那些年，當香港仲係百鬼夜行既時代 II: 39. 運頭塘村X — 不和

「Elaine! 」我大叫起上黎，甚至覺得腦充血，有啲暈暈地。 「呃…呃…」Elaine眼中噙滿淚水，睇佢好似想講野但係又出唔到聲咁。我趕緊將佢扶返上黎，等佢可以呼吸下新鮮空氣同稍作休息。但係佢都未坐好，未抖順條氣，已經急不及待開聲。「你地竟然無事!?明明…明明福伯已經變左節架喎…」 「你咁講係咩意思?姐係你話唔係你地錢家指使福伯殺死我地既!?」師父語帶震驚，睇黎我同佢都估錯左一啲野。 「如果…如果我地錢家要殺死你地，我就唔需要跟上黎啦!我地派兩個伙記出黎咪可以囉…一個女仔可以做到啲咩?」Elaine吞一吞口水，續道:「福伯係我地控屍堂既堂主，佢對屍有一份好特別既執迷，有特別八字既屍，生前有修練過既屍佢特別鐘意，仲曾經有幾次因為搶人條屍而搞到同亡者家屬請返黎既道士鬥法，係就係贏左，只不過搞壞埋我地公利既名聲。」Elaine稍作一頓，意味深長咁望一望我地，「唉，你地明啦，係呢個咁缺人用既時代，我地錢家無辦法唔繼續留住佢，就算佢係幾咁癲都好。今次我跟埋黎，其實就係想篏制住佢，等佢唔可以出手，搶走郭璞條屍…我地其實目的係為左副棺，而福伯就為左條屍…呢點我地好明白，本黎我老豆想親自出手，可惜…可惜你地竟然主動要求佢出手，如果由我同我老豆黎，成件事就唔會搞到複雜…」 「你點知佢已經向我地發難?同埋..你可以點篏住佢?」師父鍥而不捨咁追問，語氣中有一股令人屈服既威嚴。睇黎佢老人家唔完全信哂Elaine所講既野。 「頭先當我爬緊條祕道個時，忽然有一把女聲係我腦海中叫住你地兩師徒個名…仲話你地有危險!雖然我明知係幻覺，但係又唔知點解，我竟然真係相信左佢!」Elaine懊惱地捉住自己一把長髮，索性以手指當梳，梳起上黎。突然間，佢竟然猛力掹斷自己幾條頭髮! 「至於點阻止佢…就靠呢幾條頭髮啦!不過，呢樣係我既秘密武器，唔駛急住問，用得著個時你就知咩料。」 「嗯…不過…女聲? 」師父抬眉輕聲道。「唔通…?唉，一齊皆是緣，到底我係做好事定係做錯事呢?算啦，我地行啦。既然已經知道左福伯既野心，我地更加要阻止佢，免得郭璞屍首重見天日，到時唔將四大家既伏屍堂請出都難以平定! 」說罷，就第一個以身犯險鑽左入去僅能讓一人通過既祕道之中。我雖則比Elaine既個樣秘密武器搞到心癢癢，極之好奇，但係都無多問，跟住師父就爬入去。但係呢個時候，Elaine竟然抆住我衫尾=9px，用一對楚楚可憐既眼神望住我。 「我…我…我又要入返去啊? 」 「呃…嘿，乖啦乖啦…」 師父係前邊一直引路，間唔時又推開啲入口，睇下墓道到底有無路可走。可惜，連搵四條，四條都係幽暗非常，彎彎曲曲既路，如果貿貿然出去，我地隨時又會蕩失多一次路。「係呢條啦!」當搵到第五條墓道先，我地終於搵返我跌落黎個時既個條墓道，因為我一推開個墓道入口，就有一堆黑白色混雜既米跌落祕道之中!