有個混血妹同我講，話想同居: 勿演畜生米山小喇

完了聯歡會後，焌文回到了新聞室
「劉焌文，你而家可以講點解會潛成個月水未？」說着的舒雯從後抱着男神
「仲唔係為咗你，話哂男神有幾何會追女仔丫？俾女追就多啦！」焌文將他的電結他收回袋內
「你哋就因為咁，連我都呃埋？」雪兒鼓着腮道
「要一個計劃成功，首先要呃咗自己友先」
「咁佢哋又知得⁈」雪兒氣沖沖的看著焌文
「如果連佢哋都唔知，咁我就乜都做唔到啦？話哂，你都係玩嘅對象之一」
「搞錯！等我咁擔心你哋，原來係俾你哋玩！」雪兒氣得猛拉焌文的臉
「係呀～你咁好玩，唔玩你玩邊個？」被拉着臉的焌文，口齒不清的說着
「大小姐痛，痛！痛！痛呀～！停停停」雪兒一直用力的拉着臉，焌文痛得叫了出來


「呢個係你玩我玩得咁開心嘅punishment！哼！」
「之前都叫你咪玩架啦，又唔聽人講」坐着的區長道「玩女仔，同玩火有咩分別？」
「睇下，啲兄弟都幫你啦。」
「可以放手未？」雪兒還沒有將手放開，焌文痛得快不行了
「本來就想放嘅，不過知你痛之後，就唔想放啦」
「當時人都無講咩，你咁嬲做咩啵？」
「明麗救我～」焌文對明麗求救
「又咁講，我哋知就唔係驚喜啦」
「都係四眼妹最好～唔似啲暴力大.......」聽到這話，雪兒把手鬆開
「你都知你暴力呢！」隨之而來的是一記重拳落在天靈蓋上


「睇到都痛，今次柒到你呢」明麗不敢看下去，摀住臉的她將頭別了過去

收拾好行裝後，一行人就到位於觀塘工廈的band房放下那些結他甚麼的，然後就去附近的譚仔吃飯了
「今餐食乜餸？」光洙和區長在看着菜單，光洙正煩着要吃甚麼
「你要睇嘅咩？懶肉勿演畜生米山小喇，凍撚死丫嘛！」
「你又知？」光洙回應區長道
「你下下都食呢啲架啦，邊有改過呀？」
「好似又係......」
「西米露呢？又去咗食煙呀？岩岩仲坐係度架？」
「佢煙癮大是常識吧！佢同男神一樣咁叫啦？」大隻仔想好了自己要吃的東西，他把菜單放回桌上


「卯挫～仲無人未得？」舒雯問
「矛」怕醜仔回應道
「唔該～」男神舉高了手，呀姐快速的走到眾的人桌子旁
「係,要...........」
「唔該～」

「好啦，嘢食就叫咗啦」勾着男神的舒雯道「Daniel呀，其實成件事係點架？」
「其實是咁的.......」
*****************************
一個多月前 觀塘Band房
Titans四子在討論要表演甚麼歌曲，四子在看着一堆的樂譜
「屌！都唔知唱咩好！啲歌都玩到悶哂咁」看了樂譜許久的姚明，在按着太陽穴
「咪就係，有無啲有新意嘅玩下呀？玩咗幾年，是時候玩啲新嘢了......」同樣想不到要用哪首歌曲的男神，喝下一口檸檬茶
「MK文，你平時好多橋架？快啲諗啦！」那時快要到決定歌曲的死線了，區長此刻變得焦躁起來，而焌文坐在旁邊一直不發一言
「我的媽！到deadline啦，我哋就連歌都未揀到！」


突然，焌文站了起來
「得啦？」
「用咩歌呀？」
「終於可以停下啦！」
「唔係，只係要講落去食個煙先，好快」
「下，仲食煙？歌都未諗好.......」區長被焌文氣得要死，他恨不得拿檸檬茶樽巴下焌文的頭
「唔得啦我～俾我落去抖下氣啦」焌文向男神打個眼色，是要求救的意思
（男神，要信我呀）
「俾佢落去啦，話說我想買嘢食，一齊啦」
「連男神都咁講，不如一陣先講？」
「好啦，怕咗你，快啲返上嚟呀！」
「唔，有無嘢要幫你哋買埋？」

「係啵，你同葉舒雯點呀？仲未同佢表白？」到了樓下的焌文，第一時間點起了煙
「未呀，我想搵個好啲嘅機會同佢講」


「唔係呀你？我哋都舉哂腳贊成啦，仲唔進擊？」
「你知架啦，我對住佢就會失哂魂。仲有，始終想俾個美好嘅回憶佢呀嘛，係要諗下架啦。」
（美好嘅回憶？）焌文聽到男神的話後，想到一些甚麼
「始終佢係我咁耐以來，最中意嘅女仔」
「咁呀........今次你做主音啦，點睇？」
「我做？你講笑咋？一向唔係你做vocal咩？點解無啦啦叫我上台唱歌？」
「又係你講嘅，要俾個美好回憶佢嘅？既然你唔敢面對面表白，不如你唱出嚟俾佢知啦」
「下？即係點？」
「買埋嘢，bangbang聲上去啦。上到去先一次過講」

