那些年，當香港仲係百鬼夜行既時代 II: 45. 運頭塘村XVI — 奇門遁甲

師父面色瞬間都變到一張白紙咁樣，佢肯定係都同我一樣，無估到有兩條路!豈料，更令人震驚既一事原來依家出現!Elaine係空地既另一端黑暗竟然又搵一條暗道! 「邊條先岩?」我地圍坐係空地中央，空氣中瀰漫住一股奇異又詭譎既感覺。我搖搖頭，表示無頭緒。師父擔天望地，唉，唔通望望下會多左個路牌出黎，寫住郭璞之墓由此路進咁咩?Elaine就乖乖地坐係我隔離，把玩手中既電筒，光束係墓中亂走，顯得成個墓更加弔詭。墓中長期密閉，空氣唔流通，再加上之前實在打得太激烈，依家一有啲時間坐下，就覺得有一襲倦意係唔知幾時湧上心頭，竟然就席地釣魚。係我就黎要訓著個時，個頭垂到落心口咁制，我忽然見到比Elaine發現既個度暗門上，好似刻左一個微微發光既字!頓時，幾乎湧到上腦既倦意立即一掃而空!我抱住又驚又奇既心態走近，但係一接近，又發現唔見左個隻字!雖然牆上係有啲凹凸不平既痕跡，但係我又唔識盲人摸字，點會摸到個隻字係咩黎!? 師父見我企係其中一條暗道中，呆呆傻傻咁，怕我有咩事，就走過黎拍我一下，「一，做咩事呀?」我將我既發現同師父由頭到尾，清清楚楚咁講左一次。師父以手一摸，面色驟變，彷彿就好似摸到棵仙人掌，拮到手咁。師父左手摸完，又用右手摸下，就好似摸完隻字會有唔同。 「乙!? 」師父忽然爆出一句。講完竟然唔理完全反應唔切既我，調轉頭就往另一條秘道進發。我閉上雙眼，再次用心去摸，咦!?又真係好似係個乙字喎!但係乙字又代表啲咩呢?唔通郭璞有種僻好，佢鍾意幫啲墓道編number，等後人易搵啲!? 「一，過黎。」係我胡思亂想既期間，睇黎師父已經推理出呢三條暗道之間既關係。「我摸過哂啦，暗道入口上邊分別寫住乙，丙，丁三個字，配上得一個出口，呢到既格局係一個奇門遁甲既格局黎。」奇門遁甲!?我心頭一驚。我係有聽過呢個詞，但係我對奇門遁甲既內容就完全無概念。我只係知道奇門遁甲係中國傳聞中最古老既書之一，除此之外，佢仲係為古傳三式 – 六壬，太乙，奇門之一，亦為道家五術中，山醫命相卜涉獵最深既學問，當年既諸葛亮，張良亦只係僅僅明白，未達到運用自用既化境。 師父見我同Elaine滿臉驚嚇加上滿頭問號，就極其簡略咁解釋左邊我聽。「奇門遁甲中有十天干，十二地支之分，當中十天干以甲乙丙丁去排列，甲為首，乙丙丁為三奇，其餘既叫做六儀。所有既奇門遁甲術皆由三奇而起，而三奇既象意亦有唔同既含意，例如乙奇象意代表皇后，」師父稍一停頓，用手指一指Elaine搵到既個條墓道，「丙奇象意代表將軍，宰相等，」說罷又指一指我發現既個條暗道，「而丁奇既象意，」師父眼神忽然由冷漠變得烔烔有神，目光如炬，「就係代表係古時比人敬若神明既相卜者。」