《讓我重新遇見你》·緣圓系列·: 第十六章 吉仔日

第十六章 吉仔日

放飯果陣我入左佢班房﹐
「肥妹婷。」我接近佢個書包。
慢慢將本日記放入去。

佢呆左望左我﹐
好陌生既感覺。
「Hello.」佢強行擠出一個好假既笑容。
再兜過我響書包搵返本日記。




「終於搵返啦。」佢細聲咁講。「我...我去一去廁所先。」同我講完之後就急急腳走左。

有冇咁多尿屙呀？
但Hello？
同我講Hello？

「肥添！」佢跳下跳下跑返入黎。
同平時既啊婷一樣。
「啱啱玩你架咋！」啊婷真係調皮妹黎架喎。
俾著第二個我一定嬲爆。




「肥婷想食咩呀？」而我亦冇理咁多﹐一野搣佢塊面。
「五十嵐啦。冇食過呀。」佢拉住我件衫就走左出去。
「冇食過？之前咪同你食過囉。」陸矛琪果次呢...
「我話同你一齊之後冇食過呀﹐肥仔！」佢笑得好得意呀！

食飯同平時既啊婷一樣﹐
鍾意塞到成口都係飯。
成隻倉鼠咁。

「慢慢食啦。」我笑到成個啊爸咁。「肥婷。你12月14得唔得閒呀？」




「做咩呀？想約我慶祝聖誕呀？」佢一路食一路講。
「食埋先講啦你。」我摸摸佢個頭。「想約下自己女朋友得唔得先？」我學佢之前咁講。
佢攞一攞本行程簿睇「爸爸媽媽果個星期去左旅行。一定得呀。」
「咁我約左你架啦。」我抬住頭望住一個密密食既女仔。
好幸福呀。

自從果日之後﹐
我就再冇睇過佢本日記。
因為果本日記對佢好似好重要咁。
所以我都唔敢攞走佢。

同啊婷一齊既日子一日一日咁過去。
今日係學校一年一度既陸運會﹐
啫係吉仔日。





點解咁講？
因為吉仔響每年既陸運會唔只破大會紀錄。
仲係全場總冠軍。

佢雖然係毒﹐
但運動真係超勁﹐
爆發力強﹐
耐力好。

不過田徑隊啲常規訓練每個月個死仔只會去一次﹐
唔似其他人一個禮拜要幾次。
無錯﹐
佢就係咁大牌架。

我有問過佢點解架﹐




佢話「我唔撚鍾意俾班田徑妹望呀。」
我明。

「嘩！魯吉好型呀！我同佢對望左呀！」
「佢又贏左啦！佢電我呀！」
「嘩！佢望住我呀！」
我隔離果三個女仔不停鳩叫。
真係想拍佢地膊頭講「其實佢望緊我。」
唔好再叫啦好嘛？

「屌。又破紀錄喎你。」每年我都係做佢跟班。
每年都係講同一句說話﹐
每年都係送下水俾下毛巾。
「輕鬆啦。」佢飲左啖水「你唔洗陪你女朋友咩？」
「跑完就去搵佢。」我係唔會同黃魯吉參加同一個項目。




因為輸梗。
而我就玩個200米。

「頂你個肺﹐拉筋啦。」吉仔雖然爛口﹐
但內心係一個善良既大細佬。
「唔拉啦﹐麻鬼煩。」我唔理佢就走左去起點準備。
「咁你小心啦﹐我去跳高先啦。」高人係唔同啲。
玩啲野都高級啲。

「呀！好痛呀。頂！」當我講呢句野既時間﹐我比完賽﹐
贏左﹐
亦抽筋了。
俾吉仔講中左㖭。

「唔好郁。我幫你拉。」學校啲紅十字廢架？




竟然要啊婷落手幫我拉筋？
「大腿定小腿呀？」啊婷好溫柔咁問。
「大呀。」我噤住左面大腿。
「柒頭叫左你拉筋架啦。又唔聽我講。」吉仔跳完高過左黎。
「衰仔！做咩唔聽吉仔講呀？」啊婷好似媽媽咁講。
「娘子呀。成件事唔係...」我想反駁。
「望呢面！」吉仔講。
咔嚓！
佢攞住部相機影低左我同啊婷。
屌！佢響邊到搵返黎架？
如果唔係抽筋。
我一定chok曬樣影！
以為啊婷會嬲﹐
但佢竟然話「影靚啲就得。」
對自己個樣好有信心喎。
果然係我既凱婷呀。

「吉師兄！」吉仔俾啲女女拉左去影相﹐
RIP啦吉仔。

我拉多陣筋。
「好好多啦。」我鬆一鬆大腿。
「飲水啦。」佢遞左支水俾我﹐
仲好甜咁笑一笑。
有水飲既感覺真好。
嘩～
水也很甜喔。
「肥婷﹐如果我依家想攬你﹐你俾唔俾？」我笑笑口望住佢。
話曬我都成身汗。
唔知佢會點呢？