有個混血妹同我講，話想同居: 今晚打喪屍？

晚上8時 W酒店
「小姐呢？仲係搵唔到佢？」坐在貴賓室的朱父對一西裝男道，旁邊站立了其他穿同樣制服的保鏢
「對唔住呀，朱生。小姐電話無人聽」西裝男已經多次致電雪兒，每次都是沒有被接聽
「呢個衰女，係要落我面先開心嘅！」看到這樣的情況，朱父被氣到不行，他大力的打桌子
事關朱家這晚是要舉辦慈善晚會，而朱家除雪兒外的成員都已到達晚會現場
早前朱父通知了雪兒，可她一直沒有回覆
「老公，呢個反骨女就咪理佢啦。」朱夫人為朱父整理西裝「睇下你呀，幾廿歲人仲咁論盡。笑下啦，就嚟要致辭喇」
「朱生，一切已經準備好，隨時可以開始」
「好，麻煩哂。出去啦我哋」
朱父從位子上站起來，他和夫人還有女兒們就打開進入會場的門


「歡迎大家參加今晚嘅慈善晚會，有請朱主席.....」

同時間 魚生飯店外
「大小姐，你電話係咁震，要唔要聽一聽呀？」焌文提醒雪兒
「唔使理。」
「雪兒，你無事呀嘛？」舒雯見雪兒的眼神帶傷感，於是就走到她旁邊陪伴着
「無事呀，係肚餓咗啲姐」雪兒不想眾人為她擔心，於是將理由推到肚子餓上。話說她們等了半個多小時了，店外有大量的客人等侯着
「60號飛，60號」
「入得啦，雪兒」走着的舒雯拖着雪兒的手，在後面的雪兒回復了笑容
（算啦，唔好俾啲無聊事破壞好心情）雪兒不想被電話轟炸，因此她決定將手機關掉。


順帶一提，明麗要準備教會夜晚的佈佳音，早前就先離開了

要說雪兒跟父親的關係，已經不是一個差字足以形容
追溯起來，是從朱父冷落紫凝（雪兒亡母）的時候說起，那時的雪兒只有四歲
朱父他每天要不是忙於和友人/客人打高爾夫，就是在辦公室工作，因此他和秘書有不少的相處時間
而當時的秘書就是現在雪兒的後母，當時的她性感狂野，深得朱父的歡心。
就這樣，他們開始了地下情，二人三不五時都會到長期租了的酒店房敦倫，到了後來二人更在那裡同居
在這前，朱父還不會玩得太大膽，那時候的他也沒多少天是早過晚上兩點回家的，就算有，也只是洗完澡就直接倒下來睡的情況
這時的朱父跟紫凝都沒多少對話的機會，更不用說一家人同枱吃飯了
有句俗話是這樣說的：「同枱食飯，各自修行」，對於雪兒來說這也是奢侈不過的一回事


再怎麼說，那還有在一起見面的機會吧，即使是一句話都沒說過的情況，但都可以有一點家的感覺
可是，自她懂事後，她家都沒有這樣的機會........每天她和媽媽吃飯的時候，她都在等候主席位的主人回來，如是者等了兩年.......
那男人都沒有回主家席上過

某一天，她受到一位同學邀請到他的生日會上作客，是一個在M記舉行的生日會。
收到那張邀請卡的時候，她有起要在辦生日會的念頭
收到邀請卡的那一晚，剛好是朱父少數會早歸的日子。雪兒看到父親回來了，就走到書房打算找他講生日會的事
進到書房的時候，她看見坐在皮椅上的父親在忙，她沒有多想甚麼，再怎麼說她只是六歲的小朋友，她想着的是把握和父親相處的時間
「Daddy，有同學叫我去佢生日會呀，我可唔可以係生日......」
此時的父親沒有回應，只在不斷的看着檯上的文件，那些文件是每天的帳目還有待批的文案
「Daddy,Daddy....」
「唔好煩我！你唔見我忙緊咩！你真係同個八婆一樣咁煩！」他說的三八，是時任妻子紫凝
「Daddy你無事嘛？你係咪唔舒服呀？」雪兒看見對她發脾氣的父親，她嘗試安撫他的情緒
「我係見到你唔舒服，你知唔知點解我會唔返嚟？」父親將雪兒推開了「我就係唔想見到你同你呀媽」
「Daddy,你講咩呀？」雪兒聽到父親突然說出這樣的話，一時間消化不了那話的意思，不知如何是好的她開始哭了起來


