《易容師 II 模仿犯》: 第十八章-最後勝者
砰──砰──砰──
係一條長長而窄既暗巷之間，我同陳仔兩方，都似響聲同火花發洩自己既
怒火！
黑夜之中，除左子彈因擊中物品擦出既火光，甘戰中既我彷彿可以睇見子彈
既軌跡，如同我既人生──快上快落。
砰──砰──砰──砰──
牆身、垃圾桶，就連地上既汽水鑵，無一唔係子彈既落腳位置。
望著周邊俾子彈射成既裂痕，就好似意味著我同陳仔既關係一樣，今後已
經有著難以磨滅既傷痕。
砰──砰──
兩個人當中，一個為著活著尋找真相，一個為殺戮以得到晉升。
兩者都有唔可以倒下既意志，唯有槍火去引證呢一切，到底誰是誰非。
敗者，一無所有。勝者，卻係一將功成萬骨枯。
可惡，手臂中左一槍，我避入埋垃圾桶後面問道：「陳仔！你到底有咩證
據！」
聽到腳步聲一步步逼近，我細數自己剩下幾多彈藥......
「證據？當日易容師一事，在場既根本只有得汪震、熊教授同埋你。汪震
痴鬼左，熊教授死埋，呢一切唔係你滅口既話，又係咩一回事呀？」
「你識左我咁耐，我份人係點你應該知架？」陳仔，點解你仲唔信我？
「知，正直公義，鍾意抱打不平，伸張正義......就係你呢種性格，呢種現實
社會唔應該存在既人。自己女人出軌，我就唔信你仲堅持到自己所謂既正義！」
砰──砰──
「歪理！」我怒叫左聲，手伸出外再射兩槍！
「明明本書都係咁寫，你明明就係用催眠汪震催眠自己。證據實鑿，你仲
扮咩野？」陳仔又一槍回敬。
本書？橙皮書？
陳仔言下之意，唔通佢......
「你一早擁有個Ｄ缺頁？」
「冇錯呀！由一開始既缺頁，都係我親手比你架！」
係啦，除左岩先所執到既缺頁，前面既都係經陳仔交到我手上。
點解我一開始，竟然冇懷疑到呢一點？
但係後面既呢？李SIR話佢冇聽我指示追查陳志明，咁佢應該唔係醫院既
現場。後面既缺頁，甚至Fish既屍首，到底係邊個做？
而陳仔，點解會睇過後面既缺頁架！
「你就係易容師！就係你呢個過份正直既人，接受唔到自己女人比綠帽你
戴，你唔單只殺左佢，仲害埋其他無辜既人！係你，係你啊！」
唔係，唔係我呀！
「唔係我！陳仔，我地識左咁多年，我一直當你係兄弟，你點解要咁樣睇
我呀？」
「因為你根本就係易容師！個個自以為事，自行判人酷刑，十惡不赦既易
容師！」
砰──砰──砰──砰──砰──砰──砰──
我唔係！
「屌你！我都話我唔係呀！」
怒不可遏，怒火蓋過眼前一切。
呢一瞬間，我冒著槍林彈雨，昂然走出黎，以槍聲帶出我最後既怒吼！
砰呀──！！
兩人之中，終於有一個人倒下。
我咬緊牙關，只覺臉頰破損。
陳仔目無表情，緩緩咁訓低......
係我，再次痛下殺手。
明明深愛，卻天人分隔。
明明兄弟，卻反目成仇。
所有野，都係我自己攞黎？
我......就係易容師？
啪啪啪啪啪......
槍戰過後既一片死寂，只維持左唔夠三秒鐘。
一輪輕浮既掌聲，就係巷既末端，陳仔走出黎既轉角位傳出。
「雖然依家你仲好清醒，但結果......都係我贏。」
頭髮蓋過半眼，一身衣衫不整，但行走姿態絕不奇特，更甚令人熟悉。
「又係你？一直都係你！」我舉槍相向，指示前方個個人。
不過，我內心依然唔敢相信，眼前呢一個人既出現。
汪震。
點解佢會出現係度架？
難道......呢個又係一個夢境？
「嘿嘿嘿......難以至信？因為你一直都係我棋盤入面啊！」
汪震一手將遮係額前既頭髮，撥去後面，一雙充滿殺意邪氣既眼睛，再次
泛現我眼前！
到底，係咩一回事？
眼見汪震手上拎著橙皮書，慢條斯理咁揭開本書。
「廢話唔多講，簡單一句到尾，呢一切既佈局，都由呢一本書開始。」
開始？但你明明係小欖架！況倩宜？果然佢係跟著汪震指示逃跑！
「先將書本交比同樣有肢解改造人體癖好既陳志明，並誘導佢跟著我昔日
既做法，引起你地既注意。再將書本拎返，透過女奴交到你既手上，同時開始
引導陳仔同熊教授開始懷疑你。之後，安排女奴將你地所有人集合係一齊。令
你將教授當係犯人，而教授將你當係易容師，要你幫忙殺哂有關所有人物。最
後，只要熊教授將佢心目中認為既真相公佈，其後又比女奴殺死，所有既罪名
自然就會落入你身上。」
女奴？女奴唔係就只有......？
「我知你諗緊咩，但我幾時講過，女奴只有一個？」
完啦，正如陳仔將講，係地下密室入面，見過真相既就只有我、汪震同埋
熊教授。
汪震一直在外，以女奴同模仿犯代為行兇。教授又係死前中左圈套，誤會
左我係犯人。
呢一切，無論我下場係點，最後我都難逃「易容師」罪名！
唔得，唔可以！我已經咩都冇架啦！
我唔可以死，死左既連最後澄清自己既機會都冇架啦！
「汪震！你個仆街，去死......」
咔擦──
就係我臨開槍既一下，背脊傳黎一陣冰涼刺痛既感覺。
「劉孝天，最後考下你......當阿May負責引導你同教授，陳仔將我係小欖
帶出黎既同時，有邊個可以神不知鬼不覺，殺左你深愛既女人，再靜靜地放入
你部車度？」
係佢，一直令人遺忘左既佢！
「況......倩宜！」
一把鐵錐，冇聲冇色從我身後刺穿我既身軀。
剛才既解說，除左宣示勝利，同時係為左分散我注意力？
好一個汪震，由始至終，每一步計策都係雙線而行。
只不過，我真係......死得唔甘心啊！
(to be continued...)