那些年，當香港仲係百鬼夜行既時代 II: 42. 運頭塘村XIII — 重遇
「估唔到搞咁耐，我地先至黎到起點...」師父嘆息，輕輕搖頭，坐係地下打坐休息。「睇黎今仗唔易打。」
我跪低，將身邊一個得返下半截既墓碑上既塵土掃走。墓碑上我只係見到何家義公同埋墓碑主人既生卒年。睇黎呢到先係真係既何家村後山祖墳所在地。雖然呢到到處都係石造既墓碑，但係環顧當中，有一樣石造既野特別吸引到我既眼球—石棺。
「結界中可以所有野都假，人可以係幻象，戰鬥可以係虛構，地形可以係造假，但係唯獨有一樣野一定會係真。你只要搵到呢一野樣，就等同搵到出口，知道嗎？」我回憶返師父以前係教我破結界時既對話，嗯，的而且確，無論係結界中定係結界外，個石棺都係一模一樣。
「一，唔好強攻入去，你等我休息一陣先，福伯既掘土靈屍既然已經比我收左，佢好難比我地更快搵到棺材所在。」
「師父，其實你係幾時知個到有結界？點解你知個到有結界仲叫我去搵真正既郭璞墓所在？」
「其實我係祕道個時就知呢個墓唔係真既墓，係結界黎。蜘蛛墓係生墓，所以郭璞唔會係第一層落葬呢個推測好合情合理，但係如果我係郭璞，就一定唔會浪費左呢層既墓。」師父稍作一頓，換一換氣，再道：「墓中墓本身係用黎預防，拒擊入侵者，第一層既墓多數會有唔少既機關迷陣，絕對唔會空蕩蕩，得一堆墓道咁奇怪。呢個結界本身係由日本人所設，當然唔會係為左保護郭璞墓，而只係想保存實力，自然就無咩機關啦。成件事其實唔難推理出黎，亦可以話咁岩得咁橋，飛機撞紙鷂，我地只係誤闖左入日軍既結界中。」
我眨一眨眼，消化師父既說話。「唔係喎，咁一開頭攻擊我個隻殭屍又點計呀！？唔會都係幻象掛！」突然，我諗到一個極之不合情理既位。
「嗯...我估，我估姐下。呢隻野可能一早已經從石棺中走左出黎，一早已經存在係結界中覓食。」原來連師父都唔清楚箇中因由。「哦！？一，你感唔感受到？」
正當我奇怪緊我可以感受到啲咩個陣，忽然，天眼竟然自己開左！四周視野忽然暗左落黎，明明係夕陽如火既下午，係呢一刻，竟然變成左烏雲蓋月既黑夜！氣溫亦大跌十度，凍到我牙關打震！而四周墓碑竟然有唔同顏色既影子飄出黎，有啲好似透明，但係有啲就好實在，彷彿我可以同佢地直接接觸得到咁！佢地完全無理過我，慢慢向天空飄，甚至有啲穿過左我既身體！而師父就依然自我打坐，周圍既事好似完全唔關佢事咁。不過瞬間，我就知發生咩事。
「哦，呢班鬼其實係個班只係葬左係結界入邊既鬼黎？」
「嗯，咁多年黎，日本仔既結界令何家村既亡魂都唔能夠好好安息，今次因為你已經收走哂啲日本仔，佢地終於...」
「砰！」我身後忽然傳黎一聲巨響，監生打斷左師父既話柄。我回頭一望，發現Elaine竟然暈左係地下黎！
我扶起Elaine，想拍醒佢，先發現佢唔係真係完全暈左，眼係半開半張既狀態，雙眼只見眼白，同鬼上身情況好似！唔同頭先個場激戰令班冤鬼失去左理性，沖撞到佢，上左佢身！？然而係呢個時候，Elaine竟然開口:「阿一，你成長左啦...唔再係個個要比人保護住既溫室小花...」
呢句說話令我腦中一片空白。因為唔單止內容奇怪，Elaine竟然連把聲都變埋，變到好似以前救過我一命既阿雪咁！
「唉，一齊皆是緣，到底我係做好事定係做錯事呢?估唔到我一路以黎想阻止既事始終都係要發生。」師父仍然好似一尊佛像咁坐係到打坐，郁都唔郁。「你無估錯，佢係阿雪。」
「阿雪...?妳唔係已經去左輪迴咩？」我眼中既眼淚又開始係眼窩中打轉，想滴落黎。始終，我欠佢太多，我亦無辦法還比佢。
「係呀，本身我係用左五十年既修為黎換取一次轉生，只係你師父既藥，同埋鬼帝既力量，將我一早應該要忘記既記憶，格命重新係呢個女仔身上勾返出黎...」太好啦...原來阿雪仲係我身邊黎，佢未離開我！「不過，呢個係一個偶然黎...」
「姐係點呀！？姐係你都係要走呀！？」聽到阿雪既一句不過，我不禁激動起黎。因為不過呢個轉折語從黎都唔係一個報喜既詞語黎。
「你聽我講，呢次既輪迴係一次特別既例子，我其實係要一路寄生係佢身上，當佢真正死亡個時，我就可以伴隨佢既靈魂重新黎過。我係唔可以留係依家呢個狀態太耐架，因為咁樣會傷害到呢個女仔本身既元命...所以我今次真係要走啦...」
「唔好走，唔好走呀！鳴....我欠你一條命架！」我抱實Elaine，天真到以為咁樣，阿雪就可以留低。「師父！我重新再將阿雪連入公仔到得唔得呀！？就好似以前咁做，咁咪可以留住阿雪囉！」
「得。」師父既一句得就好似強心針咁，我立即企起身，準備搵材料。「不過...」又係不過...?「不過，阿雪同Elaine之間兩個只能活一個，你自己簡，諗清楚到底要留低邊個。」