有個混血妹同我講，話想同居: 對不起，讓你等得太久了

聖誕聯歡的前一晚 舒雯家
「呀～！究竟着邊件好呀！」舒雯將衣櫃的衣服都翻出來，而將衣物放滿了一整床的她，正煩惱着應要穿哪幾件
「呢件就係紅色嘅望落會sharp啲，而呢件呢就睇落會成熟啲......」
（難得男神搵我，如果着得柒就GG啦！）
「葉舒雯，咩事咁緊張呀........？嘩！打完仗嚟呀你？」一位剛剛洗完澡的長髮女生，正用毛巾擦頭髮
被舒雯房間的情況嚇壞了的女生，是大三歲舒雯的姊姊—舒茗（Shermaine）
「Errrrrr.......唔係呀，我係諗唔到着咩衫呀」
「你好少可咁架啵，有咩心事呀？同姐姐講睇下幫唔幫到妳？」舒茗從後抱着舒雯
「其實......其實係........」舒雯吞吞吐吐的，令舒茗更想知道誰人令她妹這麼緊張
「關男仔事架啦？」


「唔⋯⋯」
「係咪有男仔約你？」
「可以咁講......」
「乜個Mk文無搵你咩？平時都係兩個一齊返學架？」
「仲好講！佢啱啱同我講話，聽日只想同雪兒一齊，叫我自己一個返，仲話要同雪兒撐枱腳！」
「個衰仔，俾我見到佢就知死！咁如果唔係mk文，仲有邊個呀？」
「呃........咪咁啦，葉舒茗～」舒雯想起男神的容貌，不期然的笑了出來
「睇下你開心到呀！唔會係老豆做法國菜廚師，而自己就係做雜誌model嗰個Daniel丫嘛？」
「係呀，都唔知點解佢會單獨搵我一齊返學校......話說你又知係佢?」
「你成日都同我提起佢，點會唔知呀？仲有，你之前成日買佢做封面啲雜誌返嚟，尤其係佢做封面個啲.......」


「你睇到哂啦？」
「好啦好啦，你終於得咗啦。幾驚你無人侯.......」
「係追我個啲都唔岩咋。我唔想好似你咁，行得最耐都係行得半年」
「講埋啲衰嘢呀?葉舒雯～」舒茗將房門關上了，舒雯被她推倒在床上
「家姐呀～好痕呀～哈哈.....呀!」
「邊個叫你亂講野呀？」
「停呀，停呀～！」

過了一會兒後，舒雯將衣服粗略的撥開，兩姊妹就坐了在空了的位置上
「點好呀？我好緊張呀」


「有咩咁好緊張呀？咪都係男仔一個？」
「係啫，但係佢突然搵我，我點知點好呀」
「又唔見你平時對住啲高人咁驚青？係啵，佢都係其中一個高人啵」
「其他男仔就話無咩，但係而家係男神啵！我又無你哋咁大波.......」
事關葉家的女生，都有着不得了的好身材，就以舒茗為例，她有着的是34F的身段，那些堂姐甚麼的至少都會有個33E
每次家庭聚會，舒雯都恨不得找個洞埋了自己，因她是唯一沒好身材的一個，雖然其他親戚都無有多說甚麼
小學的時候，小舒雯看到其他的堂表姊都發育得不錯，深信自己可以成為她們的一份子，如此想着的舒雯充滿希望的等待着
可惜，到了現在她已經中五了，身材還是沒有多大的轉變........

另外，當舒雯舒茗一起外出的時候，通常只有舒茗被撘傘，在旁的舒雯都是被冷落的。看着桃花不斷的姊姊，她看破了紅塵
「可惜，個個男仔都只留意我嘅身材，無幾多個係有留意過我內在。老實講，呢啲唔係桃花運，係桃花劫」
「又唔好咁灰，你點都會搵到個會欣賞你內在嘅人，係差在幾耐後咁解。最緊要係你咪嫌人窮、唔夠靚仔，同埋悶少少就得啦～你知你架啦，對男仔要求多多咁，成日話追你啲仔有咩差咩唔掂咁。」
「估唔到我會俾你話，都唔知好嬲定好笑。講開又講，你啲競爭對手實力好強？」
「強都不足以形容，先唔講啲追佢嘅女仔，佢身邊啲親戚呀，都個個都有咁正得咁正，求其搵個都好過我呢啲普通料...」
「說話又唔可以咁講，話唔定佢都想搵個人，只係睇佢內在呢？」