「喊喊喊，有用嘅咩你！究竟係公司重要啲，定係你呢啲無聊生日會重要啲？你答我？」
「我只係想同Daddy你傾下計姐，你好少係屋企嘛」
「我唔想聽到你把聲，出去。」
「Daddy！」
******************************
「大小姐，食乜呀你？」進到店裏的雪兒從坐下來起，就沒說過一句話，焌文跟舒雯一看就知道，此時的她滿懷心事
「大小姐！睇menu啦，差你未諗咋！」焌文見雪兒沒回應，就大聲一點的跟她講話
「咩事？」剛才還在回憶過去的雪兒，終於被焌文拉回來了
「食咩呀，小公主？」焌文清楚雪兒是為家庭的事而傷心，可他沒有要把話說出口
「有咩好介紹？」
「呢度啲吞拿魚飯好出名，我嚟親都食嘅」
「Errrrr，咁我要呢個」雪兒努力的在裝沒事，她不想大家因她而失去興致「西米露呢？」
「我就食火灸吞魚飯啦」
「肥仔，你記清楚食咩飯呀你，你知你架啦，三個飯不是夢」大隻仔道
「你估我幾百萬未開頭咩？一個飯都百幾二百蚊咁，食三個都過五百啦！你請？」


「好彩，仲認為你會好似平時咁叫兩三個食」區長說
「大不了一陣食過！唔該～」

「屌，過埋個聖誕就要考試，係邊個杏加橙發明考試架！」光洙想起了，下個月就要考試了
「驚屄咩！我哋有怕醜仔獨家notes，無事嘅～」說着的焌文是一副沒有在擔心的樣子
「好心你啦，唔好只係靠人先得架！呢幾個月呀，我都無見過你聽書」焌文在課室不是在睡覺，就是在玩手機等等
「考到就得啦！係啵，乜有怕醜仔notes解決唔到嘅嘢咩？」焌文雖然沒什麼溫習，可他都可以考到不錯的成績
「有秘笈係好嘅，不過有一科係點都搞唔掂........」大隻仔語氣中略帶點保留
「不要再說了！」本來還在看感情台post的區長，知道大隻仔接下來要講甚麼，他不想聽下去
「完了吧毫無意外～」在眾人都在緊張的時候，唯獨姚明可以在唱歌
「你仲有心情唱歌嘅你！你係最差個個好唔好?」大隻仔吐嘈的原因，不是因為姚明難聽的唱腔，是看到他毫不緊張的樣子，而不禁火爆起來
「邊個叫我哋個底差先得架，我哋咁多個入面呀，係得文少高分咋」當然，合格的還有男神夫婦跟怕醜仔，但四人中焌文是最高分的那個
「點解好好哋出嚟玩，都要提埋啲傷心事先得架？」
「人唔作出犧牲，就得唔到任何收穫」怕羞仔這話是對着姚明說的「你估文少佢無努力過咩？」
是的，不要看焌文一面輕挑的樣子，他還是有努力過的，但只限小學時期而已



「唔係啵，我哋今年有勁人係度」舒雯看向了雪兒，被看着的雪兒不知她在講甚麼「希望在明天呀嘛！」
「葉舒雯你出咗pool，終於醒返少少啦？」
「乜我好蠢咩？」
「唔係好蠢，」沒在怕的焌文在喝着熱茶，喝茶的時候會給他舒坦的感覺，因此他非常喜歡喝茶。
「係蠢到不得了」舒雯認為他是要說她的好話，她沒想到焌文會講得更難聽
「知你最醒啦，千祈唔好俾雪兒高分過你！」
「咁多個入面最勁嘅係佢，囉佢同我比都唔公平啦？」
「岩岩講得自己幾咁勁咁，唔係驚呀你？」作為青梅竹馬的舒雯，看穿了焌文的想法
「無咁嘅事」此時的焌文強裝沒事的樣子
「你哋講緊咩呀？你哋咁緊張嘅？」雪兒不知道大家為何突然緊張起來，因此她問了舒雯
「是咁的。我哋講緊英文科嘅考試。佢哋幾個啲英文屎到一個點」舒雯把話說清楚「佢哋嘅英文程度，小學生分分鐘都勁幾條街」
「因為咁，佢哋就驚到不得了」舒雯是合格的一份子沒錯，可她要顧好自己就已經辛苦得很，根本沒有幫助他們的能力
而焌文就教過他們幾次，可教了跟沒教一樣，他只好放棄治療
「係啵，雪兒係美國返嚟，搵佢咪得囉！」光洙看着安靜的雪兒


