【劇情甜】港佬狂想曲: 第三章：神秘租客篇(27)
IG2000Follow加更
※※※※※※※※※※※※
十五、迫婚(3)
雞雄個心十五十六，佢當然唔想死，但係要佢娶Jacky…
如果係幾個月前，佢一定諗都唔駛諗就會答應娶Jacky！喂！做豪門女婿喎？好過中六合彩啦！邊個唔想呀？…況且Jacky個樣其實又生得唔錯…
只不過呢幾個月雞雄同左Carol一齊之後，兩個人已經愛到唔可以冇左對方既地步…所以佢內心好矛盾…
「雄哥，」Carol唔知幾時已經坐左埋黎：「你娶Jacky啦…」
「Carol，」雞雄好焦急咁捉實Carol對手：「但係…咁妳呢？我鍾意果個係妳喎！而且我知道妳都好愛我架！」
「如果你唔應承娶Jacky，你會死架！」Carol僕晌雞雄個膊頭度大聲咁喊。
雞雄見到Jacky仲係毫無表情咁望實佢，急到成頭大汗。
「你仲諗乜野？而家做我陳大富個女婿喎，幾多人恨都恨唔到呀！」陳大富又陰陰濕濕咁望下雞雄：「抑或你真係想去遊下水呀？」
雞雄望下Jacky，又再望下身邊既Carol，終於下定決心，咬咬牙企左起身，挺起胸膛向住陳大富話：「陳先生，係我對唔住Jacky，你想點對付我，我都毫無怨言…」佢又拍下Carol隻手：「但係我同Jacky真係冇感情，如果夾硬要我同佢晌埋一齊，盞大家都唔開心…」
陳大富即刻「哼」左一聲，冷冷咁低喝話：「不識抬舉！咁你即係想死啦！」
「當然唔係啦…」雞雄已經打定輸數，個心反而定左Ｄ，好冷靜咁答：「有邊個人會想死丫？我當然亦都唔會例外！但係我已經辜負左你個千金，如果而家要我再辜負多一個我愛既女人，咁我不如死左佢好過！」
「阿雄…」Carol忍唔住攬實佢大聲喊：「陳Uncle，如果你要殺死雄哥，咁你殺埋我啦！」
「爹地…」Jacky又再開聲：「玩夠喇！我都話佢地兩個唔會應承架啦…」
陳大富笑左笑：「好！」跟住又招手叫雞雄同Carol坐低，先飲左啖茶，然後先施施然咁話：「算你好彩，呢舖畀你條靚仔扑中左！」跟住又哈哈大笑話：「我陳大富個女婿，你估真係咁容易做架咩？」
「話你聽，我好錫Jacky，佢唔願意既事我點都唔會迫佢做…」佢停左一停，望左下Carol：「當然，搞基例外！」Carol當堂面紅。
「當我聽到Jakcy畀你搞大左肚果陣，開頭真係嬲到想殺左你，不過跟住…反而有Ｄ開心喎…因為我知道Jacky唔鍾意男人，我亦都唔想勉強佢去嫁人；但係我又冇仔，如果Jacky唔結婚，我陳家咪絕後？咁我Ｄ家產將來留畀邊個好呀？而家我終於有個孫…」
Jacky補充左一句：「岩岩照過，確定左係仔！」
陳大富一邊行來行去，一邊搓搓下對手慢慢話：「既然你唔想娶Jacky，而佢又一樣唔想嫁你…」
「…」雞雄即刻眼都大哂咁望實Jacky。不過Jacky擰歪面，根本唔望佢。
陳大富又話：「咁我都唔想勉強你地…」佢又望下雞雄：「而且睇來睇去，你條死靚仔都未夠班做我陳大富個女婿…雖然…」佢又補充左句：「我都好欣賞你咁有志氣，為左所愛既人咁勇敢…所以你放心，我會負責幫你搞掂Carol個爹地，叫佢唔好反對你地。」Carol當堂好感激咁望實Jacky，又好溫柔咁捉實雞雄。
雞雄其實覺得陳大富係晌度瘀緊佢，不過佢當然唔敢駁嘴啦。
陳大富又話：「算你好彩！如果唔係睇在Jacky份上，其實我大可是但搵個人搞掂你，令你永遠都出唔到聲！」雞雄當堂一額汗。
陳大富一揚手，即刻有人拎左份文件入黎，放左晌雞雄面前：「拿，呢份協議書既內容，係要你放棄Jacky肚裡面果個蘇蝦既撫養權，而且唔准向任何人透露你係蘇蝦爸爸呢件事…」
Carol已經拎起份文件，好快咁睇左一次，跟住又同雞雄點左點頭話係…
「簽左佢，我會畀返三千萬你…」陳大富又望實雞雄。
「三…三千萬？」雞雄眼都大埋，拿拿聲就簽左份野。
陳大富於是伸手入袋，想拎左本支票薄出黎…點知雞雄即刻話：「陳先生，錢我唔要喇！」
「下？」陳大富有少少意外咁：「三千萬喎！我冇聽錯丫嘛？唔通你仲嫌少？」
「唔係！」雞雄好肯定咁話：「只不過晌呢件事上面，我真係做錯左。而家你同Jacky肯唔追究我，已經好大量，我冇理由仲要你地Ｄ錢既！」
「咁…？」陳大富有Ｄ猶疑，雞雄即刻拍埋心口：「你放心，我唔會同任何人講呢件事！」
「好！我相信你！」陳大富Ｄ眼光裡面都有Ｄ欣賞既意味。
（後話：雞雄原來係神射手，一炮就打大左Jacky個肚，仲幾乎畀人夾硬拉左上轎，做左「黑幫女婿」添。不過佢死好命，遇岩陳大富「要仔唔要佬」，最後先逃過呢一劫…咁跟住落黎又點呢？下一集：「４Ｐ水戰」！…唔係嘛？4P？雞雄同Carol，就算加埋Jacky，都係得三條友咋喎，第四個係邊個呀？唔會係陳大富掛？）
❄天氣凍，各位著多件衫
(如本人ig(J圖IG)每達一千follow就加更一篇)(https://www.instagram.com/jed_girl_hk/)
(如果今日本人Facebook Page 達五十讚將加更一篇)
(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )
待續……