《BurgerKing與綿綿冰》: 巧遇
吃完早餐後,我們到了附近一個有琴行的商場。
一踏進琴行，樂宜就拉著我行了過去結他的專區。
果然是最熱門的樂器，佔了整間鋪一半的位置。
「哇......好多結他呀！」樂宜一臉新奇地說。
「係呀！請問兩位想要古典結他定民謠結他呢？」一個頭髮亮得會發光的四眼店員走了過來。
玩音樂的人其實有樣睇的，我直覺認為他不是個會音樂的人。
一向內向的樂宜立即靜了下來。
「啊......我地自己睇下得嫁喇。」我說。
其實我也很怕這種情況，太熱心的售貨員總會令人反感。
「唔係喎，不如試下呢枝啦，新手彈喱枝會比較易學。」他堅持，拿起一支結他。
我瞄了一眼，隨即馬上有想笑的衝動。
42吋的古典結他，而且指板跟弦的距離足足多於1cm。
新手用這枝學，九成會放棄吧。
這四眼仔，不是有心騙我們，就是完全不會彈結他。
「得喇，我地睇下先啦。」我語氣變得不友善。
「唔係喱，我真係強烈建議你買喱枝，功欲善其事，必先利其器。買左喱枝，你就可以......」
「係咩？新手彈喱枝真係會好啲？」我懶得再聽他講廢話，只求盡快打發他走。故意重覆他的話。
有些觀客都已經在留意這邊了，一個琴行職員在騙新手，誰都會看不過眼。
我接過他手上的結他，打量一番，浮誇地說：「係喎！真係幾好喎！可唔可以試下嫁？」
樂宜「噗」一聲地笑了出來，她應該已經知道我想做甚麼了，
他露出一點奇怪的表情，一個新手怎會試結他？
不過還是表現出售貨員應有的專業：「隨便試。」
我隨意挑了一張椅子坐下，想了幾秒，
緩緩奏出夢中的婚禮的旋律。
樂章帶動我的身體，我愛的，就是這種與樂器合二為一的感覺。
最後一個音響完時,緊接響起的是一片掌聲。
我這才回神過來,發現不知不覺已經愈來愈多人圍觀了,樂宜也不知去向。
這下子,我也不好意思再嘲諷那店員了。
「啊......」我尷尬一笑,:「有無人見過同我一齊個女仔.......」
「係度係度!」大聲妹的聲音在人群中響起。
......
有沒有這麼巧呀......
「喱位呢就係我地樂隊嘅主音喇,大家有興趣嘅話就like facebook follow ig 訂閱youtube啦!逄星期六係旺角有表演大家支持下啦!」
她說話的聲響和速度已經到了令人敬仰的程度了。
我依舊坐著, 不知不覺間，阿達和樂宜已經一左一右地站在我旁邊，跟我一樣無奈地看著吱吱喳喳的大聲妹。
「喂。」阿達首先開口：「你做咩無啦啦表演結他嘅？」
「我......只係試結他。」
「痴線，雖然知你癲，但都無諗過癲到試結他都有人拍手。」阿達說。
「我都唔知......可能因為支結他幾順手掛。」
「係呀可！」那店員又出來了：「都話啱你彈嫁啦！」
「吖你仲咁出黎喎？」我說。
「嘻嘻！咁係咪彈得順手吖？」他專業的店員性格表露無遺。
「咁又係嘅......幾錢呀？」如果價錢不錯，我應該直接買這枝了。
「三千六，最近做緊推廣，可以比個八折你。」
......
一分錢,一分貨。果然沒錯。
我默默將它放回架上。
「你比個一折我可以會考慮嘅。」嘆了一口氣：「有無四百蚊樓下嫁？」
「一百至四百呢，就係曬喱個架喇。」他帶了我們到另一邊。
比起剛才那裡，這裡明顯陰暗了不少，也有雜物放在路中心。
我隨手拿起一枝40吋的結他,快速地爬了幾下格仔,
再用歌試的話我怕又會把那邊的人吸引過來。
這枝也不錯,不過價錢應該......
