【劇情甜】港佬狂想曲: 第三章：神秘租客篇(24)
十四、九死一生(3)
雞雄大昏迷左成日，一路到左傍晚先畀包租公Ｄ拍門聲嘈醒。
「乜Ｑ事呀！」雞雄一面大聲鬧人，一面睡眼惺忪咁爬起身走去開門。
房門外面，包租公個樣古古怪怪咁：「阿雄哥，有人搵你呀。」
雞雄當堂嚇到醒哂，心諗：「唔通Jacky老豆又派人黎追殺佢？」但係到佢硬著頭皮望出去果陣，竟然見到係Carol！
Carol個樣好似好心急咁，雞雄即刻撥開包租公，拉左Carol入房，順手鎖埋度門。
「Carol，發生左乜野事呀？點解妳會黎既？」雞雄好擔心咁問。佢唔敢太大聲，因為佢知道包租公一定晌外面偷聽……
Carol已經撲左上黎攬實佢：「仲掛住擔心人地，睇下你，成身都傷哂喇……仲痛唔痛呀？」個樣都唔知幾肉赤咁。
「只係Ｄ皮外傷，唔會死人既。」雞雄好溫柔咁拍下佢，又問：「點解妳會知道我發生左事既？邊個話畀妳聽架？」
「咪係Jacky囉，佢頭先臨上飛機果陣，晌機場打電話話畀我聽既。」
「哦，係佢！」雞雄舒左啖氣：「咁即係話，佢最後都係走唔出佢老豆既手掌心。」
「嗯！」Carol點左下頭，對眼又紅起上黎：「佢仲同我道歉，話好對我唔住，唔應該完全唔理我既感受，迫我同佢私奔喎……」
雞雄都有少少開心：「咁咪好囉！佢終於都諗清楚咯！」
Carol又望實雞雄：「仲有呀！佢叫我同你講，話唔好意思，連累到你喎！……我頭先聽包租公講，你尋晚畀人打劫，仲畀人打左一身添，係咪……Jacky爹地做架？」
「應該就係喇。」雞雄苦笑左一下：「其實點只打一身咁簡單呀，我幾乎連命都冇埋呀！」佢將自己點樣幾乎沉屍海底，但係晌最後一刻逃過大難既事，原原本本咁話哂畀Carol聽。聽到佢面都青埋，一面聽一面打冷震。
「傻妹，唔駛驚喇，而家都冇事咯！」雞雄伸手幫Carol抹左Ｄ眼淚。
Carol仲係扁哂嘴咁：「原來陳Uncle真係咁衰既，竟然咁對你……好彩你冇事咋……」講完又忍唔住攬實雞雄唔肯放。
雞雄自己諗返起都一額汗，不過又有少少奇怪咁話：「其實我當時已經諗住死梗架喇，點知佢地又會晌最後一刻放返我？真係諗極都諗唔明。」
Carol抖左啖大氣：「如果我冇估錯，應該係因為Jacky……佢一定答應佢爹地即刻離開呢度，條件就係要佢爹地放過你。如果唔係，以佢既性格，應該唔會咁容易向佢爹地屈服既……」
雞雄當堂恍然大悟，不過又有Ｄ疑惑：「但係……點解呢？Jacky一向都唔妥我架？」當然，佢唔敢話畀Carol聽，佢仲姦鬼埋Jacky呢件事啦。
「其實Jacky份人好好架！佢晌電話度除左叫我同你道歉之外，仲話好多謝你鬧醒左佢……又話對尋晚發生既事一Ｄ都冇後悔喎……」Carol有Ｄ好奇咁問：「尋晚我晌電話同Jacky講左分手之後，你地究竟發生左Ｄ乜野事呀？」
雞雄於是就將成件事講哂畀Carol聽，包括Jacky點樣冒住大雨晌街度發癲、佢地點樣避開Jacky老豆Ｄ手下匿埋，Jacky半夜發燒，同埋佢地第二朝一出門口就畀人捉住既事……當然，冇講中間佢扑左Jakcy果段啦。
Carol聽到原來Ｄ劇情咁曲折，聽到Ｏ哂嘴：「好彩我唔晌度咋，唔係實嚇死我！」跟住又好擔心咁問：「係勒！雄哥，咁跟住落黎你打算點呀？你怕唔怕陳Uncle再搵人對付你呀？」
