那些年，當香港仲係百鬼夜行既時代 II: 41. 運頭塘村XII — 結界II
「姐係話，呢到根本無所謂既郭璞墓？頭先我地經歷既所有野都係假既？」Elaine瞇起雙眼，係滿地灰塵，鬼哭神嚎既墓中呆企。
「假既？唔會，人係結界中既活動係真既，只有地形係假。個墓係真真正正存在，只係個結構未必係蜘蛛墓咁解姐。」我將Elaine護係身後，細細聲解釋比佢知。「丫，唔係，虛中有實，實中有虛，地形上都唔假得哂，至少呢個棺就係呢個結界既基石，基石一破，結界就會應聲而倒，惡鬼就會完完全全被釋放出黎。」
平地上，石棺依舊搶眼，操兵聲亦愈黎愈大聲，眼前既顏色扭化至一團又一團令人心寒既黑色，間唔中有白影亂飛，整個場面就好似地獄一般。
忽然間，有一股殺氣顯現！凌厲既殺氣從天而降，就有如一把沾滿血既利刃，直取我天靈蓋！唉，日本仔，你生又害人，死又累街坊，何必呢！？
就係無形既刀鋒劈到黎既前一刻，我揮一揮手中一道黃色既符，輕聲道：「太上敕令，驅邪縛魅 ，冥界天道，金光速現! 」哼，封鬼符一出，豈有小鬼敢亂黎！？
符咒應聲閃起金光，將我成個人裹入光波中！豈料個股殺氣去勢雖阻，但鋒芒卻依然不減！可視光波比股殺氣壓得變形，正當我下意識想舉手去擋時，忽然，一道掌風後發先至，係我心口上輕輕一按！呢一掌力度唔重，我只係輕輕後退左幾步，就係因為呢一掌，我先有幸可以逃離呢把無形既刀。我見到，呢一掌係師父打出既，而佢另一隻手則拎住一道紫色既符，向空氣一貼！「啪！」 「封！」「嘎嘎嘎嘎嘎嘎嘎嘎嘎嘎嘎.....」然而，呢隻殭屍雖然唔係專司戰鬥既殭屍，但係戰鬥力依然不俗，竟然可以係同秒之間送左一掌比師父！
呢股原來殺氣唔係由結界中所放出黎既惡鬼所打出，而係由一隻面目全非，骨瘦如柴既殭屍擊出！好彩多得師父推走我，如果唔係...我輕摸一下項上既人頭，嘩，真係好彩。
而中符既殭屍則全身劇震，彷彿受到五雷轟頂一樣，圍繞住佢既一股屍氣漸漸被蒸發至空氣當中。我認得出，呢隻就係頭先攻擊我地既探屍。睇黎呢隻掘土靈屍可以算係徹底玩完，我門一直流傳落黎既鎮屍符絕對唔係省油既燈，無返一千幾百年既功力都難以擺脫此符。雖然殭屍被封，但係結界依然未破，場中悲鳴聲仍然不絕於耳，奶白色既身影到處亂沖亂撞。
「師父...」
「嘎…我無事，你快啲請鬼帝收魂破結界！」
「一方極樂，三界侍衛，五方鬼帝，九重天神，急鎮惡鬼，以吾之身為引，急迎北陰酆都中鬼帝!」
力量從手心既符咒一直傳送到全身各個部位，甚至連手臂既痛感都消失左啲。酆都中鬼帝壓場出現，一切冤鬼既鳴叫都開始靜落黎，睇黎更惡既鬼都係比不上一隻以鬼為食既神。眼前都景象慢慢開始回復正常，不過所謂既正常並唔係我地破結界前既影像，而一個無名墓碑滿地，雜草叢生既一個鬼地方。
到底我地又去左邊！？