「希望係咁啦」

聖誕聯歡當天 南記粥店
雪兒和焌文在南哥的粥店吃着早餐，今天的雪兒沒有因吃到好東西而高興，反而令她心情不佳的焌文吃得正開
「劉焌文，你老實同我講。」正在審問着焌文的雪兒，臉上一副快要發火的樣子
「講咩呀？」面對着雪兒的逼供，焌文只好強作鎮定。此時他內心緊張不已，抖結的他額頭正流起一滴滴的冷汗
「點解呢個月，你哋四個人會一次都出唔到嚟？唔係有咩大茶飯呀？」
「無咁嘅事，諗多咗啦你」焌文不敢正視雪兒，因某些原因，現在焌文處於有話說不得的情況
「咁點解次次都唔講得呀？問親你哋都唔答我嘅」雪兒不明白四人潛水的因由
「有嘢忙呀嘛」想着如何應對的焌文，大口的吃着艇仔粥。粥上還加了大堆的脆片，他喜歡脆片和粥撘配一起吃的口感
（點講好呀？講又死，唔講仲死！）
「有咩忙得過新聞社嘅職務呀？呀劉社長？又話唔係要做訪問........」
「真係唔講得住呀嘛，到時你咪知囉，總之，我哋唔係殺人放火啦」
「都唔知有咩咁神秘嘅要，你哋啲男仔真係.......」
沒話說的焌文只好喝一口豆漿，快要陣亡的他，幸好有南哥坐下了來，才暫時得救


（有救啦，南哥好波！）
「呀雪，咩事呀，嬲哂咁嘅你？」
「咪就係佢囉，約咗佢成個月啦，次次都話忙，問佢忙咩就講到一嚿嚿咁」雪兒指著焌文
「咩事呀，文仔？」
「南哥，我同你講件事先，幫我評下理啦！不過，唔可以俾大小姐知道」
「聽都未聽，點話得埋呀？」
「是咁的........我哋想..........係今.......」焌文在南哥耳邊悄悄話
「哦，原來係咁，繼續」
「所以........咪唔講得囉！我都好辛苦架！」

雪兒看着在悄悄話的二人，她感到氣上心頭
（仲咩話唔講得，但係又同南哥講？劉焌文......！）
「明哂！咁真係唔好講喇！」南哥聽完焌文解釋事情的原委後，和焌文持相同意見，二人更為此而擊掌
「點解嘅？南哥？無事不可對人言」雪兒還是不明白焌文守口如瓶的原因
「呢啲係兄弟間嘅秘密，女人唔明架啦。」南哥搖頭道


「咁我哋都係朋友啦」雪兒道
「咁係有啲分別嘅，兄弟係重要啲嘅」
「下，咁我係可有可無？」
「唔係咁嘅意思呀！而家我只係話文仔重義氣」面對雪兒的追問，南哥歎了口氣
「咁義氣即係點？對我就無義氣？」
「男性間嘅義氣，係無分對錯嘅。
為咗兄弟，男人可以上刀山落油鑊，只要兄弟一句，就會用盡任何方法幫手。」
「車，我同Sherman夠係姊妹啦」
「Errrrrrrrrr」兩個男人都不知如何解釋下去，他們都在努力的想着如何解釋＂義氣＂這回事
（佢仲未明咁啵，點算呀）
（無啦，睇怕無返三五七年都解釋唔到，我都唔知點先講得佢明）
「老公！唔夠腸粉啦！」在收銀台坐陣的南嫂道
「咁我入返去先啦，遲啲再傾！」南哥此時只能趕快回去廚房忙，雖則他還想談多一下下的
「bye～」南哥離開後，焌文繼續吃他的咸肉粽「好食～」