「好啦，我諗好點做啦」回到band房的焌文吃起點心面來
「今次vocal,會由男神做」
「呢個都唔係最重點嘅，咁選曲呢？」區長最緊張的是選曲的問題
「俾我講埋先。今次用嘅歌，係會周傑倫嘅倒帶」
「點解無啦啦會轉做男神唱嘅？不嬲都係你唱架？」姚明道


「係想俾葉舒葉一個美好嘅回憶，而其中一部份就係男神憑歌表白」
「好啦，男神終於要表白啦，我哋講到口水都乾哂」眾人這幾個月來，不停的提醒男神要表白，可他一直都未有作出行動。他說是要先了解舒雯的想法，說穿了就是怕被拒絕。無他，一直都成功的人，是不能接受自己失敗的
「你點講得掂佢架？」
「唔係我點講，而係佢自己提出要咁做嘅
講返個計劃先。呢個計劃，我唔想俾葉舒雯知，如果唔係何為驚喜？同時我哋唔可以俾其他人知，包括大小姐同四眼妹，畢竟佢哋都fd嘅。知道大家會好辛苦，但為咗我哋男神難得嘅表白可以成功，係要做得徹底啲先得」
「咁光洙佢哋呢？」光洙他們不是Titans的成員，他們不會在band房長駐
「佢哋就負責同啲女人去玩，如果我哋全部潛哂水，啲女人會起疑心。我已經同佢哋講咗啦，佢哋會保密。仲有，我哋唔可以俾一點蛛絲馬跡嘅女人留意到，大家都明啲女人勁起上嚟，就神探加利略上身咁架啦，我連估都唔想啲女估到，直到最後一刻為止」
「咁平時呢，我哋點都會一齊上堂架？」姚明問
「無錯，所以平常食lunch同埋放學後活動照常。如果全時間潛水，女人會諗埋一邊，話我哋嬲咗佢哋咁，到時仲麻煩
咁周末嘅日子呢，我哋就係度練歌，話哂好耐無正式練歌喇，係要多啲時間。為咗有最好嘅效果，我哋要多努力」
「咁幾時開始個計劃？」
「下星期六，今晚嘅飯局會照去。打後一個月都會係咁，辛苦大家」
「好，就咁啦。而家要做嘅，係搵首歌嘅樂譜～」區長走到band房的電腦前面，上網找起樂譜來

「就係咁，我哋三個就俾你哋玩咗一個月.......」


「其實唔只一個月咁少」抽完煙的焌文回到眾人的當中，他坐了在雪兒旁邊
「吓？」
「無錯，正確啲講係旅行前就開始」焌文對舒雯了奸笑了一下
「即係從坐嘅位置，到你哋嘅行為都係計算好？」舒雯想起了當天的情況，好像是有人在作球
「叻女，一切都跟隨住劇本進行，係差在男神遲咗好多先進擊你」
「等等先，今次又有邊個唔知呀？」
「旅行嗰次，就得你同男神唔知」呀姐將飲品送上，焌文喝了口凍央
「如果你哋知，可能你到2047都未做到佢女友」
「雪兒，我終於明你點諗喇，俾劉焌文咁玩，唔打佢都消唔到氣」得知自己是從頭到尾被計算的那個，舒雯想揍他來下氣
「你哋係埋幾多個鐘呀，大力妹你咁快破功嘅？」
「對住你啲人真係忍唔到囉。無論點，Daniel都會鍾意我嘅?呵～」舒雯對男神撒嬌起來
「明明之前就驚到乜咁，成日問我點做好.......好啦而家得手啦，就串返我轉頭咁話」焌文心想早知讓舒雯多等幾年
「過去嘅事就算啦，我哋要睇將來嘅」男神道
「果然我Daniel係最好嘅」

「細佬，小心頭下」呀姐推着一架手推車到眾人的桌前，在車上的是一碗碗的米線還有小食
「過橋餐兩個，左邊酸辣湯，右邊胡辣下」呀姐將兩大碗的米線放下，在碗中是滿滿的料
「姚明，你架？」明麗問道
「唔係啦，係佢兩個架」
「唔該～」
「要唔要碗呀細佬？」原本這個面是供兩人吃的，所以上菜的時候會提供小碗子給客人
「只係要一個得啦」
「肚餓，食先啦我」
「咁大碗你兩個食唔食得哂架？」雖然雪兒食量不算小，可她看到這麼大碗的面，她還是嚇了一跳
「你講咩呀，啱啱夠攝牙罅架咋，輕鬆解決啦」餓久了的焌文已經在開動了，而男神也開始夾面給舒雯
「下，食咁多唔滯架？」
「食呢個先會有飽嘅感覺，食細碗嘅唔夠食。係啵土匪雞翼仲未到......」
「其實我想叫多個大白肉，不如share？」男神的胃口同樣的好
「睇唔出，你兩個原來係咁擦得」
「肚餓呀嘛！講起擦得，你睇下呢個？」焌文指着姚明，他面前放着三碗米線「呢啲先堅架嘛！」