「呃........」
「我哋嘅未來，就靠哂你啦！」姚明知道他的英文成績有希望提高，他就雙眼發光的看着雪兒
「好心你哋啦，人哋乜都未講就係度jer住哂」焌文道
「全班英文最高分嘅你，唔會明我哋架啦」大隻仔同是天涯淪落人，自然明白姚明他們此刻的想法
「要串就串埋呢個月啦你～」
「係啵，雪兒係美國返嚟，搵佢咪得囉！」光洙看着安靜的雪兒
「吞拿魚飯邊位？」正當眾人餓得快要沒感覺的時候，食物就剛好的送到眾人的面前

「好嘢，我唔客氣啦～」焌文將其中一塊吞拿魚夾起了，他等了這麼久就是為了它
「咪住！放返落去先」舒雯叫停了準備將魚放入口的焌文，他將魚放回碗中並盡量還原剛才的模樣
「下？我等咗好撚耐啦，咩事呀？」焌文本以為舒雯是因他先吃而叫停
「我仲未影碗飯」舒雯將她的手機拿出來，她開始對着飯碗拍照
「下？唔係呀？你前世係咪未見過魚生飯？」在等着的焌文，臉超臭的看着舒雯。無他，他一餓起來就會變得暴躁，餓起來的他會完全失去理性
「唔係，我想記錄低嘛～」舒雯繼續的從不同角度拍下去
「即係咁，影還影，你影佢哋個份咪得囉，點解要影埋我個份？又唔係得我一個叫」
（唔理啦，食咗先講）焌文不想再等了，他快速的將其中一塊放入口中
「大姐呀，你可以影埋男友個份丫?」明顯的，舒雯的借口不能說服焌文
「咁得兩份好dry呀嘛～影哂先perfect池架嘛.......喂呀～！劉焌文！」舒雯用高八度的聲線說
「又點呀？」
「我未影完呀.......你咁快就食架！」
「仲咩姐你？啲嘢食到咗，就梗係第一時間食架啦，影得嚟都蚊訓啦
你又唔知自己，每次都要影返一百幾十張先得嘅，仲要揀相乜乜乜！我就唔明啦，影咁多仲咩？」
「咁我想up上fb同ig呀」
「即係呃like啦！又唔見去譚仔茶記你會係咁影！你啲女仔無咗啲like會死嘅咩，而家有個like你嘅男友旁邊都無用啦！男神，估唔到你係佢中，連一個like都不如」
「咁ig要有相upload架嘛」
「up完係咪會好食啲丫？真係.......」
「搞錯呀，唔就人嘅你,哼！」舒雯鼓起了腮
「得啦，你而家有男神啦，唔使理我架啦，餓死都無人理架啦！」聽完舒雯的話後，焌文的臉就更臭了
「算！我都係無人理我架啦！」氣沖沖的焌文走到外邊，被寒風不斷的吹着的他氣得快要殺人的樣子
「屌！」感到吃力不討好的他，點起煙來。

焌文離去後，眾人都沉默不語。手掌係肉，手心都係肉，作為好兄弟的他們不便多話
「唔係咁呀嘛，連幾張相都影得！仲要走埋出去」同樣氣上心頭的舒雯，在對着男神抱怨着
「如果你係佢，等到胃都穿了，都躁底啦。到咗了有得食嘅時候，就俾人停住要影相咁。你會點諗？」男神知道兄弟為他做了很多，這事要理性一點
「又唔會咁囉我，我會等埋佢影完再食」
「........」（點講好呀？講咩都死咁）
「等等先，你唔係想幫佢講好說話下嘛？」舒雯見男神一副有話不能說的樣子，她雖然知道他是怎樣想的，可舒雯還是要男神把話講清楚
「唔好嬲啦，佢都唔想嘛.......」男神也想不到要怎樣說才好，他知道如果自己講錯話，無論對女友或焌文的關係，都會無彎轉
「乖啦，唔好嬲豬啦.......」
先講女友方面，女人的記憶力好得驚人，那怕是雞毛蒜皮的小事。不小心做錯事情的時候，她們都不會說些什麼，還可能會對你笑
可千萬不要認為一切都完了，到了吵架的時候，她們就會記起你那堆有心無心的事，以此來對男友作出控訴，當然那些鳥事還可以當分手的理由。
為免這樣的情況發生，男神每個行動跟說話都會想得幾次才做，做得這麼小心翼翼，都是為了避免上述的事情發生
要令女士們冷靜下來有多難，巴打們你們懂的

