回到初戀時: EP28

這時他們一行三人回到燒烤場。

子妮對著可兒說:

[你返得嚟啱啦，佢地一個二個好似殘廢咁，要我燒哂D野食……可兒你快D過嚟幫手……]說完把偉明推開了數步。

可兒笑著說:

[好呀！我叉野食最拿手架啦……各位可以試下我D手勢！]





[可兒……汪子妮連一條腸仔都唔燒俾我……你睇！佢地就有雞翼，牛扒，豬扒……分明就蝦我！]盧旺達楚楚可憐望著陳可兒。

[可兒，咪鬼理佢姐，佢自己有手有腳慌會餓死咩！……咦！輝揚哥，差D唔記得你……你想食咩？我燒過你食！]汪子妮笑著說。

[哦……唔該你……不過我唔肚餓……陣間先！]輝揚無神無氣回應。

這時全部人都看得出輝揚有點不妥，偉明用詢問的眼神望一望輝揚……

[我可唔可以話俾佢地聽咩事？]





輝揚無奈地點着頭……

於是偉明一五一十將輝揚父母失蹤的事告訴他們。

各人聽完沉默片刻，還是肥賓先開口說:

[輝揚，乜原來件事係咁……唔怪得知你話得亞婆照顧你啦……唔使咁傷心！只要一日揾唔到你老豆條屍，即係仲有可能尚在人間啦……話唔定俾漁船D人救起左……至於伯母就奇怪D，不過佢冇出到海，生存機會仲大……唔使咁愁既！希望在明天嘛……]

偉明同時開口說:





[冇錯！反正都等左三年，一日末有消息，都係好消息……輝揚，我地一定支持你！]

各人異口同聲開口說:

[加油……]

[努力呀……你爸爸媽媽一定冇事架！]

這時輝揚雙手合什說:

[多謝大家……多謝大家關心！]

淩子峰發揮領袖的角色笑著說:

[輝揚，國賓……下星期三決戰3P……你地有冇信心呀？]





[我略略查過佢地D資料……前鋒高森係主力，助攻係方進傑，佢地兩個係最難纏嘅對手，高森咁多場比賽全部都有二十分以上，而大部分都係方進傑助攻俾佢，所以我建議我地兩個人全程人盯人方式封鎖方進傑……輝揚同傻標係跑得最快，所以我希望你地Mark實方進傑……]肥賓如臨大敵說。

[我冇問題……盡人事！我會同傻標傾傾……]輝揚說。

[至於我仍然是防守型，搶到籃板球，今次就交俾你啦凌子峰……峰哥仔，今次辛苦你！你要走雲全場，因為你要兼埋防守……不過呢……唔使驚！因為我地只要同對方相距十分以內，你主要都係防守……攻擊為次要……]肥賓續說。

[唔……盡力啦我！]凌子峰面有難色說。

[唔使驚！我到時仲有Plan B！不過呢家就賣過關子先……]
肥賓奸笑地說。

[仲有偉明今次你上半場唔好打，俾十仔打你個位先……另外下個星期一放學後，我約左一個人係你屋企樓下球場同你練波！你冇得唔嚟！]肥賓笑著說。

[點解呀？吓？你同我約左邊個呀？]偉明疑惑地說。





[星期一你咪知！哈哈……]肥賓笑著說。

[喂喂喂……你地班男仔咪掛住講波啦……盧旺達！我叫你帶嘅沙灘波，你有冇帶？]子妮說。

[你大小姐叫到點敢唔帶呀！]旺達恭敬地說。

[我地不如打波囉？邊個玩？]子妮問道。

[我！]張柔，旺達，子峰同時說。

[唔打住，我同偉明想去沙灘嗰邊行吓！一陣先Join你地！]可兒笑著說。

[肥賓未食夠，我陪佢係度睇住D野，你地去啦……]輝揚說。





[Okay！唔阻住你地拍拖同食野啦……一個鐘頭後，我地係度集合……喂！我地行啦！]子妮拿著沙灘波邊走邊說。

這時可兒對著偉明說:

[我地不如係嗰邊沙灘行吓，我想執D靚靚貝殼……]

[冇問題，咁我地行啦……]偉明笑著回應。

一個小時後……

[哇……D貝殼好靚呀！可兒……我想要心型呢個呀！可唔可以呀？]子妮說。

[當然可以啦……]

[多謝你……偉明你女朋友仔真係好人……]





[喂喂喂……咁多位！頭先我同偉明係嗰發現左一棵樹，好高好靚架！我有個提議，我地每人用張紙各自寫低自己嘅願望，之後塞落呢個膠樽度，然後埋係嗰棵樹底下……十年後！我地再相約出嚟……睇下大家嘅願望有冇實現到？好唔好？]可兒興趣勃勃地說。

[好呀！]

[幾好玩咁喎！]

[等我諗下有乜願望先……]

[子妮……你寫左D乜？]

[唔准偷睇！死人盧旺達……]

[子峰，你係咪想寫好似李X乘咁有錢呢？]

[輝揚，你放心……你父母一定會安全返嚟架！]

[可兒，你寫左D乜呀？可唔可以話我知呀？]

[偉明，咁你呢？十年後我地約定石澳樹下一齊揭曉啦……]