「唉……」雞雄嘆左口氣：「邊擔心得咁多丫！人地大有錢佬，如果真係想殺左我，同禁死一隻蟻有乜野分別喎？唯有見步行步呢……」佢又捉實Carol個膊頭：「我只係擔心妳！我而家隨時都有殺身之禍架，Carol，為左妳既安全，我諗我地以後都係見少Ｄ……唔係，直頭以後都唔好再見罷啦！」
你地信唔信都好，雞雄呢幾句話真係發自內心架！佢岩岩死過返生，可能真係轉左死性……
「唔制！」Carol一野攬實佢：「雄哥，我鍾意你！我唔會離開你！」
「但係……」雞雄見Carol對佢咁真心，都有少少感動：「我根本襯妳唔起喎！妳又後生又靚，屋企又有錢，仲係大學生添；而我就冇人冇物，讀得書少又一事無成，生得又唔係靚仔，年紀又大過妳咁多……」
Carol一味擰頭，仍然好堅決咁話：「我唔理！我就係鍾意你！你係我既第一個男人，亦都會係最後一個……」
「Carol……」雞雄真係感動到喊左出口……
-------------------------------------
跟住果幾日，雞雄就戰戰兢兢咁回復返佢平時既生活。唯一唔同左既，就係佢真係的起心肝，放左工之後竟然學人去返夜學！佢知自己讀唔成書，於是走去學西廚。
……自從果日Carol向佢表明心跡之後，雞雄就下定主意要重新振作！
……為左Carol，亦都為左佢同Carol既未來。
見到雞雄為左自己咁上進，Carol當然好開心啦。佢非常支持雞雄，日日放左學都會走上雞雄屋企同佢執屋，當正自己係佢老婆仔咁，仲夾硬拉住雞雄去開左個聯名戶口，將自己Ｄ私己錢都放哂入去添……（美其名就話一人一半啦！）個傻妹仲晌佢老豆果度聽埋Ｄ股票貼士，學人炒下炒下，都唔夠一個月就已經話畀雞雄聽，佢地賺左百幾萬添。
雞雄無端端多左個又靚又後生又有錢既老婆仔，當然係開心都見牙唔見眼啦……而為左襯得起Carol，佢都決定「洗底」，一於將過去果個「賤男雞雄」徹底毀滅！
第一步就係辭左份工，Carol幫雞雄晌佢世伯間酒店度搵左份「幫廚」；又幫佢租左間樓，等佢慢慢離開以前果個世界……雞雄乜野都重新開始，直頭好似脫胎換骨，成個人都唔同哂！佢真係非常畀心機做野同讀書，連個酒店大廚都好賞識佢。
如是者好快就過左成半年，陳大富Ｄ人冇再出現過，而雞雄亦都成功挨過左試用期，仲有人工加添。佢失落左成三十年既自信終於都返哂黎，感覺自己似返個人！而佢亦都第一次答應Carol，肯陪佢去參加佢Ｄ朋友既生日會……
果朝雞雄晌Carol悉心打扮之下，著住成套老西，望落又真係幾英明神武咁喎；同Carol行埋一齊都唔覺太突兀。
而就晌佢地兩個甜甜蜜蜜咁翹埋手行出大廈門口果陣，一眼就見到有兩架黑色既大ＢＥＮＺ停左晌門口……
(如本人ig(J圖IG)每達一千follow就加更一篇)(https://www.instagram.com/jed_girl_hk/)
(如果今日本人Facebook Page 達五十讚將加更一篇)
(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )
待續……