《讓我重新遇見你》·緣圓系列·: 第三十二章 原來如此

第三十二章 原來如此

一個星期就咁就過去。
我都係諗唔通第三封信入面既內容係點解。
又係冇啊婷既一日。

「happy birthday to you!...」一班女孩子正響到為人慶祝生日。

唉﹐
你地點解可以咁開心﹐




雖然幾個月前我都好開心咁...慶祝...生日...
慶祝生日！

我明啦！

「喂。啊仔呀。你有個包裹﹐我放左響你枱面架啦。」我啊媽打電話俾我同我講。
「哦﹐好呀﹐你會煮飯架呵？」我行左去輕鐵站。
「會呀會呀﹐帶埋新抱仔上黎喎。」啊媽﹐你個新抱仔可能不保。
「呃...我唔同你講住啦﹐我晏啲返黎食,留飯啦。byebye.」都係盡收線好。





收左線之後﹐
我個熒幕自己彈左去主頁﹐
望住個wallpaper入面笑得好甜既女孩子﹐
我感覺到﹐
我同佢一定可以再見。

搖左半個鐘多啲輕鐵﹐
再行左陣﹐
就去到啊婷爸爸開既咖啡店。





其實真係有啲唔好意思入去。
話曬都有好長時間冇返工...
不過間舖已經轉咗人頂…
而且第三封信就響呢到。
幾唔好意思都要入去架啦。

----------------------------

「祝你生日快樂～
祝你生日快樂～
祝肥添生日快樂～
祝你生日快樂～」
我迷迷糊糊開左少少眼。
見到啊婷攞住個蛋糕。





----------------------------

驚喜TU既意思
其實係俾我既驚喜﹐
而佢曾經俾過我既驚喜，
就係我生日果次。

我行左入去﹐
照舊叫左個蛋白檸檬派﹐
坐左響之前坐過既果張枱。

但個派食到一半﹐
我已經唔想再食。

因為我食唔返我想食既味道﹐




我最鍾意食既果一個派﹐
就算一粒糖都冇落過﹐
都可以食到一絲既甜味。

我苦澀咁笑一笑﹐
就行左去本來要同我渡過一晚既梳化﹐
攞開咕?﹐
真係響到。

----------------------------

嘻嘻﹐
個提示係咪好難呢？

不過你都係搵到呀。





你生日果日我真係好開心。
見到你對住個鐘發爛炸﹐
真係覺得好好笑﹐
就算個腦瘤令到我唔記得幾多野都好﹐
我都清楚記得﹐
你果日錫我既感覺。

當走既時候﹐
你仲著起我送俾你果件褸﹐
我知你唔凍架﹐
但你為左滿足我﹐
你著起左。

好多謝你。





1022
令你成功既地方

----------------------------

又咩令我成功既地方呀？
我唔想玩啦...
唔得！
一日未搵返啊婷﹐
一日都唔可以放棄！

「喂。啊仔﹐你返黎未呀？」啊媽又打黎。
「返啦返啦。」收左線之後我就狂奔返屋企。
再唔返屋企真係俾啊媽吊起黎打。

「咦？啊婷呢？」我一返屋企﹐
啊媽就問埋啲咁難答既問題。
「佢唔得閒呀。」我低頭笑一笑行埋飯枱﹐
「哎呀﹐同新抱仔真係冇緣。」我啊爸因為做酒店﹐
啲返放工時間都不定。
「下次啦。」我開始食野。
「啊婷真係好叻架。你個仔都係因為佢先讀書咋。」我啊媽對住我啊爸講。
「竟然有人治到我個仔。」啊爸飲左啖啤酒。
食左咁耐佢地就講足咁耐﹐
我只可以好假咁笑﹐
唔好再講啦。
我好辛苦呀。

食完飯我返左入房﹐
打開個包裹﹐
係一個相架﹐
同啊婷屋企果個一模一樣。
張相都一樣係千紙影果張。

又一封信。

----------------------------

呢封信唔計五封信既其中一封架﹐
你要加油繼續搵！
你掛住我就望下張相啦﹐
我永遠在你心喔。

肥婷上。

----------------------------

我睇返個包裹時間﹐
係我未同佢分開既時候寄架。

等我仲以為佢做完手術冇事﹐
所以寄個包裹俾我﹐
話俾我知佢依家響邊﹐
點知得個吉﹐
一啲線索都冇。

我將個相架放響床頭﹐
等自己每日起身見到啊婷﹐
可以安慰下自己。