那些年，當香港仲係百鬼夜行既時代 II: 28.講數

聲音中帶住一股令人感到極大壓迫感既力量，佢一出聲，我就覺得好似抖唔到氣咁！正當環境極其寧靜既時候，忽然，一張極醜既老人臉龐從黑暗中露出。師父緊張地趨前，與來人握手。
 「錢老爺，我地又見面啦。」 「嘿，客套話唔好多講啦，無事不登三寶殿，即管講下咩事，睇下我有咩可以幫到下手。」老人隨意地擺一擺手，豪氣萬千既語氣就彷彿好似即使師父話要邊個邊個既人頭，佢都可以即刻拎出黎咁款。 「果然快人快語！其實我地今次造訪，係想借出你地錢家既陰陽全書去救命！」既然人地都無意同師父寒暄，師父亦唔同佢兜圈，直接了當咁向佢地討書。 陰陽全書四字一出，錢老爺當堂面色驟變，明眼人一眼得就得出，呢部書，借不得。果然，佢承接住師父既說話，當下就開口：「唔得！當年呢部書係我地犧牲左錢家十九條人命，三隻皇帝屍先可以得返黎，入邊既袐籍豈容其他唔關事既人查閱！？」 「開個價啦錢老爺。將本野既來龍去脈講得咁詳盡，無非都係想要啲回報姐！」我冷笑一聲，一下踢爆佢既陰謀。講得幾重要幾重要，到有人出價咪一樣會割愛！你隻老狐狸多多野講都係想推高個價姐！ 「哈哈！快人快語！宇文兄，你個徒弟處事待人既敏銳度比你當年高唔少喎！」一聽到有錢收，隻老狐狸當堂露出佢既尾巴，態度180度大轉變，笑到見牙唔見眼。「錢呢，我地就大把！只係我想借宇文兄既手，幫我係古墓入邊拎少少野出黎，事成後，書自然會原本捧上，唔會走你地數。」 師父聽到之後，臉色突然變得陰沉，我完全估唔到師父係呢一刻到底諗緊啲咩。「要偷啲咩？」 「控屍派既開山師袓，郭璞既玉棺材！」 我一聽，心中突然好似停頓左一下咁！郭璞貴為一代術數大師同趕屍能手，自然佢個墓一定危機四伏，有命入去都無命出黎。但係我知道，師父為左我同雨瑤，佢一定會答應去趕呢一次既混水！ 「師...」「得！不過我希望錢老爺可以借出一啲野比我，唔係我一定唔會去！」 「哦，即管講黎聽下係咩野？？」 「你地既靈屍，」師父稍作停頓，目光漂移到棺材鋪中既一個黑暗角落。「同埋你地既老將福伯！」