再講兄弟，男人是不能沒有兄弟的。兄弟對於男人的重要性，女人一世都不會明白。
正如我們不會明白為何兩個女人明明是仇人，卻可以在人前親密如好友般：拖手行街，貼面自拍，一齊旅行乜乜乜.......
女人的友誼，可以因為一兩句說話而破裂，而由閨蜜轉為不共戴天的仇：
男人的情誼就不同了，只要成為了兄弟，就會義無反顧的當到底，除了自己女友／妻子被搶等的大錯，理論上是不會有多少改變的
作為女友，妳要另一半離棄兄弟，倒不如叫他去死
而男神想兩者共存，因他不想失去任何一方：無論是對他義無反顧的焌文，還是好不容易才走到一起的舒雯

焌文在店外久久未有回去，雪兒開始擔心起他，放下了筷子的她遠望著門口，她看到焌文一枝接一枝的抽起煙，而抽着煙的他正坐在附近的石階上
「算啦，西米露餓到咁，咁講算客氣架啦～」打破了沉默局面的雪兒，是為焌文說的好話
「因此呢少少事而嬲有咩謂？」
聽到這話的眾人都呆了，他們想也想不到，會有雪兒為焌文說好話的一天
一開始的時候，二人是水火不相容的關係，焌文當時經常講「有我無佢」這句話，高人們還在擔心如何讓二人乖乖的共存（已經不求他們有好的關係了）
有誰會想到今天，會是雪兒當和事佬呢？
「Sherman,你都知佢架啦，佢一肚餓呢就會躁架啦，同佢講乜都用。今日佢已經無食下午茶，到咗岩岩照計就已經頂唔緊，俾着係平時？佢已經叫轉過食另一間
係見你話想食，佢先等咁耐咋
我明嘅，見到好西會好想影嘅。不過以佢嚟講，佢好易諗埋一邊，尤其係肚餓到不得了嘅時候，佢嘅智商會減到零，你要影好多張先俾佢食，佢就當然會爆計啦
佢都就咗你咁多啦，你咪俾佢任性下啦
佢今日都叫幫咗你，雖然係呃你在先.......話就話係咁，不過西米露都用咗成個月嘅時間去練習啦，你都知叫佢唔玩一日都唔得啦，何況係成個月？
佢辛苦咗成個月，你無請返佢食飯不突只，仲要同佢鬧交......」
「咁但係......」舒雯雖知道要如何做，可同樣氣上心頭的她，不想做先道歉的那個
「但係咩丫？我出去搵佢先啦，你係度冷靜下先啦」如是者，雪兒就走到外面找焌文了

