得好欣慰。原本第一場兩個仲係各有各踢，今場竟然助攻比對方入波，今次唔通要多謝個教畜比咗個「機會」佢哋打破個隔閡？！
完咗場之後，我哋都有過去同對面握手。無他嘅，我哋針對嘅只係教畜一個，同其他人冇仇嘅。握完手之後，我見到教畜一條友自己行番去場邊，仲得到班Form 4師妹嘅慰問。喱個時候我同比利打一打眼色，一路行入更衣室，一路唱雙簧。
比利︰「仲以為對住啲「專業球員」會踢得好辛苦添。」
我︰「人哋話咩踢聯賽喎，唔知係Fifa呀，Master League呀，定係FM喇。」
比利︰「唔知呢？」
我︰「我就覺得係FM喇。佢果句咩前鋒企前面簡直充份體現咗Stick to Position同Be More Disciplined嘅哲學。」
比利、河童、阿毛︰「哈哈哈！」
喱個時候，我見到教畜同佢班Form 4學生睥住我哋。其實贏完波咁樣講又真係幾冇品嘅，不過一於唔鬼理，今次點都報一報上次停課之仇先，攞番個彩先。
「贏得好呀！」作為領隊嘅威廉入到更衣室梗係要推一推個氣氛先喇。
「小夫果球入得靚呀！你今日9.9分」阿風指住小夫嚟讚。
「咩呀，比利果吓轉身交得靚姐。」小夫即刻將個波拋比比利。
「小兒科喇！」「不過，我都想同你講番聲對唔住，上次咁講你。」比利突然轉話題，成個場都Dead咗。
「......」喱一刻好似click咗個暫停掣咁，大家都定咗係度，你眼望我眼。正常嘅，兩個月前差啲郁手咁濟，啱啱先掉淡咗少少，突然再提番起又唔知會唔會再世界大戰。
「算喇，我又係太小氣嘅。」小夫自己都呆一呆，隔咗幾秒先有反應。
「喂，你兩個搞乜鬼呀，明明慶祝緊贏波，係度講呢啲。」威廉作勢推一推比利，用個輕佻嘅語調打完場，但係大家都突然唔知比咩反應好。
「喂，係囉。兩個死基佬。」我都乘機抽一抽佢兩個水。
「喂！」「喂！係囉！No gay is allowed！」「喂！小夫！喂！比利！咁樣唔得喎！」 一班痴線佬就咁無段段係個男更起哄，喂嚟喂去！
其實中學果陣嘅友誼真係好簡單。可能會因為一齊爭個唔知鍾唔鍾意你嘅女仔而面阻阻。但係過咗一排，只係一場波、一兩句好簡單嘅說話或者係因為大家善忘唔記得咗件事，就可以做番兄弟，好似以前咁一齊癲癲喪喪。