那些年，當香港仲係百鬼夜行既時代 II: 17. 高街鬼屋XI–邪結界

我呆望住空無一人既空間，陪伴既就只有極少量既鬼火，同埋靈牢久久未退既顏色。點解佢地八家會唔見左既!?我心中一大堆既問號，一大堆既問題不停係腦海中跳出黎。
 
我輕摸牆上既靈牢咒，想嘗試搵出答案。但係我得到既，就只有冷冰冰既感覺，毫無生氣。「唉，到底點解呢?」
 
「係囉，點解呢?」我個呢字音一落，一道聲音就承接左我既尾音，自我背後響起，令我嚇左一跳!
 
我轉過面黎，只見到一個人係黑暗中走出黎。無聲無息，無影無蹤，就好似鬼一樣。但係我知道，呢個人唔係鬼黎，佢係阿明!!
阿明呢刻彷彿好似變左另一個人咁，脫左原本架係肥面上既笨重眼鏡，仲除低左件OVERSIZE既上衣，換左件緊身既白袍，而下身，佢就換左一條純白色既長褲，頭頂就戴住一頂黑色既高帽，根本完完全全就係一個日本陰陽師既形象。
 
佢一邊磨擦住自己雙手，一邊向我迎過黎。所以話，有時啲野你真係唔可以以貌取人，真係估唔到一個戴住副大眼鏡既肥仔竟然有一日可以將我逼入一條絕路入邊，就好似你都唔會估到以前坐你隔離既哨牙珍，他朝有日竟然變到丘淑貞咁正。




 
「點呀，我呢個結界你點睇呀?」阿明咀角上揚，盡顯其得意之情。
 
結界!我當堂打左個突!我明啦!難怪頭先一直想破我靈牢既個股邪氣會忽然消失，原來佢放棄同我正面交鋒，反而用結界將我地反封死係佢既世界入邊!換言之，我既靈牢只係佢既世界入邊施展出黎，所有既戰鬥其實都係係呢個人既預料之內，更甚至係佢特登比機會我地咁做!
哼，咁我都明點解八家將都會消失埋啦。其實一早阿明就已經用結界，將我同八家將硬生生咁分開左，結界一成形時，就係我同八家將分開之時!
「百鬼夜行你估就係咁簡單?大日本帝國既陰陽術會比你地道家比落去!?唔好笑大人個口啦!! 」阿明瘋狂地大笑起上黎，笑聲極度刺耳，就好似有人強行用手指甲刮木板時咁所發出既嘰嘰聲。而佢可以咁得戚咁笑，其實都係有佢原因既。
結界係起源於中國佛教，原本本意係用黎保護人，令結界中既人免受惡鬼傷害，但及後傳到去日本，就被改良為可傷害人既邪物。去到近年，識佈出正統結界既人已經少之又少，除左幾位係中國有名既高僧之外，呢個世界可以話係無乜邊幾個識。但係異類結界呢，日本就有好多陰陽師都識佈。阿明所用既呢類結界呢，就係邪結界入邊中既意識界。意識界顧名思義，就係可以暫時控制結界中入邊既人既意識，令佢地見到結界師想佢地見到既野，控制幾耐，就要睇個結界師既修為同埋被控制既人數啦。
我暗中結好手印，等待阿明進一步既行動。等阿明停左笑聲，又再過左相對恃既一陣，阿明終於都按捺唔住，開口道:「喂師兄，你呃我喎。呢到根本就無咩鬼阿伯，你害我捕左咁耐，你點補償先?丫，不如咁，你先放低你兩隻眼珠，當還住啲先啦? 」
 
眼珠?我心諗，咩眼珠呀?但係好快我就知咩事!只見眼前頓時一黑，兩隻細長而尖銳既怪手從我身後繞出，想直插入我既眼窩中!