「話說點解你晨早流流，就食埋啲咁heavy嘅嘢？」
「唔食飽啲邊有力呀，如果唔係.......」
「食咁飽做乜呀？」雪兒雙眼咪成一線的看著焌文，是要他從實招來的意思
「話知我呀？咁八卦架你。食嘢啦」焌文只好將面轉向另一邊，面對雪兒的審問，他快要受不了
（男神呀，為咗幫你，忍得好辛苦呀我‼加油呀！千祈唔好辜負兄弟們嘅期望呀）

同時間 舒雯家樓下噴水池
（劉焌文，無論點都唔好俾Sherly知呀，之後點都得....）等待着舒雯的男神，心中祈盼着計劃可以順利進行
焦慮到一個點的他正不斷的按着手機，即使連一個短信或來電都沒有，他還是一直的按
按手機的同時，他不時的留意大廈門口出入的人，怕的是讓舒雯看到他緊張不已的樣子
等了幾分鐘後，他看到舒雯步出了大門，看到精心打扮的舒雯，男神的心快到跳出來了
「Daniel,等咗好耐啦？」看到站在噴水池的男神，舒雯小跳步的走上前
「唔係呀，我都係到咗無耐」二人就開始步行到附近巴士站
「話說，仲咩無啦啦搵我一齊返學呀？」
「無呀，見劉焌文掉低咗你去搵Sherly食早餐，咪嚟陪你囉」
（對唔住呀文少，要你食死貓......只怪我無膽）
「又係啵，佢平時都係同我一齊返學架，今日零零舍舍咁走咗去。問佢咩事，又話想同雪兒兩個人食早餐，仲話唔好阻住佢」
「係咩？佢無同我提過啵」男神此時還在裝作不知情，舒雯看不出兩兄弟是在說謊
「計我話，佢係想溝雪兒先真，如果唔係點會使開我吖？」
「睇你點睇啦.......又未必係咁嘅」

「乞嚏～！乞嚏！邊撚個講我壞話呀！又....乞嚏~」還在粥店的焌文，此時連續打了幾次乞嚏。
明明商場的冷氣還未有調很大，焌文卻突然感到一陣寒意，打完乞嚏的他還不斷的流着鼻水，紅髮少年忙著用紙巾將鼻子擦乾淨
（葉舒雯，估到係你講緊我壞話架啦！我知，掉低你係好衰嘅，不過當你得咗米，就唔會咁講）
「之唔係平時得罪人多咩？有人講你壞話好正常，你把口又衰到.......抵死呀，睇你會唔會再得罪人？」
「我咁辛苦，你仲落井下石？」
「邊個叫你唔講清楚發生咩事呀？」吃着焌文的咸肉粽的雪兒，沒有要同情焌文
「乞嚏！！！！」看來焌文的鼻子沒有要停下來的意思
**************
「珊姐，我哋落去先啦」焌文、男神、區長還有姚明站了起來
「加油呀你哋～」
「收到～！」四子用跑的離開課室
「Sherman，佢哋要做咩呀？」雪兒問道
「可能係要幫手啦，sing con都要人幫手嘅........」

此時，四子去的不是舉行比賽的禮堂，他們要先到新聞社取回他們的樂器
他們不隨身帶着樂器，是防止舒雯知道接下來要做的事，無法子之下只好這樣做了。
「點呀？Sherly問咗你啲咩呀？」男神很怕計劃會被雪兒踢爆，因此他之前拜託焌文不要透露任何蛛絲馬跡
「唔只問咁簡單，仲有好多嘢講」
「下，唔係下嘛！你真係無講啲咩俾佢知？」
「無呀，玩下你咋。睇下你個驚樣？」焌文看到男神驚慌的樣子「正確啲講，係大小姐不斷chok我，想知我哋成個月做咩潛水」
「玩還玩，咪呢啲時候玩啦。咁都好啲.......嚇得我」
「老細呀，俾佢知嘅，第一個死嘅咪係我？雯雯都會估到呢啲橋係我諗啦。」
「又係。話說，而家係咪得我一個咁緊張？」
「係呀」區長和姚明齊聲的對男神說
「又唔係第一次上sing con，有咩好緊張？」拿起了結他的區長道
「有我哋係度，放100個心啦你。你只要做好自己就得」姚明對男神展露了他的招牌笑容
男神看到支持他的兄弟，亦看到了友誼的可貴
「多謝你哋，因為我，搞到你哋成個月都俾人話.......」此時的男神，有想哭的感覺，眼淚已經快要出來了
「傻嘅，等你得咗先抱住佢喊啦，不過我信個大力妹會喊得仲勁.......」焌文安慰着男神

