《只有一棵樹的森林》: 第四章

轉眼間又過了一個月，適應期也大致完結。
班上最熟的，當然是好兄弟杜杜。
至於其他同學，多多少少因為做了班長的緣故，也略知一二，也慢慢認識了幾個志同道合的同學。
.
至於這一個月，來來去去都是上堂，小息，午飯，睡覺，留堂，放學。
但最大的不同是，我這一個月只遲了一次到，沒錯是一次！
.
自從那次的洋相後，我發誓不會再遲到！
.
事緣開學第二日，我一如以往地遲了到，然後就被『老姑婆』罰企，還要被她奚落。




『都唔知你呢d學生點做班長，做壞榜樣！』
.
然後罰至所有人都上課室後，一路下來，看見以前的同學路過暗笑，低年級的同學偷偷看，同級的同學面上都掛著一副笑我柒頭的面。
至於她，一眼不看我，直行直過...
.
唉，出師未捷身先死
.
『司徒駿！』
『下？！！』我一轉頭，就看見女神在叫喚我
『你去邊呀？朱sir叫我地落去攞簿喎！』




『哦！』原來只是呼喚搬運兵...
『司徒駿？！！』
『下？！！』又點呀？！
『你可唔可以應承我一樣嘢？』
『咩事？？？』
『以後唔准再遲到！』
『下？！！』我的口圓得可以放入一粒乒乓球。
『可唔可以呀？』
『可...可以，我會盡力唔再遲到！』
『唔』看見她傻傻天真的笑，真的融化了。




『但係呢...點解既？』
方晴看一看我，再答：
『因為我唔鍾意遲到的男仔』
.
天啊！這麼大的暗示，究竟想我怎辦？
.
結果，當日放學我就買了五個新鬧鐘，每個早上每五分鐘響一次，誓死不再遲到！
那個驚人的程度，連我家兩老都怕了...（我是指那個奪命連環鐘）
.
一個月下來，不但沒有遲到，每次都會早到最少半小時。
每次回班房都發現她的出現，有時候幸運的，還可以有一剎的獨處時間。
.
『早晨！』那個招牌笑容，是我每天堅持早到的動力
『早呀！成日見你都咁早』
『咁做班長就應該早d番嚟，又可以坐低食個早餐先，咦...』




『做咩呀？』
『哎呀，我唔記得帶早餐番嚟呀...』
『下，咁點算呀？』
『係喎，你食左早餐未呀？』
我搖一搖頭，對了，我好像這麼多年都未曾上學前食早餐...
『咁不如一齊落去食？』
機會嚟喇！飛雲~
.
『蓮姐』
『嘩，駿仔乜咁早呀？』
蓮姐是小食部大姐大，同時也是我的舊鄰居，所以也算是由細看到我大，也特別疼錫我。
.
『方晴你想食咩呀？』
『我...我又想食燒賣，又想食腸粉，又想食魚蛋』
『嘩，睇唔出你咁食得喎』




『咩喎...』
『咁蓮姐四條腸粉，一串魚蛋，一串燒賣』
『真係得？』
『Why not?』
『駿仔，好少咁豪喎，女朋友仔呀？』
『梗係唔係喇，蓮姐唔好亂講呀，嚇親人地！』
呼，真的捏一把汗...
.
正當我準備加醬時，方晴突然喝停我
『呀駿，乜...可以加醬咩？』
『下？！！唔加醬點食？』
『我屋企人好嚴架，對我飲食好多限制，平時都係食齋腸粉』
『咁你就要試下！』
.
加了甜麻醬，豉油和芝蔴後，方晴嘗了一口




『真係好好食呀！！』
『梗係喇，司徒駿私人秘方，包你食過番尋味！』
.
看見她食得津津有味，頓時覺得如果世界可以停留在這一秒多好，只有我們的這一秒。
.
『係呢，點解你屋企人連混醬腸粉都唔俾你食既？』
『第一，因為我係運動員，所以媽媽要我嚴格控制飲食，第二...』
『係咩？』
『講出嚟你未必信，但係事實...自從我爸爸呢幾年身家暴漲後，佢就唔准我好多嘢，又係咁逼我去舞會，話要打入上流社會』
『原來你係有錢女...』唉，又一個公屋仔遇上富家女。
.
『但其實，我都係鍾意以前一家開開心心的日子，宜家係有錢，但就無左家庭溫暖，唉...』
『唔好咁喇，嗱，最多以後你再想食混醬腸粉時，我隨時再混俾你食！』
『嗱，你講架！係喎，點解你呢排咁準時既？』
『咪因為...』




.
鈴鈴...
仆街，總係快樂時光飛逝！
.
『夠鐘早會喇！我地快d上去喇！』
.
Facebook：微言
Instagram：smallpotatosay
一至六每晚7點，重溫當年走過青蔥的歲月
Facebook, Instagram, 紙言, 高登共同發佈