那些年，當香港仲係百鬼夜行既時代 II: 46. 運頭塘村XVII — 破陣

師父既意思好明顯不過，相卜者，可以指古代時既國師，欽天監，江湖術士等人，係呢到就肯定就係指郭璞本人啦。「咁姐係話，我地從丁奇個條暗道入去就可以搵到郭璞既屍首啦?咁仲唔行!? 」一旁既Elaine都唔係蠢人，佢都知相卜者好顯就係講緊郭璞，當下即刻好心急，孭起袋準備要鑽入條暗道中。但係師父卻搖搖頭，嘆道: 「只破三奇係唔夠，三奇下仲有六儀，而十天干仲會配合十二地支，砌出六十花甲子。如果我地貿然入去，只會陷入無限既循環當中。我地只知丁奇係入口，但係丁奇條路既入邊應該會有六甲，六甲中邊個先岩，就要經過推算…唉，可惜你啲師叔唔係到，如果唔係此程應該好輕鬆。」師父中內容甚深，我聽得一楞一楞，久久都未能回過神黎，呢一刻，我腦海中只出現左兩個字黎總括師父呢段話，就係唔WORK。 黑暗中，三條一模一樣既暗道就好似怪獸既大口咁，行錯一步就會比佢當前菜咁食，唉，真係這麼近那麼遠，明明就係眼前，但係又唔知邊條先岩。我唔想揀錯呀今次，一錯真係連命仔都無埋，一諗起要活生生咁餓死，我當下就不由自主地打左個冷震。同時係黑暗中，我忽然見到好似有一雙眼閃住熒光，係遠處一動不動咁直瞪住我地。啊!其實仲有一個方法! 「丁卯，丁亥，丁酉，丁未，丁已…邊個先岩呢?」師父掐指而算，滿頭冷汗，雖然減少左幾個可能性，但係剩低既答案都唔少。 「啪嗒。」「啪嗒。」「啪嗒。」「啪嗒。」 聽到突然傳黎既怪聲，師父同Elaine都感到極度既詭異，一股深寒之感油然而生。一個空蕩蕩既墓何來會有啲咁既聲!? 師父面色驟變，久經歷練既佢一聽就知呢啲係殭屍跳躍，落地既聲音，立時一邊從衫袋中抽出符紙，一邊反手護住Elaine，低吼邊:「Elaine小心!有殭屍!一仔，你係邊!? 」 「搵我丫師父? 」我自福伯既掘土靈屍既後邊探出頭來，興奮地對住師父佢地揮手大叫:「師父!我控制到條屍丫!你話用佢黎幫我地搵得唔得丫拿!?」無錯，用得唔好哂，我既方法就係用比我地軟禁左既靈屍黎幫返我地一把!師父見狀，頓時失笑道: 「啊，你…」 「哼，福伯既趕屍術係祝由科演變出黎，我地中原道家又係師承祝由，有咩理由佢地做到既野我地會做唔到!? 」我揮舞手中符紙，輕聲笑著。雖然我口係咁講，但係其實事前我都唔係好有把握，我只係係一啲古藉上見過以道法操屍既方法，但係就從來都未實踐過。係將貼係掘土靈屍上既紫符撕落黎個一刻你都咪話唔驚! 不過好彩有驚無險，我臨時所畫既血符證實左係有用既，一貼上去個一下，我全身就好似觸電咁，腦海中空白左一陣，但係當我回過神黎，我就發現自己可以指揮靈屍! 我叫上師父同Elaine，跟住掘土靈屍開始出發。無左攝魂鈴同小銅鑼既引導，掘土靈屍好似活動起上黎都無咁靈活，我要好集中精神先叫到佢去定方位搵屍氣來源，唉，始終現學現賣既野係無人地專科咁厲害既。靈屍一蹦一跳，啊!果然係由丁門而入!我地緊緊跟隨住佢，慢慢步入條暗道。暗道既牆壁上刻左一堆既文字，不過不外乎都係甲乙丙丁戊個啲，有時配合上些少既中文隸書，話同奇門遁甲完全無關係都幾難令人相信。 穿過滿滿係字既暗道，我地又黎到一塊小空地，今次郭璞無同我地玩偵探遊戲，牆身有好多條明顯既墓道，不過條條都係一模一樣。我仔細一數，果然，正如師父所說一樣，足足有六條墓道!跟前既掘土靈屍諗都無諗，就「啪嗒。」「啪嗒。」地前進起黎，轉眼間，就消失左入去一條黑暗既墓道之中。 我吃力地轉頭望一望師父，征求師父既同意，話哂師父點都可信過一個死人。師父輕輕點頭道:「跟，按陽遁數法，此道應為丁未門。」我點點頭，趕快又跟返上靈屍既腳步，再次穿入一條墓道中。今次條墓道好窄，只能夠僅僅比靈屍通過，凹凸不平既牆身更刮到我全身損哂，只餘身體有衣服包住既地方不受牽連。為左要集中精神去控制條屍，呢一刻既我已經汗如雨下，腳步浮浮，漸有疲態，愈黎愈落後於隻靈屍。呢條墓道極長，我地行左成個幾字，都依然見唔到盡頭，而且，仲好似有落緊斜既感覺，我心中一驚，呢條路再咁行落去，會唔會直達陰曹地府架!?