「多謝李飛雲同學嘅演出。好喇，跟住嘅係最後嘅演出單位」
「無錯呀，子傑。留得做壓軸嘅，相信都有返咁上下嘅人氣先係嘅」
「好，唔該。咁佢哋都準備好啦，大家就用熱烈的掌聲歡迎佢哋－Titans！」
此時台上的存幕緩緩的拉開，站立在台中間的是熟悉的四位少年。換上了藍色西裝的他們，流露出不一樣的氣質
「仲認為佢哋幾個唔參加sing con添」舒雯看着台上少年道
「好彩姚明打鼓咋！如果唔係就死得啦」雪兒想起了那次姚明叫歌的情況，她的心不禁離了一離
「又唔會嘅，通常都係劉焌文做主音」
「唔係啵，佢平時咁中意出風頭，都走咗去旁邊」
台上的少年有着不同的崗位：站在中間的男神是vocal、站在左邊的焌文是guitarist、在台右邊的區長就是彈bass的，而坐在最後就是鼓佬－姚明

「各位，俾啲歡呼聲我聽～」焌文向台下的觀眾們作互動，而他只要聽到歡呼聲就會更加的hyper
台下的同學們都做起人浪，從左到右的動起來
「非常好，多謝大家。今次呢…想借大家少少時間Dainel有嚟想講啵~」焌文向男神打了個眼色，示意他可以開始
「唔該文少。老實講我而家有少少緊張，我好少有咁緊張嘅，緊張嘅唔係要係度演出
而係因為我要當住大家面，對一個好重要嘅人講一啲嘢。希望大家可以俾少少時間我，去講跟住落嚟要講嘅說話」男神悄為深呼吸一下，才將說話講下去
「話說今日我哋要唱嘅歌，係＂倒帶＂，深信好多同學都loop咗唔少次。相信聽過嘅大家都知道，呢隻歌係講一個女仔等一個男仔等得太耐，而離開佢嘅獨白。
其實可以咁講，我就係個男主角。有一個女仔一路都對我好好，我都無認真看待到，而且仲要一次又一次咁傷佢。」
（唔似係佢會做嘅嘢，唔通係西米露.....?）
「其實我一路都知佢係等緊我，只不過係因為我細膽而無回應到，如事者佢一等就等咗三年。佢一路都等得非常的低調，係文少同我講我先知嘅
點解當初我會無表明心意？就係怕佢會拒絕我。當時嘅我，唔知佢諗咩，亦好怕講咗會無朋友做，於是就一路都無講到。
講下佢呀，佢最中意嘅歌手，就是蔡依林，亦是倒帶嘅原唱者。佢好中意聽佢嘅歌，亦好中意唱佢嘅歌，唱親K都會點返幾首歌咁。
Jolin咁多首歌人面，其他嘅都唱過無數次。唯獨有一首無唱過，就係倒帶」
台下的光洙他們都靜心的聽着男神的話，因他們都知道他用了多大的勇氣，才可以講出這番話
「佢唔唱嘅原因，相信係因為佢從未放棄等我，呢個唔知要佢多幾耐的人。就係而家，我要係度當住大家，俾一個答案佢。」
（唔係講緊我呀嘛？等等先，仲有其他女仔等咗佢咁耐
又或者係......佢同劉焌文打賭輸咗啫？）舒雯此刻心亂如麻，不能冷靜的聽下去
三年來，舒雯是多希望男神可以當她男友，可到現在要來真了，她卻不敢相信


