那些年，當香港仲係百鬼夜行既時代 II: 16. 高街鬼屋X –幻象?

身陷係靈牢中既眾妖唔單止只係力量被大幅削弱，其中實力稍遜者更加係動彈不得，任由我地魚肉。但係係呢個關鍵時刻，八家將竟然無聽從我既命令上前進攻，竟然係反而企係原地紋風不動，就好似一尊泥雕咁。
 
「上前呀！就只有這個時機才可以把他們一網打盡啊！」我激動到指手畫腳， 不停比劃前邊個琟鬼，因為我感覺到，我既靈牢已經開始有人從外反制，過多幾分鐘，來人就可以劫走牢中所有既鬼，無左靈牢，就好似青山走犯咁，佢地一定會大肆破壞，得我地區區九個人又點可能捉得返哂呢班痴線佬！？
 
我再一次開口，「欸！？沖三小啦！？快上！！！」哎，心急得濟用左台語添，語畢同時，我自己都抽出一張符紙，點一點地上既大陣符咒既餘火，符紙開始變紅變熱。「流火箭，飄火雨，轟火隕，火之絕者，無形無體！爆！」
我甩出手中個張燒到得返一半既符，連隨喊出一串法語。
 
符咒流焰四射，有能力避開既，當然就可以倖免於難啦，不過唔少雙腳釘死左係地板上邊既鬼無處可逃，自然就比靈火痴上，唔使幾耐，火種更猛然爆炸，將隻鬼轟得肢離破碎！見我已經率先發難，八家將終於都肯跟上黎，各將揮動手中既武器，衝鋒陷陣，每經過一隻鬼既身邊，隻鬼就一定會少咁身體某啲部位。頃刻間，鬼屋就變返一間普通既屋，因為啲鬼死既死，走既走，基本上除左少數一啲法力本身較高強既鬼，例如天狗，姑獲，雪女等走得甩外，百鬼陣可以話係完全瓦解。咁你話啦，無鬼既屋試又點可以叫鬼屋呢！？
 
我地係咪贏左啦？一堆又一堆七彩顏色既鬼火係我眼前亂跳，就好似一隻臨死前既老虎向我地作出最後一次軟弱無力既反撲咁，我張口一吹，就將個火吹散左。嗯...似係喎...但係日本傳承落黎既百鬼陣點解會咁雞既？咁易比毫無默契既我地擊敗！？




 
我踏出八家將既包圍圈。靈牢依舊死死地依附係屋中既牆身，天花，地板上。顏色一樣都係咁鮮豔奪目。一樣咁鮮豔奪目...!?我心中一驚。靈牢照例應該係鬼氣消失後，一併都會消失架喎！弊！
 
「小心呀！」我轉身提醒係我後邊既一眾八家將。雖然屋中無燈無剩，但係要我黑暗中搵返呢個八家個大男人又唔會難到我既。然而，佢地八個人的而且確係唔見左。無腳步聲，無呼吸聲，就咁就憑空消失左！