有個混血妹同我講，話想同居: 姨媽姑姐審問會

「媽，飲茶飲茶…祝您青春常註，一年靚過一年」焌文、雪兒，還有Daisy手上都拿着一小杯的茶
「呀姨，祝您工作順利，萬事如意」
「Auntie，祝您身體健康，仲有多謝您嘅照顧」
「又係呀，到咗呢個年紀真係要keep架！保養少咗，啲紋呀班呀就出哂嚟…
利利是是吓…文仔同雪兒就學業進步，呀珊就步步高陞…」翠婷接過了三人的茶後，他們就坐在翠婷對面
是的，又到了農曆新年的時候了
劉家的第一件事，就是派紅包
「文，下次可以沖濃啲……」

「文呀，幫我派利是俾你啲表弟妹吖，呢度齊數架啦」翠婷將一疊的紅包交給焌文，因工作之故，她未能到母親家拜年「雪兒第一次返嚟過年，記得照顧好人呀，知嘛？」


「就算你唔講，我都會……放心啦妳」
「喵～？」(搞乜呀你哋？)
「係啵，差啲唔記得。小冰你嘅…」翠婷從紙袋取出一件衣服，是一件中式的貓裝
「喵？」

「到咗喇…唔使緊張啵，大小姐」
「嫲嫲同叔叔都好nice架…」
(叮噹！)
「碰！」「哎呀，我唔係要你呀…」
「係咪珊妹佢哋？娟？」


「上！係嘅媽子…」翠娟離開了麻雀枱
「姨媽，恭喜發財」

「文仔，咁高啦你！細個嘅時候，我幫過你沖涼，你記唔記得呀？」
「陳沅珊，邊位呀佢？」焌文忘記她，只因一年都只會見那一兩次
「三姑婆，記住啦你」Daisy笑笑的面向三姑婆「係呀～！三姑婆！好耐無見」
「恭喜發財，身體健康吓」只附和兩句的焌文，想不到要跟她說甚麼
(咸豐年代嘅事，實記得啦)
順帶一提，焌文外婆家中排行第四，對上的兄姊都移民外國，而三姐則同樣居於香港



「軒仔，利利是是，祝你快高長大」
「多謝姑媽」
「仔，啲利是媽媽幫你keep住先吓。到你大個就俾返你」男生的母親連同剛才的紅包一同收起
(哎，唔好俾你呀媽呀。無回頭呀…
仲狼過啲寶藥黨，連自己仔都呃⋯)
「仔，你仲未做今日嘅練習」男童的母親從背包取出了一疊的補充練習
「媽咪，今日可唔可以停一日呀？」
「唔得呀，呢啲每日都要做，係咪想BCA肥佬呀？
第時升唔到去沙皇書院點算？係咪想做一世保安？」
「知道」
「小朋友仲細，咪俾佢抖吓囉。話哂都係新正頭，平時都辛苦…」
「啲細路邊度會辛苦架？佢只要跟住時間表做人就得
難為啲家長，辛苦嘅係家長至真！返工已經夠忙架啦，仲要送佢返放學，仲要同佢安排課外活動
到夜晚仲要等佢做完功課先瞓得」
(有無諗過個小朋友點諗架？你哂命就開心，個仔就傷心)


「唔～！有無人凳腳？」
「有！我嚟！仔，你好好哋做完佢下」交下一句話後，男生的母親就興高采烈的攻打四方城
「快啲做完佢，做完我就叫靚女姐姐就同你玩，好唔好？」見到鼓着腮的表弟，焌文就鼓勵他一下
「好，勾過手指尾就算架！」

「珊妹、文仔，利利是是…」
「多謝嫲嫲，祝您身體健康，龍馬精神。對唔住呀…之前返工忙，成日都無嚟到食飯…」
「睇下你？瘦哂咁，返工辛苦囉～唔緊要，最緊要有嫲嫲心」
「都係嫲嫲好～！」
「多謝婆婆！贏咗幾多錢呀你？」焌文對婆婆眨了一下眼
「唔多嘅，都夠飲餐茶咁話啦…」
「介紹返先，呢位係我婆婆。婆婆，呢位係雪兒…」
「婆婆你好…」
「你就係雪兒？呀婷提過你，估唔到真人仲靚過相吓…雪兒你嘅」外婆從袋中多拿一個紅包
「煲咗湯，陣間自己嚟吓…」


(呢位就係西米露嘅婆婆？)
「你哋坐住先，好快有得飲…」焌文去了廚房找姨媽「姨媽，今日有咩靚湯呀？」
「淮山杞子燉螺頭呀」