「係架啦，除咗你仲有邊個呀？」看到舒雯如此的吃驚，在旁的雪兒就給她一個肯定的答案
「Errrrrrrrrrrrrrrr......唔L係掛，我.....我....我仲未準備好啵！」
「Sherman對唔住，你等得太耐喇。我，可以有寵你嘅機會嗎？」男神看着舒雯坐着的位置，清楚明白的問道
此時，5A班的同學們都看着舒雯
「你就好啦，杏壇男神中意你」舒雯旁邊的女生開始你一句我一句的說着
「原來佢中意個個係你，難怪佢成年都無女友啦！」明麗對舒雯說，她被現場氣氛感染到high起來
「點算好呀！雪兒～？」舒雯一時間不能了解情況，她向旁邊的雪兒求救
「去到咁喇，咪乖乖哋應承囉～」
「呀～！泳悠！救我！」舒雯本以為明麗會叫雪兒停口
「呢次我都救你唔到，你睇下光洙佢哋？」她和七高人玩久了，學起了他們那套
光洙他們聽到這話後，就站了起來。他們齊聲的喊起來
「應承佢！應承佢！應承佢！」光洙是當中喊得最用力的那個
焌文看到他們的行動後，就拿起咪一起喊「應承佢！應承佢！大家一齊嚟～！應承佢！」
台下的觀眾們，在氣氛的感染下，都開始站了起來，全場的人都一起為男神加油
「應承佢！應承佢！應承佢！應承佢！應承佢！」看到起哄的少年少女們，教師們都熱淚盈眶起來，Daisy和院長更加入歡呼行列
「平時佢唔會做埋啲outstanding嘅事架，咁主動嘅係得今次？」
「呢啲橋，一睇就知係劉焌文個衰仔諗出嚟。係得佢先會諗埋呢啲嘢。」Daisy說的時候，會心一笑起來
看到會心一笑的Daisy，焌文俏皮的向她伸一伸舌頭
「真係!服咗你呀.....」Daisy對站在台上的焌文道，而焌文就做出了「點呀？好得呢？」的口型
「青春呀.......係佢哋先會玩到咁大」看見現場熱血的學生，院長歎了一口氣

「仲等咩呀你，出去啦！」將結他除下的焌文從台上跑了下來，他是要將咪交給舒雯
「喂呀！咁多人，點講呀？」舒雯還在遲疑着
「It's an once in a life time opportunity，GO！ 」雪兒將思前想後的舒雯推了出去「What are you waiting for？」
「Errrrrrrrrr......」
「加油呀雯雯」明麗對舒雯微笑，那是一副要吃花生的樣子
「呢位同學，你嘅答案係？」焌文將咪放到舒雯面前「咋咋臨啦～個MC圈緊我喇！」
「呃....呃......我願意」舒雯小聲的說出她久久想說的話
「咩話？咁細聲嘅？平時唔係咁架你？」看到舒雯緊張的樣子，焌文就是想逗她一下
「我願意！」
「好啦，當事人應承咗啦，Daniel?」焌文聽到舒雯的答覆後，就跑回台上準備表演
「聽你唱歌就聽得多啦，今次就到我唱我返俾你聽啦。btw我係男仔，梗係唱返男版啦。我哋要唱嘅，係周傑倫嘅＂倒帶＂」
全場的學生都歡呼起來，氣氛再一次的提高
「男神！男神！」光洙大隻仔他們就為台上的男神打氣

「1n2n3n4n」姚明小聲的用鼓棍打起拍子來，打到四的時候，焌文就彈起了歌曲的前奏。
「呢個劉焌文搞咁多嘢，就係為咗呢個驚喜.......仲認為佢真係唔理我......」舒雯遠望着台上的少年們，她終於想到他們潛水一個月的原因
「衰人西米露真係呀，搞到我到喊埋」當事人未哭，旁邊的好姊妹已經在用紙巾擦眼淚
「你點會快喊過架？係都係我喊先啦好嗎？」

(我受夠了等待 你所謂的安排 到底多久多久才來
你總是要我乖 慢慢計劃將來 我想依賴卻妳都不在)男神柔柔的唱著，而台下的觀眾都揮起手來

台下看着男神的舒雯，忍了良久的舒雯這下終於哭起來了，等了這麼久終於有結果了
「好成功吖佢，全場嘅人都起哂哄」大隻仔對計劃成功，感到非常高興
「最勁嘅，係同時搞喊埋佢兩個」怕醜仔指向舒雯和雪兒
「都要男神肯咁至得架？你估佢咁隨便做咁難為情嘅事咩？」光洙道
舒雯想起了，之前她在男神背後等着他的日子。那時只能暗戀着的她，終於能等得到想要的幸福了