那些年，當香港仲係百鬼夜行既時代 II: 10. 高街鬼屋IV – 百鬼夜行陣

咒語一出，豈容任何惡鬼係我面前繼續搗亂!?只見空氣中突然有一個黑影慢慢浮現出黎，愈黎愈真實同埋具體，而同時，伴其出現既仲有一點點既火光。火光係黑暗中原本只係難以見到既一小點，但係漸漸地，火焰愈燒愈烈。黑影好似比火燒痛，係黑不見五指既二樓中到處亂竄，時而碌地，時而撞牆，睇黎鐘馗天咒對此鬼起到一定既作用。
 
我扶住牆企好，等待隻鬼比天火燒到完全消失，兼夾乘機回下氣，再準備幕後操縱者發動下次更強既攻勢。隻鬼生命力又真係幾強，一直燒，一直燒，燒左成個字都未死。我認得出，隻鬼係日本惡鬼中命為塗佛既一隻黎。塗佛本身係百鬼中比較特別既鬼黎，佢係小數本身就已經具有實體既鬼之一。佢地唔單止可以靠樣，靠精神上既方法去攻擊人，去嚇人，而且更可以靠由肉體既搏擊黎戰鬥。所以遇到佢，就唔能夠單單靠普通法術去制衡佢，必須配以近身既戰鬥，將其全身皆油到好黑既肉體消滅先得。但係鐘馗天師既符同佢加持又豈會係呢種既鬼可以輕易抵擋到?最多只係打個折姐!
 
不過…來人一出手已經係百鬼中既隊長級，再落黎豈不是不得了!?我目光依然留係隻塗佛身上，塗佛開始慢慢從手被天火燒成灰…腳燒成燼…到最後，全身都化成塵。就係猛烈既火熄滅後，我感覺到室內既氣溫凍左好多。不過呢種凍又有別於冬天既個種凍，冬天既凍你係會覺得好似身上比一層薄冰所覆蓋，但係呢種既凍係心寒既凍，連帶由心臟所泵出黎既血都係凍既，就好似心臟跳動都因為凍既關係而慢左落黎。呢種既凍，我稱之為死人之冷。 多年前我曾經有過咁既感覺，個次就係面對師父昏迷不醒既時候，生怕會失去左師父既個一刻間。今次再面對同一種既感覺，睇黎真係大鑊啦。
 
果然，不出我所料，當最後一點僅餘既火光一滅時，場中陰風頓生，係宛如密室中既高街鬼屋吹得有如鬼哭神嚎般，帶風帶形帶聲。我知道，呢陣既陰風係因為上百隻鬼同時出現所致。佢地夾帶住無比悽怨，同時又心心不忿既心情，再一次被召喚上黎人間復仇，討回自己應得既野。
 
我抽出身上不同既符。係一個真實既社會中，無人會好似戲入邊既奸角咁，講一大輪廢話等主角有機會翻身，佢地只會立即殺無郝。我如果要生存落黎，我只有靠自己，同埋事前既準備。呢啲符就係我既救命稻草。
 




百鬼各有優缺點。但係呢啲優缺點只會係佢地各自獨自戰鬥時先會見到，當佢地好似依家咁連成一線時，缺點自自然然就會消失，你見到既，就只會係得返佢地既優點同強大之處。我必須承認，我當初真係有啲大意，我事前完全唔相信係香港，竟然仲有人可以召出百鬼，組成百鬼夜行陣。呢個百鬼陣雖然威力及唔上劉伯溫既四神，但係卻仍然係難以單人匹敵。始終，呢一堆鬼係由平安時代一直殺到現代，其族根基之厚，實力之強實在不容置疑。
 
我手心開始出汗，人都開始繃緊起上黎。用咩策略去到付佢地好?