那些年，當香港仲係百鬼夜行既時代 II: 26. 靈車靈屍

我大驚！當下馬上停低腳步，忘記左要跟師父繼續行。眼見靈車狹住一股寒氣逼人既陰氣徐徐開走，遠離我地，但係靈車司機竟然好似渾然唔覺有隻未知係人係鬼既物體係車咁，我就知道今次一定會出事啦！係呢塊陰地中破土而出既妖怪豈為普通人所能應付！？  我腦中馬上閃過一個字：追！我抬起腳，馬上開跑！我聽到師父氣急敗壞咁叫追住我，口中仲不停叫住我唔好追。但係唔通要我眼白白咁睇住個靈車司機當災！？無可能！我咬緊牙關，雙腳邁得更大，更快，更密！靈車從老龍坑街慢慢轉出寶其利街，每經過一間紙紮鋪，企係門口既個啲鼓漲既公仔就好似比人吸乾靈氣咁，慢慢扁左落去，到最後變成白紙咁薄...見到此狀，我都不其然打左個冷震。靈車終於完全消失係老龍坑街既盡頭，須臾間就轉左入必嘉街。見狀，我跑得更快，甚至比我以前所有跑步比賽中既速度仲要快！！  當我右腳踏入必嘉街時，突然有一個人影閃入我既眼簾！「啪！」一聲巨響，我同人影都雙雙倒地。我摸住後腦勺，艱難地想爬起身繼續追時，一聲嬌喘聲就霎時間傳入我耳中。我定睛一望！唉，真係咁岩得咁橋，飛機撞紙鷂！原來我撞到既正係弱質纖纖既Elaine!我當下拿拿臨企返好，伸手打算扶返起佢。而佢都好自然咁拖住我隻手。  「一哥做咩咁心急？公利唔係呢邊喎...」佢狼狽地企返好，原本抱係懷中既書跌到一地都係，但係我無時間同佢解釋，因為遠處靈車已經停完紅燈準備又要再次發動，要再踏上不歸路！  「找知唔係呢邊...哎！架車入邊唔知有啲咩，好唔妥，總之你帶左師父過去先！我要去截住架靈車！」我抬手指住架車拔腳又起跑。  「等陣！架車係我地錢家，唔會有問題架！」Elaine聽完，立時手中運力，一手扯住我，佢呢股唔知係邊黎怪力，竟然硬生生咁將我拉停！  我停止掙扎，慢慢轉頭冷冷地開口：「咁架車入邊個隻咩黎？點解怨氣會咁重？」  Elaine四處張望，確保附近無人，先壓低聲音同我地講：「佢係我地家族入邊現存唯一一隻既靈屍黎！」  【殭屍為四等，最為平常，怕陽光，只能係黑夜狠下殺手，亂咬人既為四等。身體有唔同既顏色既，稍怕陽光，但係唔會比陽光殺死既為三等，劉伯溫既五行屍為當中既佼佼者。黑白兇者為二等。旱魃為頂級者。當然，其實係歷史上出現過既殭屍又點會得咁少？只係係現存既殭屍札記中，有記載者為此四等。仲有跳屍，靈屍，王者屍等等湘西，河北，湖南，河東四大屍家先識製成既屍係無記載到既。】