那些年，當香港仲係百鬼夜行既時代 II: 30. 運頭塘村I – 後山山墳

【運頭塘村位處於大埔南區，以前係鄉村地方，依家就變成左一個睇落好似平平無奇既住宅區，但係其實係日佔時期，就曾經有唔少傳聞話日軍會將被斬首既受列人既頭運到黎呢到，集中埋葬…就係咁，唔少恐怖既傳聞就不逕而走。每到農曆七月，村民一定唔敢係夜晚十二點之後出門，因為佢地聲稱，十二點打後，運頭塘村就會變成群鬼亂舞既舞場，有推住木頭車收賣人頭既老鬼，周圍問人有冇見過佢個頭既中年人，同埋個頭可以360度亂轉既小鬼出沒…】 「啊啊啊，近期鬧鬼鬧得好猛既運頭塘村? 」福伯面露驚訝，換黎既，就只有師父輕描淡寫既一個嗯。 「呵呵呵，咁就方便啦。」福伯轉訝為樂，隨即踩油，車好快就絕塵而去。 路途上，我地都無咩交談。偶爾，我會眼角餘光偷望一下Elaine。個種似是故人來既感覺隨住我望佢一眼就更多一分。我想問佢到底係唔係係以前救過我一命既阿雪，即使過左咁多年，我間唔時發夢都會見到阿雪，身穿一套純白色既連身裙係我前跑。但係無論我點努力，點樣加速都好，我都未曾試過追上佢，佢就彷彿好似仙女一樣識得係空中到漫步。面前既Elaine雖然唔係著住白色衫，更加唔係著住連身裙，但係就比到一種好似阿雪咁既感覺我。然而，每當我鼓起勇氣探下佢口風時，腦海中卻總有另一個聲音提示我，叫我唔好問，免得嚇親人。 就係呢種焦急同虛無既心情既煎熬下，車子終於駛過一塊殘舊不堪，面頭用紅字寫住運頭塘村既牌子。一行人係村口落車，而同時亦有一大班人係村口急步趨近我地。唔會係村長派出黎既打手，唔比我地入村掛?我心入邊有啲驚起上黎，話哂我地黎係盜墓喎 ! 係九零年代，原住民係自己條村入邊係分分鐘惡過港英政府，殺人係無人知，所以我經常形容新界地方其實係「諸侯割據」，各成一股不容小覷既勢力。 「大師!你地終於到啦!」為首既一個老人聲若洪鐘，隔十幾個身位已經對住我地大叫。 「喔，大師?睇黎你地錢家為左入人地條村，鑿人地既山墳都落左唔少功夫喎。今次唔做偷雞摸狗之輩，轉行扮大師黎呃人地既信任?」師父冷冷望住迎面而黎既個批人，而語氣中則明顯帶有不屑同嘲諷既味道。 「嘿嘿嘿，唔好話呃!心中無鬼又豈會怕鬼呢? 」福伯咬住煙斗，答案極為含糊。隨即佢就掉低我地，欠身上前。「何村長! 」 福伯同村長少不免要互相寒暄幾句，而村長間唔中又望過黎打量下我地，繼而點頭微笑。唉，比福伯講兩講，村長肯定以為我地係一伙，不過算，為左陰陽全書，我忍!未幾，福伯就向我地打眼色，示意我地可以跟住佢入村，準備開工。 即使九十年代既香港一早已經發展起上黎，街道上早已經塞滿一架又一架BENZ，但係運頭塘村卻依然故我，到處都係只有三層高既小平房，屏風樓?唔好意思，呢到無。西裝友?唔好意思，呢到都無!所有既野都好似七八十年代既老香港咁，實在令人懷念。穿過一間又一間猶如積木既小屋後，我地終於黎到村後既後山，亦係運頭塘村祖宗山墳既所在地，同時據說亦都係日軍埋頭之地。