《讓我重新遇見你》·緣圓系列·: 第三十三章 不要緊

第三十三章 不要緊

1022
令我成功既地方

1022
係一齊果日。

果日...
廁...廁所...




唔乸又要再入過去呀？

「啊仔﹐黎食糖水啦。」我啊媽攞左碗腐竹白果俾我。
「好呀。」佢坐左響床邊望住我「做咩呀？我食完自己攞返出去洗得架啦。」
「啊仔...其實你同...新抱仔...係咪分左手呀？」又係一個難答既問題。
「唔...唔係呀。」我食左啖糖水。
我啊媽皺曬眉頭﹐
算啦同佢講啦。
「其實...啊婷佢有腦瘤...」
「咩話？」響房門出面既啊爸都走左入黎。




「佢會成日唔記得野﹐最近個瘤大左﹐所以要做手術...」我望下幅相「不過﹐佢就同我玩一個遊戲﹐係尋信。」
「尋咩信呀。」我啊媽講。
於是我就攞曬啲信出黎。

佢兩老睇曬啲信﹐
「最後果句點解？」佢地指住「令你成功的地方」問我。
「就係唔知。」我自嘲咁笑左下。
「啊仔﹐你因咩事追到啊...啊...啊婷呀？」啊媽竟然唔記得啊婷叫咩名﹐
「入女廁囉...」
「嘩！啊仔你咁狼呀。」啊爸唔知讚我定踩我。




「咁之前緊有啲事令你要入女廁架。」我啊媽冇理啊爸。
「咪考試70分囉...」好似有啲頭緒喎。
「叻呀啊仔。」我啊爸搭嗲失敗。
「咁又因咩事先攞到70分先？」啊媽十足神探咁講。
「溫書囉...」
「嗱﹐以我估計﹐如果果個係地方既話。應該係你溫書既地方。因為你唔溫書就冇可能攞70分﹐你唔攞70分就唔會追到新抱仔。」我啊媽好詳細咁分析。

讀書...

「唉﹐真係頭痛。」其實我真係有啲頭痛。
「早啲瞓啦﹐我地返出去先啦﹐有野同啊媽講啦。」佢地出左去﹐
我都係抵受唔到頭痛。
坐響書枱就瞓左。

「嘩...好撚凍。」到我醒﹐




個人仲係坐響書枱﹐
著住短褲﹐T-shirt.
係時候去搵信啦。

響街到漫無目的係咁行﹐
回想下同啊婷既日子。

旁邊有一個女仔行過﹐
我回一頭望﹐
唔係啊婷。

擁有同啊婷一樣既味道﹐
但唔係啊婷有咩用啫？

諗下啊媽講過啲咩﹐




我讀書既地方咪圖書館囉。
但有咩可能係圖書館先得架。
不過聽啊媽講﹐
又似喎。

橫掂未試過圖書館﹐
就去博下啦。

去到圖書館﹐
屌...
有咁多層。

地下果層開始搵啦﹐
試下搵1022既索書號先。
...




..
.
P你個K！
索書號冇1000架﹐
啫係唔關索書號事啦。

我又去到最高層。
因為當初我同佢係響到溫書﹐
又冇。

行返去書架果面。
續本搵最實際。

「sorry.」我撞到個女仔。
係陸矛琪。




佢點點頭「我講先啱...果次對唔住。」
好彩佢都知錯。
「你...做咩黎圖書館呀？」佢打破僵局。
「搵野...」我唔會同佢講成件事既來龍去脈既。
「我都係黎睇書啫嘛...」佢呆一呆「我幫你？」多個人總好過自己一個搵既。
「搵一封信。」唔好問原因呀你。
「好呀。」佢冇問原因就開始搵。
多謝你。

同佢一邊搵﹐
一邊傾兩句﹐
佢話自從果次我冇聽佢電話之後﹐
佢有搵過男朋友﹐
不過就分左手。

最近又搵左第二個﹐
佢男朋友做餐廳﹐
不過令我驚訝既係﹐
佢男朋友大佢成十年﹐
都好既。
話曬都叫有正職呀。
佢地真心相愛就得啦。

傾下搵下就搵淨一樓﹐
冇既話都唔知點算。
真係搵到有啲心灰意冷。
為左加快速度﹐
我同陸矛琪分工﹐
一人一邊書架。

我同啊琪同樣地去到最後一個書架。
帶住沉重既心情﹐
如果搵唔就要面對現實。
「呀！」啊琪叫左出聲。
隻眼突曬出黎﹐
而其他人都望住佢﹐
仲俾管理員「殊」﹐
「係咪呢封？」佢跑左過黎。
「係呀！點解你搵到架？響邊到搵架？」我一輪嘴咁講。
「響到。」我望下個索書號。
022
原來個1字係1樓咁解！
「多謝你呀！」我忍唔住攬住佢。
我意識到我攬住佢「sorry.」
「唔緊要啦。幫到你開心事黎架嘛。」佢笑一笑﹐
佢望下電話「我男朋友黎搵我呀。我走先啦。」

望住佢的確可以感受到佢依家好幸福。

我響玻璃窗見到佢男朋友﹐
嘩﹐金毛既。
不過隱約見到佢寵溺既笑容。
祝幸福啦。

----------------------------

我知你今次又搵左好耐架啦。
我都唔想架。
不過呢﹐
呢個地方實在太特別啦。
如果當初你冇溫書﹐
你唔會合格多二十分。
你唔會入女廁。
你唔會夠膽同我表白。

你隔住女廁度門同我講既所有野﹐
我已經唔太記得。
但我一定記得既係你鍾意我囉。
傻佬。

果陣我有諗過唔同你一齊﹐
因為我個病。

但我好自私﹐
最後都應承左你﹐
依家又自私咁離開左你。
對唔住。

----------------------------

「唔緊要...唔緊要...」我隻眼開始模糊「你會返黎...你會返黎架...」我用力揸實封信。

今次冇提示﹐
只係有一條鎖鑰。