《只有一棵樹的森林》: 第七十八章

我和方晴兩個就這樣手拖手走去買餸。
「呀晴，今晚你想煮咩？」
「琴晚食中餐，今晚一於食西餐」
「好喎，食扒我至愛！」
「不過你要陪我去銀行攞錢先」
.
去到銀行，當我看到櫃員機顯示出的金額時
「嘩，呀晴你戶口有咁多錢架！」我驚訝地說
「係我Daddy架，呢度啲錢全部都係我Daddy入既，我平時都好少用，不過今次我離家出走，先要用錢」
「咁你唸住要攞幾多錢？」




「呀駿你記唔記得你的戶口號碼？」
「梗係記得」
「借俾我呀」
「下？！！」
「我怕Daddy遲啲會經濟封鎖，我要襯宜家轉走啲錢」
「哦，好，無問題」
.
提款過後，我們就正式開始聖誕之旅。
「咁請問司徒太第一站想去邊？」
「你講咩呀？！！邊個要做司徒太呀！」




「哎喲，有人怕羞呀！！」
「哼，唔理你呀！」
.
正當可能有人以為方晴會去一些高級牛肉店買東西時，其實她是去街市和大昌買東西。
「估唔到你都識黎呢啲地方買野喎」我笑道
「司徒駿，你係咪當我係千金小姐，咩都唔識先？！！」
「唔係…點敢！」
「以前媽咪仲係度時，我成日都拖住佢隻手去街市架！街市啲野又平又好」
「果然係司徒太，持家有道」
「司徒駿！！」




.
就在我們打打罵罵的同時，今晚要的東西也買齊了。
羊架、牛排、意粉、蕃茄、粟米、蘑菇、火腿、腸仔等等…
今晚的聖誕大餐肯定極豐富！
.
回到家後，方晴就忙於準備晚上的大餐。
看她又要醃肉，又要煮湯，又要做其他事，滿面大汗，我就只好為她抹汗，做她背後的男人。
.
不知不覺，天也入黑，爸爸也從內地趕回來了。
「爸爸番黎喇」
「係呀，媽咪我番黎喇！」
「你番黎喇，攰唔攰呀？」媽媽問
「少少喇，咦，煮好飯喇？」
「唔係呀，不過今日唔係我煮」
「下，咁邊個煮？」爸爸不解




.
「世伯你好，換件衫等多陣就有得食」方晴從廚房探頭出來說
「咦，呀晴黎左呀，要你下廚點好意思」爸爸客氣說
「點會呢，等多陣就得，呀駿入黎幫我手」
「係！」
.
入到廚房，看到煮食爐火力全開，有很多食物。
「嘩，好多野食呀！」
「係呀，幫我攞個湯出去」
「係！嘩，蘑菇粟米湯呀！仲係新鮮蘑菇加粟米！」
「係呀，知你鍾意飲麻！快啲幫我攞出去喇！」
.
看著方晴由買材料，到準備，再到煮，每一項都是完美，根本無懈可擊，究竟我前世做了甚麼好事呢？
.
方晴最後為大家煮的聖誕大餐為，羊架牛扒配蕃茄火腿意粉，還有牛油蘑菇和蘑菇粟米湯。




.
「嘩，好豐富呀！」大家看到後都大叫
「第一次煮大餐，大家食過後俾啲意見我」方晴說
「唔使試都知超級好食，好甜好有愛！」我誇張地說
「你啲意見唔中肯呀，我問伯母」
「羊架同牛扒煎得恰到好處，意粉醬好夠味，最估唔到係個湯，非常好飲！」
「多謝伯母！！」
「係喎，呀晴你聖誕節唔使陪屋企人咩？」爸爸突然問
「Err…」方晴不知如何解釋，全屋突然靜下來，鴉雀無聲。
.
Facebook：微言
Instagram：smallpotatosay
一至六每晚7點，重溫當年走過青蔥的歲月
Facebook, Instagram, 紙言, 高登共同發佈