那些年，當香港仲係百鬼夜行既時代 II: 44. 運頭塘村XV — 兩條暗道

天色開始變黑，四周好似傳黎一啲烏鴉聲。長期無人打理既墓碑係微風中迄立，雖然話我成日都要面對呢啲環境，但係一股不寒而慄之感仍然從心底湧出黎。突然，我發現師父緊皺眉頭，用一種好奇怪既眼光望一望我地兩個又望一望個石棺。 我走近師父，不安地問:「做咩事呀師父? 」師父咁望我地，一定唔慌有好野。 「我諗緊好唔好比Elaine落黎，一個女仔之身，仲要岩岩經歷完離魂呢個過程，如果帶佢落去，又怕佢會比啲野鬼上身，但係放佢係呢個墓園到又…唉!」師父望一望隻錶，心中甚為焦急。照我估計，如果比福伯呢種煉屍高手快我地一步搵到郭璞條屍，佢一定立即當場將條屍煉成殭，到時我地一定首當其衝，做隻千年老殭訓醒既早餐，如果依家立即入墓，可以都有機機快佢一步，但係…如果Elaine真係係墓中比野鬼上左身，到其時，唔使等隻殭屍黎殺死我地，我地自己都會鬼打鬼，兩敗俱傷。再者，我地都無試過真係盜一個咁大既墓，雖然手頭上既裝備都幾充足，但係墓中變數太多，好難可以保證我地幾個人都能夠全身而退。 「唉，帶埋佢落去啦，我畫左幾道符，有咩事應該可以壓制到佢既。你準備孭走條掘土靈屍，萬一遇返條老屎忽，我地都可以用黎要脅佢。」師父開口，決定帶埋Elaine同行。正當我想阻止師父咁做時，佢已經叫上Elaine，準備入墓。「行啦Elaine!我地一齊落去，我斷唔能夠放你一個女仔留係呢個六陰之地到!」師父講完之後，隨即一馬當先鑽入石棺中。 我心中徒然升起一絲不安既感覺，但係又講唔出到底邊件事出錯。唉，算!船到橋頭自然直架啦!我走近石棺，發現石棺底部係咁唔知咩時候多左條深不見底既樓梯出黎，而同時，我見到師父拎住電筒，慢慢向樓梯深處進發。樓梯底仲不時有一道又一道既陰風吹出，吹到我心都寒埋，風聲係狹窄既甬道中迴盪，鳴鳴既回音就好似有人係深不見底既深淵中哭泣。我另轉頭，扶住Elaine，幫佢爬入有成人半身高既石棺中，同時亦好等佢會夾係我同師父之間，有咩事起上黎我地兩個可以保護到佢，又或者…我地可以分頭走。 樓梯每一級都十分窄，岩岩好就只有一隻成人腳掌闊，除左樓梯極窄之外，我地仲怕郭璞會係到設左啲咩機關黎防止盜墓者，所以我地每一步都行得好小心，走走停停，竟然行左成半個鐘先到底。 樓梯既盡頭係一塊小空地，牆身有一啲浮突有致既雕刻，但係除滿滿成個墓既雕刻之外，就搵唔到有任何明顯既路，那怕只係一個老鼠洞。「一，你逆時針摸，我順時針搵!」師父背住我，低吼一聲。我會意，立即從牆身開始摸。我摸得好仔細，基本上我觸手可及既地方都會摸過一次，有啲地方更加會拉下，推下佢，可惜都係無咩發現。但係突然間，我手中一沉，竟然比我係一條龍既雕刻上推出一度可容一個人低頭前進既暗道! 「有啦!」我同師父同時大叫起黎。咦?師父咁快知我搵到?我立即調轉頭，面色瞬間變得慘白!我竟然見到師父身邊都有一道一摸一樣既暗門!