那些年，當香港仲係百鬼夜行既時代 II: 27. 訓棺材既人

「靈屍？」我知道呢個世界有好多秘屍係無書記載過，但係我真係唔敢相信香港呢塊小土地都可以出到一隻秘屍。 Elaine點點頭，繼續壓低聲音講：「我地錢家以前做咩我諗你知架...呢隻靈屍...係我地錢家唯一一隻用黎探墓既探屍黎。佢唔會害到人，車入邊個個司機係我二哥黎，識既野比我仲要多，仲要廣，所以唔洗擔心佢會有咩事。」 我正想再開口問時，我卻見到師父做出一個噤聲既手勢，阻止我再問。「阿一放心啦，Elaine既然都話無事咯，咁我地走啦，去拜會下錢老爺。」 一路無語，我地一行人都好快黎到公利。公利門面同一般棺材鋪無咩大分別，都係污污糟糟，外牆由白色染到變黑色，門口有幾盞係微風中輕曳既長明燈。而鋪內有一尊半個成年人身高既關公像，氣勢非凡，當然仲有不下廿，三十副既黑木棺材啦!但係店中最顯明既莫過於放係橫樑正中，寫住公利兩隻大字既呢個一塵不染既金漆招牌，呢個金漆招牌同木屑一地既大圍格局真係相映成趣。我抬頭暗嘆，睇黎主人家一定好緊張呢塊代表住佢地過去輝煌歲月既牌啦，唔係都會抹得咁乾淨...霸者橫瀾既筆鋒盡道當年氣勢，就算未曾聽過佢地事蹟既我，都感覺到當年既一股熱血！ 「呵呵！」蒼桑既笑聲忽然自我背後而起，打斷本身沉醉係空想中既我。我循聲音傳黎既地方冷冷一掃，竟然見到一個白髮蒼蒼，皮膚乾枯，瘦骨嶙峋既老翁憑空出現係我身邊！「你地黎係想買棺材呀？」老翁眼珠泛白，好似有白內障咁款。 「福伯！」正當我唔知應該點樣應對，由邊到講起時，Elaine突然怒氣沖沖咁搶係我身前，比我先開聲！「你又黎啦！你又訓棺材!?我咪叫左你唔好訓係棺材入邊囉！入邊有床你又唔訓！」 訓棺材...？當下我下意識望一望我附近既一層又一層，推積如山，好似超市入邊既貨品咁既棺材陣。果然，有一副放係我身後，近路邊既一副棺材係打開左蓋，入邊仲有枕頭，有被，儼如一張床一樣...只係不過呢張床唔應該係比生人訓...而應該係比死人訓...我偷望左一下仲比Elaine責備緊既個阿伯。個個阿伯只係一味嘿嘿嘿咁陰笑，我留意到，佢啲手腳有啲好奇怪既青紫色瘀黑.... 既然連我都留意到，咁當然師父都睇到啲端倪，輕步踏貼前輕聲係我耳邊講：「呢個老人家應該長年係墓穴進出，吸入過多既屍氣，你睇，佢啲手腳上邊都開始出現紫黑色既屍斑...」我恍然大悟，岩既！錢家本身就係倒斗世家，佢地既人識盜墓，長期同墓中殭屍打交道都唔出奇丫！但係…我就真係從來都未見過出屍斑既人仲可生勾勾咁企係我面前，就好似一個活人咁… 「唉！真係無你修！一哥，宇文叔叔，唔好意思，福伯成日都係咁，如果有嚇親你地我代佢同你地講聲對唔住！」 「哦，無事無事，老人家身經百戰，訓一下棺材其實無咩大不了姐，Elaine你咪由佢囉。」師父對Elaine單一單眼，示意我地兩個都明白係點既一回事。「嘿，錢老爺呢? 」 「福伯，避一避席。」師父語音剛落，就忽然有一個高大既身影從鋪後不急不緩咁行出來，伴隨而出既仲有皮鞋敲地既咯咯聲，同埋西裝互相摩擦既沙沙聲。 「宇文兄，好耐無見。」