【劇情甜】港佬狂想曲: 第三章：神秘租客篇(25)

十五、迫婚(1)

（前文提要：Jacky終於都畀佢老豆押左出外國，而雞雄就死裡逃生，仲同左Carol晌一齊，兩小口甜甜蜜蜜咁準備面對美好既新生活。不過，世事會唔會咁盡如人意呢？）

　　話說雞雄同Carol扮到靚靚咁出門口，點知一落到街已經見到兩架大ＢＥＮＺ晌度等緊佢地……
　　
「Carol小姐，」一個著住西色西裝既男人好有禮貌咁向Carol話：「我地老爺想請妳同呢位……先生去見一見佢……」
　　
「下！」Carol有少少猶疑：「阿強哥，唔知陳Uncle無端端搵我地乜野事呀？」
　




　條西裝友望一望雞雄，古古惑惑咁笑左下：「我都唔知呢！老闆既事點到我地呢Ｄ打工既過問喎？我地只係奉命行事架咋。」
　
　雞雄一聽把聲已經認得呢條友就係果日命令將佢掟落海果個，當堂嚇到腳軟。不過見Carol晌度，佢唯有硬住頭皮大步行上前，用自己個身擋住Carol：「拿！一人做事一人當，唔關Carol事，你地唔好搞佢，我一個人跟你地返去啦……」
　
　Carol當然唔肯，拉住佢隻手唔肯放：「雄哥，我唔驚！我地一齊去！」
　　
「Carol，」雞雄見Carol咁堅決，都知勸佢唔掂，只有用力攬實佢。
　　
果個西裝友見佢兩個好似上刑場咁，又似笑非笑咁打開左度車，請佢地上車：「咁兩位請……」 





-------------------------------------

　　架ＢＥＮＺ一車就車左上半山，駛左入間豪華別墅入面，晌花園草地度停低左。雞雄同Carol畀人請左落車，由幾個一身黑衫黑褲既彪形大漢前後左右咁夾到實，押左入間大屋度。
　　
雞雄一直標住冷汗，一來真係好驚，不過更重要既，其實係驚嘆原來Ｄ有錢佬真係住得咁豪華！佢落車果陣，已經畀果個過萬呎，又泳池又亭台樓閣的私人花園嚇到傻左；到行到入去果個超個兩千呎、樓底有成廿呎高既大客廳果陣，就更加睇到Ｏ哂嘴。
       
相比之下，Carol就淡定過佢好多……
　　
佢地坐低晌梳化度，已經有工人奉上熱騰騰既香茶。雞雄一面手震震咁拎起個至少都值幾千蚊既英國骨董茶杯（呢Ｄ係佢晌酒店學返黎既……），對眼就畀客廳落地大玻璃外面果個維港全景震撼到講唔到野。
　




　「啊，Carol，妳黎左拿？」雞雄都未震撼完，已經聽到一把好慈祥既男人聲晌背後響起；嚇到佢成個彈起，一轉身，終於見到果個幾百萬香港人都不知幾崇拜既偶像……陳大富！
　
　「陳Uncle，好耐冇見喇，」Carol起身走埋去，好親密攬實陳大富錫左一啖：「你最近身體好嘛？」
　
　陳大富好慈祥咁摸下佢個頭：「如果Jacky都好似妳咁乖，唔駛我再擔心既話，我身體咪自然會好囉……係喇，我聽妳爹地媽咪講，妳最近好似乖左好多咁喎。」一面講又一面望下雞雄。
　
　雞雄畀佢望到手足無措咁，企左晌度都唔知點算好。
　
　陳大富冇理佢，拉住Carol埋梳化坐低，又向住雞雄話：「你係張先生呀可？坐啦……又或者你鍾意我稱呼你做雞雄哥呀？」
　
　「下！」雞雄嚇到幾乎跌左落地：「唔駛，唔駛咁客氣……陳……陳先生，你叫我阿雄得架喇。」
　　
「好！」陳大富笑左一笑：「反正自己人，我都唔再同你客氣。阿雄，Carol爹地託我問你，你係咪同佢個女拍緊拖呀？」
　　
「陳Uncle……」Carol即刻面紅，詐哂嬌咁。




　　
「Carol，妳唔好出聲住，等我問清楚先……」陳大富拍下Carol隻手，跟住又再望實雞雄。

(如本人ig(J圖IG)每達一千follow就加更一篇)(https://www.instagram.com/jed_girl_hk/)
(如果今日本人Facebook Page 達五十讚將加更一篇)
(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )

待續……