《易容師 II 模仿犯》: 第十七章-絕望真相
2015年10月17日，晚上11點24分。新界屯門，新墟附近。
可以點做？
我可以點做？
Fish你到底係邊呀？
兜兜轉轉，平時可以冷靜落黎既我，依家此刻既思緒混亂不清。
踩狠油門，不知不覺自己就係屯門區內左穿右插，目的就係唔想比班伙計
捉到。
只係，遊走左冇耐，架車係呢個時候竟然冇油！
就係咁，我架車就停左係新墟附近既大小街道。
屌！呢個時間點解會冇油架！
我即刻睇下油錶，真係得返零！
冇理由，前日我特登去入滿左油。就算今日係咁追車，冇理由依家就咁快
冇哂架！
我馬上落車，呢個時候，我見到部車底下係咁滴油。
邊個？係邊個整爛我油箱！
我走到去車中間睇，望著一路係咁滴出黎既油，中間點解會夾雜點一絲既
鮮紅色水？
滴......滴......滴......
我慢慢跟著滴出黎既紅水，走到去車尾，發現我車尾箱岩先冇合上。
Ｄ鮮紅色既水，就係從車尾箱既細縫仔滲出黎.....
腥味沖天，明顯不過唔係普通既顏料或者紅油，而係鮮血！
唔會既。
嚇我唔到既！
邊會咁易比我估中？
我雙手放到車尾箱蓋上邊，慢慢咁拉起去......
唔係真既。
當我完全打開左車尾箱我時，我唔敢確實眼前既事。
係夜晚街上光線不足？抑或係......
眼前血淋淋既情境下，被支解到一舊舊既殘肢肉塊，正正遮擋著個一個短
髮既頭顱，令我冇辦法確實......
嗚嘔！！！！！！！！！！！！！！！！
仆街！咩冇辦法確實？
我點會認唔到佢？
明明根本係佢，只係我唔想承認！
個個本應打算同我結婚，做幸福少奶奶既女仔──
Fish。
「嗚呀！！！！」
唔係真架！幻覺黎架炸！一定係易容師既催眠！
假既！假既！呃我唔到架！
跌左係地下既我，係咁起勢踢個車尾箱。
明明腳唔痛，但個心痛到我不停落眼淚......
「唔好呀！！！！」
原來岩先陳志明所講既「痛苦呻吟」，係咁既意思！
咩黎架？好似岩先推開車尾箱既同時，跌落黎架啵......
一大疊染左鮮血既紙張。
正正係橙皮書餘下既所有缺頁，746頁至到785頁。
......警察逃離基地後，引導者已被殺死。警察因找不到線索，及將面臨審查
的命運，於是他決定逃跑......(747頁)
......逃到不遠之處，燃料便已耗盡。警察下車查看，卻發現到自己心愛的人
被支解放在車尾箱內。警察叫罵、嚎哭、崩潰，直到發現到缺頁後，才開始靜
心了解所有事情的因由經過......(749頁)
......這一切，其實都是警察自己自編自導的服仇戲碼。警察一早便知曉自己
的女人出軌，可惜一直找不到證據。於是，他便將對女性的憤恨發洩在其他外
型相似的女性，藉著性侵、調教、改造，以滿足平服自己的仇恨心......(750頁)
唔會架！呢一切都係假架！
我一手將堆缺頁掉到地，明明唔相信，但雙眼偏偏繼續死盯著地上缺頁既
內容。
而當我睇到以下呢一頁既時候，我腦海就變得更加之混亂，可以動搖自己
一直所抱持既做人態度，及以往既人生......
......看到這樣，警察自己應該還未醒悟過來，還繼續質疑缺頁的內容，否認
這一切都是與自己有關。但請問一下主人，本書有何曾欺騙過你？(751頁)
的確，呢本書一直都係度描繪緊現實所發生既事，冇一次係老作，帶到走
到書中既劇情。
呀......好頭痛呀！
莫非，我真係呢本書既主人？
我冇再去追溯之後既缺頁，因為我估到一定係成個故事既幕後。
唔洗睇，我都知？
我先至係真正既易容師？
唔會......唔會係咁架！
如果我真係易容師，點解我依家見到Fish咁樣，我會傷心痛哭？
呢Ｄ眼淚係真架......我真係好愛Fish架！
但就因為我愛佢，所以我唔係......？
「你地去個邊搵！其他人跟我黎呢邊！」
係警車聲，仲有紅藍閃光！李SIR佢地追到黎啦！
Fish，對唔著，我依家唔可以唔走呀！
2015年10月17日，晚上11點41分。新界屯門，新墟附近後巷。
踏踏踏踏......
我忍痛拋低Fish既屍骸，轉入左一條小街，再走入一條後巷去。
同時間，以免一陣有任何突發事情，我邊走邊重新替手槍補上子彈。
「劉孝天，終於搵到你。」
咁快？竟然咁快搵到黎？
我捏轉頭一睇，係暗巷既另一端，有一個手執手槍既人。
我即時舉槍相向，對方再次開聲：「你唔認得我啦？」
「陳仔？」聽把聲好似係陳仔。
當佢一步一步走前，去到光線照到既位置時，佢既容貌話我知，佢的確就
係陳仔！
砰呀──
驚奇既一刻，槍火聲應時響起！
而我就及時撲到係巷內一個大垃圾箱後邊，險避開左致命既殺機。
因為，我記得李SIR講過既說話......陳仔岩先根據冇照我指示做野！
「呢一切係你做既？點解你要咁害我！」我好嬲咁鬧，但換黎既係更加火
爆既回應：
「點解？劉孝天啊劉孝天，你就問下自己點解咁熱心，當手下係狗咁洗！
有功你就自己升職，我幫你做到成隻狗咁你多謝都冇句，仲成日屌鳩我！不過
唔緊要啊，今日我終於知道點解你升得咁快......因為你就係易容師！而我無論捉
到你，定殺左你都好，我都會成為一個比你更加正義出名既警察！」
點解，點解連最得力既手下都會陷我於不義？
唔通我真係易容師？所以我絕對係十惡不赦既人？
我唔信啊！
砰──砰──！！
(to be continued...)