【劇情甜】港佬狂想曲: 第三章：神秘租客篇(26)

十五、迫婚(2)

「係！」雞雄吞左啖口水，鼓起勇氣咁話：「我……我知自己出身唔好，教育水平又低，根本就配唔起Carol；不過我對佢係真心既，我一定會好努力，會儘我所能去令到佢幸福……」佢好堅決咁話。
　　
陳大富冇出聲，只係好有興趣咁望實雞雄。
　　
雞雄又繼續話：「我唔指望自己會發大達，但係只要我繼續努力，我相信自己晌五年之內，一定可以做到大廚個位！唔會令Carol失禮既！」
　　
陳大富忽然哈哈大笑：「好！夠天真！」
　　




雞雄塊面馬上紅個個番茄！
　　
陳大富又笑住咁望實雞雄：「我就畀你做到大廚，咁你一年可以搵到幾多錢，一百萬好未？你知唔知，Carol一年既零用錢已經唔只呢個數！你會配得起佢咩？」
　　
雞雄當堂啞口無言！佢依家先相信呢Ｄ豪門到自己果Ｄ平凡人家有幾大差距……
　　
「錢唔代表到一切既！」雞雄死口硬咁力撐：「我地係真心相愛。」
　　
「真心相愛？」陳大富忽然變臉，疾言厲色咁指住雞雄：「咁你又搞大我個女個肚？」
　




　「……」
　「……」
　「……」
　　
雞雄同Carol都完全呆哂，好似畀人點左穴一樣！過左成幾分鐘，都仍然講唔到野。
　　
呢個時候，有個人晌條雲石大樓梯度慢慢行緊落黎……雞雄同Carol好自然咁抬頭望過去，果個人，原來係……Jacky！
　　
不過呢個Jacky同佢地之前認識果個完全唔同！
　　




雞雄睇到眼都大埋，真係完全唔相信自己對眼。
　
　呢個Jacky著裙架，仲留左長頭髮添……仲有，佢個肚……脹起左！
　　
「Jacky？」雞雄同Carol同時間衝口而出，失聲叫左出黎。Carol仲即刻企左起身，跑過去扶住Jacky。
　　
Jacky攬實Carol，錫左佢一啖：「Carol，冇見幾個月，妳仲靚左咁喎，係咪愛情滋潤呢？」
　　
Carol冇答到佢，仲係唔肯相信咁望實Jacky個肚，連口都震埋：「Jacky，陳Uncle話……話妳個肚係雄哥既，係咪真架？」
　　
Jacky塊面紅左一紅，有少少怕醜咁話：「妳唔好怪阿雄，呢件事我都有責任。」
　　
佢地兩個行到埋梳化，陳大富仲幫手扶住自己個女坐低添。
　
　雞雄仲係好似尊石像咁企左晌度……




　　
「Jacky……」過左好耐，雞雄個魂魄才返到黎，口震震咁問Jacky：「件事究竟係點架？」
　　
Jacky岩岩想開口，陳大富已經搶住講：「等我講……果日我救返自己個女，開頭仲以為係你綁架佢添，所以就叫左Ｄ手下去教訓下你。不過，我Ｄ手下好似做得過分左少少……」
　　
「仲話少少？」Jacky即刻厲左自己老豆一眼，陳大富有少少尷尬咁笑左笑：「點知Jacky一醒返就叫我立即放左你，又話成件事都唔關你事，跟住仲即刻應承去英國添……」
　　
「當時我都有Ｄ懷疑，所以跟住我都搵人查過下你……」陳大富又望下雞雄，果Ｄ凌厲既眼光令雞雄即刻有種畀人剝清光，乜野私隱都畀人知道哂既恐怖感……額頭Ｄ汗不斷咁流。
　　
「好彩……」陳大富施施然咁話：「你雖然一無是處，不過總算都冇做過Ｄ傷天害理既事……而且對Carol都好似幾真心，冇存心呃佢Ｄ錢……」
　　
雞雄聽到先鬆返啖氣，而Carol當堂又好深情咁望實佢。
　　
Jacky見到Carol咁樣，就有少少幽怨咁話：「當日我離開左香港之後，原本諗住呢世都唔會再返黎，永遠都再見唔到你地……點知……過左兩個月，我竟然發覺自己有左……」
　




　雞雄又吞左啖口水：「係……係我既？」
　　
Jacky嘆左口氣：「我成世人只係同一個男人做過，唔係你會係邊個？」
　　
佢一講完，Carol當堂面色大變……Ｄ眼淚已經流緊出黎。
　　
「Carol……」雞雄睇到心都痛哂：「我……我……」
　　
Jacky又笑左下，輕輕捉實Carol隻手。
　　
陳大富企起身，慢慢行埋雞雄身邊：「拿！你而家面前有兩條路：一係即刻娶左我個女，做我陳大富個女婿；一係繼續行埋果日你晌碼頭未行完果幾步……」
　
　雞雄嚇到即刻退後左幾步，跌左落梳化。
　　
「爹地……」Jacky岩岩想開口，陳大富已經伸手截住左佢。





❄天氣凍，各位著多件衫

(如本人ig(J圖IG)每達一千follow就加更一篇)(https://www.instagram.com/jed_girl_hk/)
(如果今日本人Facebook Page 達五十讚將加更一篇)
(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )

待續……