那些年，當香港仲係百鬼夜行既時代 II: 14. 高街鬼屋VIII – 真魂上場

當請到鐘馗天師真魂入體時，我既感覺就好似比隻大手用莫大既力量捏住，有幾秒鐘，我覺得自己好似抖唔到氣咁，肋骨就快比人壓碎。係之後既一段小時間，等身體適應左呢股來歷不明既神力後，我就開始慢慢變返正常，但係成個人都仲係有啲暈，就好似坐完海洋公園既過山車咁。
 
當我仍然感到天逐地轉，嘔心眩目時，想搵啲野扶下時，突然呼一聲!一股極寒極陰既冷氣吹醒左我。唔單止，呢道氣仲吹得比政府以木板圍住既門窗啪啪作響，狀甚恐怖。我知道，佢地黎啦，佢地就係多年黎比法師鎮壓住既一群，無得投胎，無得輪迴，佢地可以做既，就只有係夜晚個時悲鳴一下，而呢一下既哀號換黎既就係附近一班街坊既膽戰心驚，同埋遲幾日舉行既所謂大型超渡法會。係一個咁樣既無限循環下，呢班鬼只會不停咁比人打壓，到最後，只要有一點契機，佢地就會破網而出，為禍人間。而唔使等得太耐，只係區區既幾十年，呢個契機就係呢一刻出現啦!咁試問佢地又點可以唔捉緊呢個機會呢?鬼哭神嚎已經唔足以去形容佢地既叫聲，呢啲聲最貼切既形容應該係從陰間破空而出既安魂曲先岩。
「太多了吧老王? 」耳邊終於響起一把屬於人間應有的聲音。
 
「主神到了還作聲!?」王叔叔輕喝。
 
無錯，當八家將有領頭既主神出現時，佢地係唔可以再出聲，因為講野會令佢地現出人氣。所以係住鐘馗主真魂出現前，佢地出聲講乜都得，但係當真魂準備好時，佢地就必需安靜落黎，準備協助主神。
 
呢一次係我第一次有八家聖將幫我，但係奈何我又唔可以問佢地我應該點做，所以有好一段時間，我係企係原地，獨自焦急。而與此同時，另一名後四季既家將向我單一單眼，示意我帶住佢地衝入去有啲殘缺既百鬼陣中。咁又係喎，我依家唔鎮住啲鬼，仲要等到幾時!?




 
我係發動攻勢前摸一摸衫上既口袋。嗯，仲有三張紅符，有鐘馗大神既力量加持，就算要請離龍火鳳出黎都應該唔係問題，而且仲可以留一張壓下袋，以備不時之需。但關鍵就係，我係唔可以任我喜歡咁施法，因為我仲顧及埋場中既各家將。如果我轟出已經比未請神時霸道十倍既離龍火鳳，咁當然可以好大機會一下子清場，但係同時，附係八名家將身上既家將神都會比佢地燒成灰，家將們就會一下子失去神既庇佑，隨時比場中是但一隻厲鬼當作庇難所咁上佢地身，到時後果就真係不堪設想。
 
但係我識既又點會只係得龍同鳳呢兩招?我憑住八家將既捨身保護，一路殺入群鬼既中心點，將兩張紅符放係地上，抽出兩枚棺木釘，將佢地穩穩地釘係早已吱吱呀呀咁叫既木地板上邊。目前形勢係外人眼中就好似我地九個人勢孤力弱，比過百隻奇形怪狀既鬼包圍，落緊大下風，甚至由我一雙陰陽眼中望出去，仲見到有上千隻孤魂怨鬼係更外圍徘徊不散。
 
但實請其實係八家將氣勢極其磅礡，一夫當關，完全無鬼夠膽貼上黎，自討苦吃，間唔中一隻半隻勇氣可嘉只係往前踏出一步，就立即比身為黑白無常既兩位家將勾走，直接送入地獄受罪。而係陣中間受盡保護既我，正悠閒地用一早帶定黎既毛筆係地下畫起符黎。符既出現，多數配合埋符紙。但係其實用紙都唔及比起用地作符既載體咁好，紙本身既法力有限，但係地就有土地，城隍等神既殘餘神力，所以運起咒上黎事半功倍，而呢招既唯一缺點就係你唔能夠一早準備好，所以應用範圍就無符紙咁大。
 
「火似其勢，風似其刃，水似其靈，土似其體，金似其力!五行無上，天地縛禁，固封!」