那些年，當香港仲係百鬼夜行既時代 II: 8. 高街鬼屋II – 巧見熟人

我二話不說，猛然就請出鐘馗天師上身!鬼屋中來者不善，自然我都無必要再手下留請，直接用身上罡氣打散佢就得啦!但係當我眼睛慢慢對焦到眼前事物時，我又再一次被嚇到!
 
我本身已經做好心理準備，發動攻擊既可能係奇形怪相既日本惡鬼，可能係不知火，可能係山童，甚至可能係有兩個血盆大口既二口女!但係映入眼簾既…竟然係一張正常到不得了既人面，而且我仲要見過既!但係見到熟人反而先更加嚇人，尤其是當你知道呢個人唔應該出現係呢個地方既時候!

「阿一!?」「阿明!?」

企係我面前，又叫得出我個名既阿明係邊個呢?阿明就係我靈異學會既成員之一，仲要係一個十分活躍既成員，有親靈異tour，鬼故之夜就一定會出現，仲要通常係講鬼故講得最恐怖，最真實既個個。
 
見到佢，我唔單止感覺唔到一絲安全感或者一刻既放心，反而係更擔心!因為一個普通人竟然會係出手拍我時帶有咁強烈既陰氣，定還是…我眼前既阿明根本唔係一個人呢…?
 




「點解你會係到既?? 」我地兩個同時開口問對方。我莞爾一笑，讓阿明先答。
 
「嘿，我聽到你講到個故仔咁真，咪想黎睇下係咪真係咁猛囉。我捕左兩日架啦…不過都係無咩料到，鬼影就見到好多，真鬼就真係一隻都見唔到。師兄你今次都真係點得我透…」阿明面上盡是忿恨既表情怒瞪住我講。唉，我又無叫你捕住係到，你咁樣怪我都有!雖然，我心係咁諗，但係我覺得都係唔好同佢起沖突，因為呢個人陰氣燎天，即使係嬲既樣，都表現得十分之生硬，有異於常人。「咁師兄你呢? 」

望住雙眼係黑暗中閃爍既阿明，我忽然打左個冷震。「我都係黎拎下靈感，睇下下次鬼故TOUR有咩好講嘛。你不如走先啦，我講個個鬼故其實只係呃下人，搞下氣氛，你唔使咁認真去對待佢架喎。」我開口回應，不過同時都隱瞞左我黎呢到既真正目的。而與此同時，我出手推一推佢，示意叫佢離開。本以為佢應該點叫都唔會走架啦，點知，佢竟然好順攤咁點點頭，轉身就走。整個過程快到令我有啲驚訝。佢咁聽我講，快手快腳離開，我應該高興架嘛，但係點解我會覺得心裏發毛既呢?

喀噹喀噹…佢既腳步聲開始慢慢遠去，鬼屋中好快回復平靜，只係得返一堆爛傢俱陪我。周遭既空氣又開始變冷，彷彿侵蝕緊我生命既餘溫一般…不過其實身體中係一直有一股正氣不停咁循環走動，個股氣就係黎至鐘馗天師既氣。鐘馗可以話係我請得最多既神，我都唔知點解，自從同師叔佢地去完台灣一轉之後，我請鐘馗天師上身就變得極其簡單同快捷，到後尾，我已經甚少請出其他主神，只係請鐘馗或土地其一上身幫助驅妖捉鬼。
 
阿明走左後，我無立即動身，而係企係原地，額外再多等左五分鐘先繼續前進。因為我忌諱個陰陽怪氣既阿明再度折返，始終，呢個人比我既感覺實在唔太好。
 




一樓其實唔係好細，但係到處都破破爛爛，要仔細咁搵絕對係無可能。所以我慢慢步上鬼屋既二樓。我踏上鬼屋中木制既樓梯。鬆脫既樓梯依呀依呀咁叫，好似比我踩痛咁。
 
跨過最後一級既樓梯，我終於踏上二樓既範圍。不過就係呢個時候…我感覺到有個人企係我後邊。

係一個陰氣沖天既人。