「喱枝199。」店員好像看穿我的心意。
199?199的話真的不錯呀!
「咁就喱枝啦!」我說。
「好嘅!咁你需唔需要其他野?例如pick呀,capo之類?夾左capo會彈得好聽啲嫁喎!拿你買左枝結他,買capo可以有七折,如果我係你呢......」店員喋喋不休。
「唔洗喇!邊個同你講capo係咁用。」我都笑了,真不知為什麼他的店能不倒閉。
「有無電子琴賣?」我問。
「有啊有啊!呢邊!」他兩眼發光,領著我們走到了店的中央。
我隨便挑了一部價錢合理的,就付錢了。
「一共千一。」店員笑得見牙不見眼。
到底多久沒人來這裡購物了啊......
我默默拿出幾張紙幣。
「喂!」人群不知不覺已經散去,大聲妹也回來了。
「又會咁都撞到你地嘅?」她說。
「係囉......」我和阿達互視一眼,發覺大家的眼神都帶點失望。
「不如......一齊去唱K?」大聲妹興致勃勃地說。
唉......最怕見到的畫面出現了。
和樂宜的二人世界，居然就這樣化成泡影了。
「我無所謂啊。」阿達裝作不在意地說。
我也知這窩囊廢是不會逆女朋友意的了。
唉!簡直是老婆勞!做男人有點骨氣行嗎?
「好啊好啊!好耐無唱K喇!」樂宜和應。
......
「我都無所謂啊。」我說。
阿達投來鄙視的目光。
嗚......
就這樣,兩個女生牽著手一跳一跳地走向Neway。
我沒有跟著他們,因為要先將兩件大傢伙搬回家。
我硬拉著阿達,因為實在太重,一個人搬不動。
阿達少有地沒有嘻皮笑臉。
「做咩呀?有心事?哥哥開解下你。」我說。
「擔心你炸......」他嘆了一口氣。
我瞬間就明白他在說什麼了,畢竟最近他能擔心的就只有一件事。
「真係無事喎......我約左佢星期一食飯,咪當柯南審犯咁問下佢到底當時咩事囉......」我頓了一頓:「始終我依家唔再鍾意佢。」
其實我自己也不清楚能否這麼豁達。
「係就得啦。」阿達好像鬆了一口氣:「我都係驚你仲念念不忘姐。」
他繼續說:「因為你仲有少少感覺嘅話,聽完佢講野一定會動搖。」
我心裡一震。
「痴線......拖都拍緊仲有咩感覺。」我說,希望能說服自己:「不過佢當初到底咩事姐?」
「佢......唉你等佢自己同你講啦。」
「好啦!」,都帶著這疑問幾年了,也不急於一時。
「不過你做咩要打擾我地二人世界呀!!!」我仰天長嘆。
「你阻住我地就真啦屌!」他還擊:「做咩唔同樂宜講你唔想唱K?」
「又唔見你講?死毒撚。」我也不甘示弱。
......
我們有講有笑,剛才認真的氣氛瞬間灰飛煙滅。
不過我知道,只是暫時。
=========================================
係呀,睇曬喇。
今次喱篇係咪好少呢。
唉,我都唔想,但事關小弟都係香港幾十萬莘莘學子嘅其中一員。放完長假都要番學。
而且DSE都唔遠,一堆堆嘅補課同paper。
唔可能好似一開始咁每日花兩三個鍾打二千幾字。
加上小弟病左兩日,真係寫唔到。
所以喱篇嘅作用係比大家吊下引,同埋比大家知道我未死。
但我已經病好喇,就算唔可以好似之前咁兩日出一篇,都應該可以四五日一篇。
希望大家體諒啦,如果我出快啲唔係唔得,但質素一定會比較差,我真係唔會咁做。
點都好啦,希望大家繼續支持 BurgerKing與草莓綿綿冰。
如果鍾意睇嘅不妨按下追稿,介紹比朋友或者只係留低你嘅comment
呢啲都係我嘅動力。