那些年，當香港仲係百鬼夜行既時代 II: 40. 運頭塘村XI — 結界

我地三個好快又黎返只係得一副石棺既個塊空地。原本一直企係到既個隻爛身爛勢既殭屍已經唔見左，睇黎係比福伯帶走左，咁即係話，依家係一個三打三既局面。

「難搞。到底郭璞條屍會放係邊?係個墓到氹氹轉都唔係法子喎…」師父苦惱地拎出羅盤，但係毫不意外，羅盤上既針就好似痴左線咁亂咁轉。

蜘蛛墓一直都係以廣而淺見稱，但係一個生既蜘蛛墓又點會放屍?你話郭璞呢種術數大師又點會放自己條屍係一個有祕道貫穿既墓到比人偷?唯一既可能性就係…「師父，墓中墓!」

師父眨一眨眼。「有可能喎!但係…但係另一個墓既入口會係邊?」嗯?師父好似怪怪地咁既?平時好少會咁豬，乜都問架喎!唉，咁又難怪既，師父修既係山術，墓構學呢種近代科學應該好少接觸。

【山術，原為道家五術，山﹑醫﹑命﹑相﹑卜的其中一術，因為其修練帶有一定既危險性同難度，故此被專稱為五術之首。古時道家既符，上古祝由，同純正既湘西趕屍法都係山術既一種。傳聞中，郭璞就係一個精於五大術既高手，基本上，除左苗族既蠱術可以與其一鬥外，其他法術係佢面前都係死路一條。】





我心中細想，努力回憶返各條墓道既特色。又直又短既墓道唔可能會係通向真正既母墓室既，所以七中有二可以不理。又曲又彎又無陷阱既…有機會，七中有二可以留低。其餘既…唉，都有機會喎!點算好呢?

就當我苦惱緊邊條墓道先係時，我突然留意返空地上既個一口空棺。「師父，不如我地試下用土崩咒強行破壞口棺。雖然我訓入去時覺得個棺底好結實，但係我總係凝住個入口好有機會係個到。」始終寧寧丁丁咁一副棺材放係到，總係令人覺得渾身上下不安，就算唔係入口，破壞左佢先都無壞丫，可以令我心安啲。

師父微笑一下，「好，咁你地準備一下啲符啦!為師要親手破壞佢!」

我一聽到師父呢句不禁面都紅埋。唔係下話師父，你咁樣分明係落我面姐!我學左咁耐道法，會唔會連一個簡簡單單既土崩咒都用唔到呀!?

師父輕抽出一張紅色既符，我認得出，呢張係真紅火符。





「師父，土崩咒用黃土…」我正想開口提醒師父佢老人家拎錯符時，佢竟然唔理我，甚至開始唸起咒上黎。師父!你連口棺都未到喎!

「六陰之地，界之所限，安鬼容魂，徘徊不散，瓦解破碎，速成大道!碎!」

忽然間，真紅火符自燃起上黎，瞬間，遠處彷彿傳黎一陣又一陣鬼叫聲，又傳黎一啲操兵聲，更甚至傳黎一啲細微既人聲!唔單止，我眼前既景物竟然慢慢扭曲變形，有啲地方更加甚至有啲好似拼圖咁既碎片剝落緊!而空氣就慢慢變得新鮮起黎，無左墓中既個種焗到暈既感覺。

到底發生緊咩事呀!?我目光投向師父，希望可以得到一啲解答。

「第四股勢力，日本皇家第23軍。」師父緩緩吐出兩隻字。「呢到係運頭塘村，除左係日軍處理人頭既地方之外，亦係日軍第23軍全員聽到日軍投降後，剖腹自殺既地方。當中隨軍既日本術士就以陰陽術留低佢地既魂魄，等日本皇家軍再度重臨香港時，可以以鬼兵身份重新投入戰鬥。所以，呢個後山本身就係一個巨型既結界!」