那些年，當香港仲係百鬼夜行既時代 II: 7. 高街鬼屋I – 鬼影

我知道師父咁講其實係擔心我，所以我當下並無立即開口頂撞師父。為左減少師父對我既憂心，我輕拍師父既手背，「放心啦師父，徒弟會好好準備一下先去，唔會亂闖，亦唔會要你老人家出馬既。」

「唔係唔係!你一係唔好去，一係就比我跟埋你去!」師父依然神情激動，反扣我雙手，將我捉緊。
我勉強將手縮返黎，免得比師父強勁無比既掌力握碎。「師父你真係放一萬個心都得，我唔會有咩事架。個到有陰氣但係唔強，比起當年達德實在無得比。我連達德都捱過左，今日一間高街鬼屋又點會難到我呢?就咁話啦師父，三日後再搵你同埋雨瑤一齊去飲茶!」我再一次輕拍師父手背，企係起身，準備離開。
 
「唉，好啦，屬木既人決定左我好難再去改變。不過…」我本準備向門口踏出第一步，不過卻因為師父既一句不過，而停低背向師父，等待師父未講完既句子。「我贈你一個字，緣。有緣你此仗必大獲全勝，如非，則鎩羽而歸。嗯，三日後飲茶，你請唔好走數。」
「謝師父! 」
 
師父所講既緣係指咩緣?唔通指如果我好運唔係遇到陰陽術就可以羸得此仗?定係話有貴人幫我?抑或只係師父唔想我去，所以講一番令我摸不著頭腦既說話?不過，我相信一句說話，船到橋頭自然直，到時去到先再見招拆招，正所謂兵來將擋，水來土掩嘛。





離開師父屋企後，我開始張羅一啲係鬼屋入邊有機會用到既野。電筒…粗繩…外套等等。至於對付鬼既野呢，屋企既野就應該已經足夠，同埋我依家能力比起以前還要更上一層，相信對付普通一個聚陰之地絕非難事。
 
第二日，我整理好裝備後就出發了。離家時係夕陽初下既黃昏，去到高街，已經係月亮高掛既黑夜。高街一如往常，好靜。不過亦有啲不如往常，就係平時空無一人既高街，多左我呢個不速之客，準備夜探高街鬼屋。
 
我企係高街鬼屋正門前，深深地呼吸一口氣。呢一口氣入邊，我感覺到有血腥味，一幕幕日軍無情地斬殺平民係我腦中出現。入去啦。我穏住自己既心情同思緒，自己提醒自己。鬼呢樣野，只係你唔驚佢，佢就唔敢亂黎，所以我地可以話佢地係比較欺善怕惡既一樣…野。正當我邁出我第一步先，我忽然見到屋中有幾個黑影閃過。佢地既身影好快，我睇唔到佢地既本體。係一間大家都避之則吉既鬼屋到，竟然會有人既影子!?定係個啲影其實係一啲未成型既鬼…?
 
我放輕手腳，慢慢依住牆壁行走，手已經一早結好手印，只等待我凝思運法就可以立即出擊!行出十步左右，我依然聽唔到，見唔到有任何奇怪既動靜，如果有惡鬼的話，理應係帶有滿身罡氣既我一入黎個時就攻擊我丫，無理由咁耐都唔出手架喎!我停下腳步，開始懷疑自己頭先係咪眼花睇錯。就係我停低腳步個一刻間，背後突然有一道陰風襲來，狠狠地刮中我既手臂!
 
痛楚感雖說不大，但係竟然偷襲我!?豈有此理!我立時回身，祭出手印，「翊聖雷霆驅魔辟邪鎮宅賜福帝君出巡，大妖小鬼俱迴避，若有逆者，滅之!」