那些年，當香港仲係百鬼夜行既時代 II: 9.高街鬼屋III -- 神祕敵人

我當下第一個想法就係諗起阿明。唔通佢又跟返黎！？但係當我都未及轉頭睇下來者何人，我耳邊就已經響起如雷貫耳既一聲暴喝！
 
「巴格也鹿！」
 
嗯？日文黎既？我心頭立時如懸掛住一個無比沉重既大鐵球般向下直沉。大獲啦！但係當我回過神來，正要打出手印，打算先攻其不備時，我心口卻已比人用一記用肉眼都捕捉唔到咁快既重鎚直接擊中！我身體就有如山好似紙鷂般向後直飛，重重地撞上鬼屋既破牆先將去勢暫止。
 
頂你個肺丫，好痛呀！我隨意用手輕抺從咀角溢出既血，用另一隻手支撐起自己有啲搖晃既身體，瞇起眼睛，細意觀察躲藏在黑暗中既事物...或者人物。但係我咩人都見唔到。黑暗中只有一堆又一堆既破舊雜物，有一大捆既電線啦，有發黃既老舊報紙啦，又有一啲古舊既可樂空樽....偏偏就係無人！咁頭先揮我一鎚既人係邊個！？我揉住依然隱隱作痛既心口，手中暗暗抽出符咒，輕握於手心。
 
其實有鐘馗天師既幫手，符令都其實已經唔係咁用得到上場，因為符咒本身只係一個媒介去助我集中思緒，凝聚法力去破妖斬魔，雖然我所請到既鐘馗並唔係佢既真元，但其罡氣已經足夠令我免受外界所影響，同時催谷我既法力蒐集速度。符咒只係一啲掩眼法黎姐，咁當然，我本身都有準備到一啲真紅火符等等，以便不時之需既。而同時因為有鐘馗天師既幫忙罡氣護體，所以剛才陰險之極，陰氣極重既個一拳先無趁機鑽入我既體內，如果唔係的話，我應該早已因為體內陰陽失調而撒手人寰。
 




正當我係回想剛才，暗嘆好彩時，我忽然見到眼前一閃！拳風霍霍而至，眼前有無數既拳影蜂擁而至，虛虛實實，毫無防備既我，瞬間就被轟倒在地！倒地後，敵人並無因此而放過我，竟然仲多補幾拳，拳拳陰中帶勁，寒冷之極既冷氣隨著拳勁直帶入我既心肺，而我每一下既呼氣都好似置身係萬年冰窖中，個種冷冰冰，毫無生氣既感覺簡直就係令人生不如死呀！
 
從來都未試過比人咁樣恰到上心口既我，當下立即發難，人都未及企返起身，甚至連敵人係邊個都未知，口中已經崩出一連串既咒語！
「天地應運，莫逆我道，天下大安，亡者速就！封！」