那些年，當香港仲係百鬼夜行既時代 II: 25. 老龍坑街II – 陰地

【老龍坑街，位處於九龍紅磡老區，舊樓林立，當時起既時候因應舊啟德機場既航班升降關係，所以個到清一色都係十層樓以下既唐樓黎。不過，條街為人所知既原因係因為呢條聽落普通既街道，其鋪頭竟然清一色都係賣棺材壽衣紙紮品。所以係老一輩既街坊口中，呢條街多數被稱之為棺材街，好聽啲既話就叫殯儀街。而云云殯儀鋪頭當中，最多人幫襯既就一定要數上公利，亦姐係錢家既總店。表面上公利既服務平靚正，但係當中有冇牽涉到鬼神之說呢，咁就不得而知了。】 旺角有專賣波鞋既波鞋街，亦有專賣金魚既金魚街，紅磡當然都不遑多讓，都學旺角咁，整返條專賣死人野既棺材街。夜晚七點，我同師父企係呢條專做死人生意既老龍坑街，雖然感覺唔到有風吹埋黎，但係唔知點解都感覺到一股打從心底既寒籠罩住全身，手凍腳凍，甚至有種比無數咁多對眼從後監視咁既感覺，令人不寒而慄。 「行啦阿一。」師父無再好似以前咁拖住我隻手，帶住我行，而係輕拍一下我既膊頭，隨後就頭也不回咁行入陰氣甚重既老龍坑街。望住師父堅定既背影，我心中不由得嘆一口氣。唉，時代變啦，師父老啦，我真係要學識堅強啦，唔單止要保護雨瑤，仲要保護埋師父… 緊接落黎，歡迎我地兩個既，係一堆維妙維肖既男女紙紮人。係昏黃既街燈同埋一盞又一盞寫住喪家姓名既長明燈照射下，更令佢地徒添幾分弔詭，呢堆紙紥人彷彿就好似係活人一般，隨時會怪叫衝出黎…遠處傳黎殯儀館中道士破地獄既喃嘸聲同埋嗩吶聲，將街上既氣氛推向一個更為怪異的地步，嚇得我甚至唔敢直視佢地一雙空洞無神既雙眼，只係快步經過就算。唉，除非我直接跑去公利既姐，唔係的話，間間鋪頭都放幾個呢啲公仔係門口，我又點能夠避過呢!? 而堆疊係附近既棺材亦都週不時會發出一啲好奇怪，不急不緩既咯咯聲…啲聲就好似有個活人係入邊，不停敲打棺材，要出邊既人放佢地走咁…但係坐係門口吹水既阿叔就好似完全聽唔到呢啲唔屬於人間既聲音咁…依然棺材有棺材響，佢地有佢地自己吹水食煙。係佢地已經習以為常丫..定係呢到既陰氣太重，令我產生幻聽…?面對種種怪異既事，即使我識道法都無用，因為我知，呢啲既感覺根本唔係有鬼影響到我，而係積聚已久既陰氣使然，咁試問，道法又可以點幫到我!?我依家唯一一個目標，就係盡快行到去公利!!至少，有多人氣既地方，可以令我感覺到比較安全。 但係可惜，往往天意弄人，人想既事，天永遠唔會比佢輕易發生。就係我地一路行既時候，我忽然離遠見到殯儀館岩岩完左一場法事，殯儀館既員工抬左個屍箱出黎，準備要將屍體運上靈車，睇黎係要即晚送去火化。一般殯儀館人員處理屍體都唔會係趕係夜晚黎搞，除左怕會煩到已經好攰既家屬外，其實佢地心入邊都好驚會有咩靈異事情發生。但係即使係咁，佢地依家仍然要係夜晚運屍，咁可想言之，依家上緊車既呢位先人既身份係幾咁特殊。轟隆一聲，靈車司機徐徐加油，冷冰冰既老舊藍色靈車搖搖晃晃咁向住我地迎面而黎，車頭無相，只有李家出殯四字大隻。按慣例，夜晚出殯既先人都係唔會放相係車頭，無他既，費時嚇親其他道路使用者丫嘛。 靈車好快駛近我既身邊，但係就係呢刻，我忽然見到，放置屍箱既後車廂，竟然有個雙頰紅粉，但係額角慘白，雙眼無神，頭髮蓬鬆，身穿類似壽衣既紅白衣褲既人，趴係窗戶，向路人慢慢揮手!!