【劇情甜】港佬狂想曲: 第三章：神秘租客篇(23)

十四、九死一生(2)

　　不過就晌果兩個人岩岩數到「三」果下，雞雄忽然聽到最先果條友晌遠處大聲嗌住話：「咪住！」
　
　果兩個人其實已經甩左手，將雞雄成個人扔左出去，依家唯有即刻琴琴青將個麻包袋扯返轉頭。
　
　「強哥，乜事呀？」其中一個人喘住氣，仲有少少嬲咁話。
　
　先前果條友已經走到埋黎：「我點Ｑ知乜野事喎？大老闆晌電話度乜都冇講，剩係叫我地教訓完條茂利之後，車返佢返去，放佢走咋！」
　




　「下！唔係呀嘛？就咁教訓下咋？乜老闆唔係叫我地同條茂利做忌咩？而家拐帶左小姐喎，老闆琴晚明明仲嬲到拆哂天，大聲叫我地好好招呼呢條友仔架？點會就咁易放過佢架？」
　
　「你問我我問邊個呀？夠薑你咪自去問下老闆點解囉？」
　
　「咁我又唔敢……」果條友當堂謝哂。
　
　「強哥，咁而家點呀？」佢跟住死死地氣咁話。
　
　「點呀？咪車返佢去大角咀，是但搵條橫巷踢佢落車囉……駛唔駛我寫埋個地址，畫埋張地圖畀你呀？」
　




　「講笑咩？強哥，你開句聲咪得架囉，我地班細既識點做架喇！」另外一把聲話。
　
　晌個麻包袋裡面既雞雄雖然聽到一頭霧水，但係都知道自己應該岩岩晌地獄打左個轉返出黎……
　　
「哎呀！」不過佢都未開心完，個頭又畀人踢左一腳，眼前一黑，又試暈鬼左。

-------------------------------------

　　到雞雄醒返果陣，先發現一個人訓左晌條橫巷，成身痛到好似散哂咁，不過身上面Ｄ繩就已經畀人解開哂。雞雄坐起身，挨晌牆度抖左好耐至夠力企返起身。當佢扶住幅牆慢慢行返出大路，先發覺自己原來離開屋企只不過兩個街口。
　




　雞雄忍住痛，拐下拐下咁行返屋企；一路上Ｄ人都好奇怪咁，眼金金咁望實佢……
　
　一入到屋，包租公已經走左埋黎：「嘩，雞雄你搞乜鬼？成身都係血，塊面又腫到成個豬頭咁？畀人打劫牙？」連光頭伯同肥標都走埋出黎。
　
　「係……係掛……」雞雄支吾以對咁。
　
　「你坐低抖下先啦，駛唔駛幫你報警呀？」
　
　「唔駛，我都冇事咯……」雞雄見頭房度門打開左，就問：「係喇，包租公，琴晚……」

　　包租公即刻好似像好興奮咁：「嘩！真係講你都唔信！頭房條『靚仔』原來係陳大富個『女』黎架！琴晚陳大富仲親自殺上黎搵佢添呀！最衰當時我驚得滯，冇諗起同佢映返張相，如果唔係，同佢映張相，鑲起佢掛晌廳度都唔知幾威？」
　
　「係囉！」光頭伯跟都附和住話：「果個外賣仔就正啦，聽講佢報一報寸就賺左五十萬喇！」
　
　「咪係！」肥標憤憤不平咁：「不過有乜好講喎！鬼叫我地同人住埋同一間屋都走漏眼咩？」




　
　雞雄聽下聽下，雖然知唔哂全部，不過都已經估到七、八成：「咁……咁而家Jacky佢地點呀？」
　
　「邊個『積……奇』呀？」包租公好好奇咁問。
　　
「咪即係陳大富個女囉！」雞雄先醒起佢地根本連Jacky個樣都未望真過，當然唔知佢個名啦！
　
　「哦……」光頭伯摸下自己個光頭：「今朝去公園晨運果陣聽到Ｄ街坊講，好似話天濛光果陣見到班人晌街口果邊挾左個靚仔上車，聽佢地形容果條靚仔個樣，應該就係陳大富個女……」
　
　「咁即係Jacky最後都畀佢老豆捉返……」咁都好Ｄ……雞雄估計佢應該冇事，都放心左少少。
　　
「喂，雞雄，」包租公忽然好似好懷疑咁望實雞雄：「你個樣古古惑惑咁，好似知道好多野咁喎！」
　　
「痴線啦你！我知你阿媽係女人！」雞雄懶得啋佢，起身打左個電話返茶餐廳請病假，跟住就返入房扑左上床……佢琴晚都冇乜點訓過，又畀人打左一身，岩岩仲晌鬼門關打左個轉添，而家真正係心力交瘁，一扑上床就訓到不醒人事……





(如本人ig(J圖IG)每達一千follow就加更一篇)(https://www.instagram.com/jed_girl_hk/)
(如果今日本人Facebook Page 達五十讚將加更一篇)
(各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )

待續……