那些年，當香港仲係百鬼夜行既時代 II: 31. 運頭塘村II – 萬人塚

一黎到運頭塘村既後山既感覺就係覺得呢到陰氣極重，兩邊膊頭都好似比一啲重野壓住，連抬起佢地都覺得好勉強。我仔細一望，頓然就知道事出有因，兼夾大事不妙!呢到既後山同其他山無咩大分別，都係好似披上左一件鮮綠色既披風咁，不過有唔同既，就係呢到幾乎係生滿槐樹。槐樹呢種樹本身就無咩問題既，但係絕對絕對唔可以種係墳墓旁邊。槐樹本身木字加個鬼字，一睇就知易聚鬼啦!葬係槐樹底既先人多數久久未能安息，如果係正常逝世既先人都還好，但係如果係自殺，他殺，客死異鄉，死無全屍等含住口冤屈氣而死既，好多時會屍身不腐，自然化成殭破土而出，禍害人間! 一旁既師父睇到眼都突埋，梗係啦大佬，你叫我地點相信一個識造墳落土既風水佬，竟然連呢啲少少既基本知識都無!?村長，你啲老祖宗同個風水佬有仇下話！？ 村長同福伯依然一路帶頭，一班村民跟係後邊，而我，Elaine同師父係落係最尾。師父望住左邊唉一聲，睄向右邊又唉一聲，瞪住前方又唉一聲!唉，呢條村到依家先鬧鬼，班村民咪算執返身彩囉! 無幾耐，我地就係一個比槐樹圍繞住既一塊空地停低左。福伯同村長互相握個手，鼠眉賊眼既老村長就收隊帶走班村民，循原路走左。睇黎村長同一班村民真係旨意哂我地。 福伯開始拆開一直背係膊頭上既靈屍，又一邊向我地招手，示意我地行近佢，同時亦不忘分配工作比個口：「你係咪確定係呢到？」 師父聞言，隨即點頭，輕聲道：「我好肯定係呢到，呢到有咁多既槐樹，格局雖然仲未比得上混然天成既九陰之地，但係已經合資格成為可以煉屍既六陰之地。只要有有心人稍作佈置，葬係呢到既屍絕對可以化成五行靈屍。嘿，如果配合埋你地既獨門煉屍手法，我真係唔敢想像到底可以出到啲咩。」 【煉屍，一睇字面就知要係將屍體煉化成殭既過程黎，同時呢個亦都係一門手藝。由最普通，係趕屍人都識既將屍煉成殭，到最神秘，要由專人去煉既天師屍，皇族屍，金甲銅屍等等，都可以叫做煉屍。每個地區都有其獨特既屍，湘西金甲銅屍刀槍不入，河北天師屍連符都制佢唔住，湖南既皇族屍擁有殭屍中最強既屍氣，屍見低頭，可以話係殭屍既剋星，而河東既屍陣則令各家伏屍堂頭痛。】 「呵呵，多謝宇文師父既讚賞。既然宇文師父都肯定左呢到就係郭璞既老巢，咁唔知你又介唔介意至少搵一條墓道入口，比我地兩個老野」講到呢到，福伯稍作停頓，用手指指一指自己，又點一點靈屍，「有條路可以入去？」 師父默默地從袋中拎出羅庚，開始辨方識位。師父既尋龍點穴功能到底有幾深呢？作為佢徒弟既我都唔知。因為上次定劉伯溫墓既係師叔們，師父基本上只係幫忙制服劉伯溫。 我地都屏息靜氣，靜立一旁。只見師父向前又行幾步，往右又跑幾下，甚至燒符。最後，經過一輪忙碌，師父終於停低左，可能太聚精匯神既關係，我見到師父竟然滿頭大汗，就好似做完運動咁。 「我…我...我定唔到位，呢到屍氣太重，無論係羅庚定係五行符，都引唔到路，呢到聚積既屍氣就好似有成千上萬既屍體葬左係到咁！」