還在外面食西北風的焌文，已經抽到第三根煙了，他邊抽煙邊想着剛才的事情
（仆街！我做咁多嘢做乜,餓到on99都無得你食呀！）此時的焌文，其實是想有人出來找他
「西米露，無事嘛你？」出來了的雪兒走到焌文的前面，她用哄小孩的語氣跟焌文講話
「無事就假」焌文再抽了抽手上的煙
「仲咩呀你，平時都好少嬲架？」雪兒看到焌文氣到不行的樣子，就坐了在他的旁邊
「車，仲唔係因為葉舒雯阻撚住我開餐！」
「Sherman無心架，你唔好咁嬲啦」
「阻人開餐，尤如殺人父母呀！我做咗咁多，開個餐都唔得，仲要等佢影埋啲濕尻相！點唔嬲呀我？」
「咁你而家唔食？你明明好肚餓架？」
「無胃口呀而家。唔得嘅，最多一陣返屋企食杯面」焌文將臉別了過去，雪兒知道他是在鬧脾氣
「真係呀，成個大細路咁嘅你」
「係架啦，咁又點？」
「邊有小朋友會食煙架？仲要食一支都唔夠，要chur幾支先得」
「屌，係咪連你都要踩多下呀？」
「如我係要玩你嘅，我就係入面同佢哋吹水啦，貪出面風涼水冷咩？」
「係咩？」
「西米露」雪兒將臉哄近在鬧脾氣的焌文旁邊
「乜事？」
「話俾我知，你想Sherman點做，你先唔嬲啦？」
「佢會做咩？我唔信」
「如果我話我可以令她肯呢？」
「係真唔係架？一陣佢話唔肯呢？」
「唔得的話，我請你食飯喇遲啲」
「你會咁好？」
「點解唔會？你講咗俾我知想點先啦」
「我想去機舖打機，好耐無去過」其實是因為他一肚子氣，他想去借打電動來發洩
「無問題，咁你應承我一樣嘢丫？」
「？」
「你入到去唔好再西口西面，ok？」
「是但，你點講點好啦」
「好啦，我哋入返去啦～」雪兒拖住了焌文的手，二人走回了店中
 
回到餐桌的焌文，第一時候是看魚生有沒有被偷來吃，只因他們平時會互搶食物的
「無食你魚生呀，唔使擔心」在這個時候，是沒有人會做這樣的事，如果有的話都會被區長用筷子打手
「快啲食啦你，你都無乜食過」
不發一言的焌文，繼續的享用着未吃完的食物
「Sherman，陪我去toilet丫？」雪兒對舒雯打個眼色，舒雯知道是要說剛才的事
「唔…….」
 
二人沒有進到廁所內，反而選在廁所旁的通道談
「點呀，冷靜咗啲未？」
「唔……..」
「又唔使咁嘅，我岩岩只係睇下佢點，話哂如果無人睇佢，佢做會傻事」
「佢點講呀？」
「佢呀……..乜你會擔心佢嘅咩？」雪兒知道舒雯還是會關心焌文的。可是隨着雪兒和焌文關係親密了，不知不覺學起了焌文愛玩弄人的壞習慣：雪兒沒有立刻回答舒雯，她想看舒雯被逗的樣子
「呃……呃」臉紅了的舒雯，說話結巴了起來
「哦～咁岩岩又唔出去睇人？」
「咁…..咁…..無理由係我出去架嘛，咁咪好無面？」
「係咁呀嘛？咁係咪唔做friend先？係嘅我同西米露講呀！」
「又唔係咁嘅…….」
「即係點呀？你咁樣我會好難做架，葉小姐……」
「好，我投降。你快啲同我講點做，好嗎？」舒雯想到如果和焌文絕交會是怎樣的情況，就擔心了起來，她知道這不是在開玩笑的，那傢伙是會完全不理人，沒有和好回事
有三句不可以跟焌文講的：一分手，二絕交，三離婚（未來的話）
「係咪真架，咪聽完就唔做呀」
「唔」舒雯點了一下頭
「okay, 好簡單…….同佢去機舖打機」
「what?好嘈啵入面」
「你唔想？咁我同西米露兩個去啦」雪兒假裝要回去的樣子，這樣是要嚇一下舒雯
「又唔好嘅….多啲人好玩啲嘅~」舒雯勾住了雪兒的手臂，背對着的雪兒笑了一笑
「一齊都得，你唔好black面下，應承我okay?」
「得，都係你最好」
「呢句咪俾個小氣鬼聽到呀，佢又會發火架啦」
「係啵」
就說樣，二人回到了餐桌上
 
「咁耐架，大小姐你」
「咁女仔都整下頭髮咁架嘛」
「你啲女仔真係，咁多嘢搞嘅？」
「係架啦，你係咪唔同我出街呀？」
「哈，咁講下嘛？」焌文聽到雪兒的回應，就搔她的腰了
「咪搞啦你～」二人不知不覺的又開始打鬧了「好痕呀～！」
「睇下邊個頂唔順先？」
就在二人打鬧得忘我的時候，舒雯開口了：「劉焌文」
「哈哈……咩事？」焌文停了在搔雪兒的手，而雪兒亦定格望著舒雯
「呃……」舒雯支支吾吾的說
「我想去機舖打機呀」
「下？」焌文不能相信聽到的話