「又係，等等先.......乜嘢咁攻鼻呀？hutchu~!」雪兒看了姚明那三碗麵後，就明白是怎樣一回事
碗中的湯，是紅到如血一般的顏色，辣度是特辣
「你食得到嘅咩？個湯紅到咁啵？」
「無事嘅，食開咁辣」姚明說得輕鬆，可眾人看到那和岩漿沒差的湯底，都不期然的吞口水，麻辣的味道直衝腦門
這樣都不夠，他還多加幾下辣醬，是要吃得多辣才行？

「隔住都聞到陣辣味，你真係幾勁咁啵」用紙巾掩着面的雪兒只用看的，就想像到那湯是有多辣
「勁咩呀，佢啲味蕾辣死哂啦，睇下佢平時食啲嘢幾濃味就知啦」舒雯說
「點叫佢都唔聽，遲啲胃炎就好笑啦」區長和姚明說了不少次，他還是繼續他的辣味人生
「無事嘅～」姚明還喝了幾口湯
「都咪話，佢食辣就等於......我哋飲水咁普通。如果叫我食哂碗面，睇怕我成晚都係廁所渡過」焌文腸胃受不了這麼辣的東西，有一次吃了大辣雞煲後回家，一次就拉了三小時，自此他就不敢吃太辣的東西了
「姚明，俾個湯嚟試下？」雪兒想試一下究竟那湯的味道，於是就用湯匙拿一點點來吃
「啱啱又話辣嘅，仲咩要試？」焌文道
「一口姐，又唔係飲哂」雪兒辣湯放到口中品嚐
「無事呀，甜甜哋咁，幾好啵」在喝下第一口的時候是這樣沒錯，可多喝一下的時候，她就辣得叫起來
「好辣呀～！」辣味從雪兒的喉嚨裡衝出來，而她的口腔亦充滿了辣的味道
「又話甜嘅你？係嚟味蕾死個個，係大小姐你啵」

雪兒沒有回應焌文的說話，辣得不能說話的她隨手拿起一杯飲料來解辣
「呀～舒服好多啦」
「杯嘢好唔好飲呀？」焌文問道
「味道唔錯，係唔知點解係苦咗少少」
「呃呢，即係呢.......」（同唔同佢講好？）
姚明旁的明麗看了剛才的畫面，變呆了
「仲咪吞吞吐吐咁呀？你平時唔係咁架」
(算把啦，照講啦)「當然舒服啦，你飲咗我杯凍央呀嘛」
「係咩？Sorry」雪兒將杯子放回焌文的前面「又幾好飲咁啵」
（搞咩呀佢？平時照計會噴出嚟，兼夾話我放得差）
「大土匪，邊位？」
「係，唔該」吃着雞翼的焌文，一直都想不到為何雪兒會喝他的飲料

「Daniel，我要勿演～」勾着男神手的舒雯，在用娃娃音跟他講話
「呢度，呀～」男神將勿演喂到舒雯的嘴巴裏
「Ummmm～！」紅着臉的舒雯勾得男神更緊了
「你哋使唔使咁快呀，係埋一齊幾多個鐘？咁快就喂對方食嘢」剛吃完面的焌文一抬起頭，就看到他們閃到不行，他有點吃不下去的感覺
「你顧下我哋啲單身佬嘅感受呀，睇到你哋咁，都唔知望邊好！」姚明作為母胎單身，他想是放閃的那個，而並非被閃盲的電燈泡.......不過，首先要有女朋友
「快啲習慣啦，而家先岩岩開始咋」大隻仔無視了放閃的二人，他決定專心吃飯
「咁係得一齊，就當然要親熱啲架嘛，你唔恨得咁多架啦」舒雯回應了姚明的話
「我的媽！有無理過我嘅感受！」姚明摀住臉，他不想被閃
「算吧啦，我唔信到你有女嘅時候，唔會放閃........分分鐘咁多個入面，你放得最勁」區長道
「可惜吖，到而家都無女喉佢。」舒雯在喝着男神的凍檸茶，她的話正中姚明的罩門
「總有一日會有個女仔中意佢嘅，差在幾時姐。我對你有信心嘅」男神看到姚明的灰樣，他想說些話讓他好過點
「唔好係腐女囉，如果係嘅，唔要都罷」
「仲係度咁多要求？中意你嘅女仔已經唔多架啦，再揀就無架啦」舒雯道，然而姚明什麼也不知道
「又唔好咁講，佢心地善良，會有女仔識欣賞嘅」男神看了下明麗
「都係男神好，邊似你哋班友一味係度睇小我！」姚明聽到男神的話後，信心開始回來「做人咁隨便，邊度有人俾面？」