那些年，當香港仲係百鬼夜行既時代 II: 15. 高街鬼屋IX – 百鬼靈牢
咒言一起，我見到百鬼都開始萌生退意，反倒係外圍守候多時既野鬼既瘋狂起黎，不斷向八家將既人肉長城直奔而黎。為首既刑具爺唔單止毫無怯意，反而舞起掛係身上既三十六種刑具，呢啲刑具係碰撞時會發出一啲極其刺耳既聲音，聲音係一個如此密閉既空間中迴繞不斷，猶如魔音般穿透入去各鬼既腦中!一啲法力較弱，怨氣較少既鬼當場就被魔音震得灰飛煙滅，而其他有能力者都少不免被震得企係原地，一時之間都唔能夠移動。而負責刑罰既後四季家將見機立即上前，將其伏法。傾刻間，野鬼死去一大半，睇黎今次附近居民都可以慳返筆，唔使再鎮住佢地啦。
由此事可見，百鬼係有人控制既。呢個人知道百鬼貿然同刑具爺既魔音起正面衝突輸硬，所以唯有先行撤離佢地出戰場，反而其他既鬼仔，因為下意識覺得有人威脅到佢地，自然就會反擊，下場就當然係煙消雲散。哼，我先殺退你既手下，再揪你出黎毒打一身!
其實由開戰，到完結，都只不過係過過左區區十秒鐘。但係呢個過程對於未見過八家將伏妖既我都算幾震撼，時間仲好似過得特別慢咁。魔音停，咒音停。但係另一種聲音又再度竄起!個種聲好複雜，又有物體比火燒緊既啪啪聲，又有海水拍岸既沙沙聲，又有刀劍相撞既鏗鏗聲…地上既紅火符開始自燃起上黎，一開始只係一個小小既火苗，但之後愈燒愈烈，到最後甚至將釘住符紙既棺木釘都一併燒埋!而當符上既火開始暗淡落黎時，地上既黑色毛筆字跡同時開始變紅，慢慢重現出我剛才所寫既符!
呢招係道家符術中既轉移。由符咒轉移到一件物體上係小轉移，基本上用符收妖都一定會用得上。但係今次呢招轉移係轉移中比較高境界既匯聚，得名係因為佢係由幾道符轉移力量去另一道更大既符上!當然，平時係無咩可能用得著，個原因都係因為所需時間太耐同埋無可能事先預備好。
係佢開始轉移既個一刻，我係十分之緊張既。因為如果轉移失敗，無辦法將佢定係某一樣物件身上作媒介使用，其力量就會胡亂轟出，咁企係符上既我地自然會首當其衝，當場比壓縮後既力量當場轟斃。但係好彩，我擔心既野都無發生，大符如常地開始慢慢向四周伸廷，佢地就好似有生命咁，有啲爬左上牆，有啲勾起天花板，有啲就附係地板…
「哼，我唔理你係邊個，你最好快啲出黎啦。我諗你都知你啲鬼係無可能踏出到呢陣既半步。」我冷笑一聲，向周圍朗聲講。
呢個陣係道家中十二大陣既其中一陣，名為五行大陣，亦有另一個名叫靈牢。各色其式既陣中，以佢係以困鬼而著名。任何鬼入到陣，都好難全身而退，就好似入左一個監獄咁，守門人唔比你走，你就一世都要係入邊苟且偷生。
百鬼無郁，我地都企係原地靜觀其變。我地互相對恃，暫時雙方一日未出手，都未知到底我個靈牢強定係百鬼陣既威力高。我額上開始流汗。要保持住呢個牢所用既法力並唔少野，如果再係咁落去，我怕我頂唔住。我咬一咬牙，下定決心，既然係咁，我就先出手，比啲顏色你條老妖怪睇!
「家將們領命!場中者殺無郝!」