《讓我重新遇見你》·緣圓系列·: 第十五章 好奇

第十五章 好奇

去完海洋公園之後﹐
唔知點解成日都諗起佢本簿…

到底佢本簿入面寫咩？
點解佢會去邊都帶？

每一次同佢溫書,
每一次同佢傾計,




每一次送佢返屋企,
佢都會拎住本簿。

但當我問佢本簿寫咩既時候﹐
佢都會發呆﹐
講另一樣野﹐
分散我注意力。

好奇心驅使下令我忍唔住想偷睇本簿。





我知咁做係唔啱…
但好奇心就好似惡魔係咁講﹐
「情侶之間有咩秘密喎。」
「一本筆記啫﹐冇事既。」

於是第二日返學﹐
我響啊婷去左廁所既時候﹐
拎走左佢本簿。

起初﹐




佢都冇發現。
仲扁哂嘴咁話「你呢排成日同吉仔啊雄食lunch﹐唔洗理我架啦。」

你知架。
你知架喎。
我對啊婷係毫無抵抗力﹐
之後我就約左佢lunch time一齊食。

順便睇完本簿放返入佢書包。
「佢應該唔發覺既。」我心諗。

我響小息既時候
打開左佢本簿…

----------------------




我係鍾凱婷
今年15歲
生日係5月25日
----------------------

邊有人會響本筆記到寫自我介紹架…
不愧係啊婷…
小弟佩服佩服。
原來佢5月25日生日既。
佢仲貼左學校個樣響到。
仲有大大個我響到喎﹐
個傻妹鍾意我鍾意到偷影我。
空白位寫左我鍾意果啲野。
包括魚柳包。
側邊都有啲其他同學既樣。





----------------------
9月1日 晴
今日係開學日啊><
我求左OO好耐佢先比我返學
我仲響M記到識左一個男仔-陸添羽
成個傻仔咁望實我食野
我仲同佢對望左一下
望真啲﹐佢其實幾靚仔

佢性格應該唔錯既
係呆左小小咁啫
冇啦啦響M記大嗌問我咩名…
果下真係比佢嚇到





本來仲以為佢同我同一班
結果原來佢D班
不過唔緊要啦
我第一日就識到朋友

唔知點解佢講到佢讀書唔叻
我竟然會好激動咁講比我教佢
好瘀呀…

------------------------

啊婷求邊個比佢返學?
啲字濛到睇唔到呀。

我呆？




明明佢平時仲呆過我。
話時話M記果次真係好瘀。

我再揭多幾頁。
係前幾日。

-----------------------
10月22日 陰
今日派卷啦。
啊添竟然衝過黎攬住我。
同我講佢得左啦﹐
佢全部科都拎到70分。

呢個傻仔仲以為表哥係我男朋友
但佢都冇放棄﹐
仲同我表白。
我本身好開心架﹐
不過我諗到我既OO
我OOO佢..

我OO忍唔住喊左出黎
仲衝左入女廁
陸添羽…你好傻呀

響女廁到隔住道門
佢同我講左好多野
之後我就心軟…答應左佢

我同陸添羽一齊﹐
只會令佢OO
但係我應該點啊依加
------------------------

濛左果啲位好似俾啲水整化左。
唔通個傻妹諗起就想喊？

但啊婷...
不如用原子筆寫啦

--------------------------

「陸添羽﹐睇緊咩呀？」
陳希曈？你幾時走左入黎D班架。

「冇野啊,冇野啊。」
我9秒9收返埋本「日記」

「你知唔知啊婷發生咩事呀？我啱啱搵佢…佢唔理我，就好似唔認得我咁。」

「個傻妹成日發呆架。我等等搵佢問下啦。」

「唯有係咁啦。」佢講完就走左

我都係早小小還返本日記比佢先得﹐
本簿對佢黎講﹐
應該好重要。