好想告訴你: 好想告訴你9_荔園告白
講就無敵。呢個係阿立最近經常對阿中的評價。自從運動會過後，阿立覺得阿中應該食住個勢，向阿茵表白，但他沒有。阿中只是間中等下她一齊放學回家﹐或者小息午飯時，走去和阿茵談兩句。阿立看在眼中，真是不是非常無奈。
「幫你開哂頭，你仲等咩撚野呀？」阿立今日和阿中一齊走咗堂，在公屋的樓梯間食着煙說。
「人地就快考試麻，人地高材生要温書呀。」阿中飲了一口啤酒。
「出年先考WOW，仆街。」
「讀書既野，你識條春咩。」又飲一口。
「咁你諗住等佢讀完書先呀？佢讀埋博士先你咪等十年八年？」博士？阿中真係冇諗過，亦唔知咩係博士。阿中有時會覺得，阿立其實識好多野，個腦又轉得好快，點解會同自己一樣係學校既垃圾學生。唔係，係仲衰過自己，阿立係考全級第尾既，阿中係由尾數起第二十名。
阿中又真係諗下，十年八年，阿茵會唔會比人追了呢？但自己既愛情觀係，愛係一生一世，和結緍白頭到老幾十年比，十年真係小兒科。
「咁咪等下囉。。。」阿中細聲的說。
「你冇能撚呀？」阿立向阿中嘖一口大白煙。
「我同你唔同，你淨係諗仆野。我要既係一生一世。」阿中好自豪咁講。
「你真係傻撚咗喇！」
「你又點呀，阿Jade 你玩厭未呀？」阿中扯開話題目。
「關你撚事咩？」
「其實有個好女仔等緊你呀。」不用阿中再說下去，阿立都知他說的是阿珊。阿立繼續沒出聲，又點起一支煙。
「你真係咁等落去，我睇唔過眼。」
「關你撚事咩？」阿中回敬一句。
「呢排揾到D錢，不如約佢出去玩啦。」阿立喺個袋度攞咗幾千蚊出來數。
「都好WOW，你都好耐冇見阿珊啦。」阿立裝聽不到。係，我地冇見過，但紙仔有好多。
「去荔園呀，夠浪漫。」阿立提議。
「都好WOW！」
此時阿立的手機嚮起。冇錯，係手機，在當時小有之物，但阿中和阿立已經一人有一部。
「喂？」阿立拿起電話接了。
「阿立，今晚有野做，落迷城等我。」
「知道大佬。」
「叫埋阿中呀，呢次都係大野，搞掂跟住落去大富豪搓女呀。」
「多謝大佬，我地準時到。」
「好。」跟住對方掛線了。
「有貨到？」阿中問。
「係呀！今晚專心做野先，去荔園再諗。」阿立大力抽一口煙。兩人又將表白的事放在一邊。
**************************************
聖誕長假前的最後一日，阿立出手，約了阿茵和阿珊去荔園玩。都中二了，家管已經沒有以前那麼嚴，阿茵沒有問題，還想玩到十一、二點才回家。阿珊當然唔可以咁放肆，十一點前必須回到家。阿立話冇問題，還說會送阿珊回家。結果一行人去了荔園。
說實話，荔園其實不適合年青人玩，過山車只有二樓咁高，隻恐龍仲假過你去玩具反斗城買嗰D玩具，D動物瘦到好似幾個星期沒飯食那樣，宋城都不知到用來做咩，難道真入去學歷史麼。如果要玩，去海洋公園好好多。唯一選呢度，因為近學校，一轉車就到。
入到荔園，真係唔知有咩好地方去，但阿立好似好好奇咁就圍行，好似沒有來過一樣。其實阿立只是扮高興，希望氣氛好點。阿立已經同阿中講咗，今日一定要佢同阿茵表白，如果唔係，佢會追阿茵。阿中其實知阿立一定唔會追阿茵，要追一早追咗，還等而家。但問題係，如果佢真係追，自己可能會輸。阿立那麼多次追女都沒失過手，阿中真的有點驚，昨晚盤算緊今日如何講好，搞到都沒什麼訓覺。
過程中，阿立制造了好多機會給阿中。叫阿中和阿茵玩鬼屋(講真，真的細路都嚇唔到)，碰碰車要佢兩個一齊坐，過山車又迫他們兩個坐一卡。阿茵並冇抗佢，因為如果她和阿中坐，阿珊就和阿立坐，為姊妹，冇所謂。當然，其實阿茵也不介意和阿中一齊玩。玩了一段時間，咩都玩哂，阿中仍然係和茵跟住大隊。
「頂你！駛唔駛揾位走架！」阿立心想，平時踢都教你走空位架啦，阿中你成日跟住人地後衛把撚咩！叫我點制造身門機會卑你呀，你老母你打後衛把啦仆街。而家就係呢個情況，阿中同阿茵成日都跟住阿立和阿珊，阿中不明白，想阿中你係唔係諗住喺我地兩個面前表白呀，唔係的話你跟撚住我地做咩啫！諗下諗下，阿立發覺大家都已經行咗出荔園門口。
「吊你！」阿立真係火都黎埋。本來諗住佢兩個會喺荔園搞掂，咁跟住佢兩個就去拍拖，咁自己同阿珊食完飯就返去。而家搞咗半日都未得，咁跟住仲要去邊。
「阿珊，陪我去買煙。」阿立唔想再諗野，決定買包煙食下，阿珊就咩都唔知，來不及反應就給阿立拉走了。在荔園門口，只剩阿中和阿茵。
兩個人一直在等，未幾。阿茵先出聲。
「阿立今日真係好奇怪，平時佢點會咁開心咁玩呢到呢D咁無聊既野，佢最近食錯藥呀？」阿茵講笑的說。
「梗係唔係啦！」阿中心想，佢係想制造機會給自己，但自己冇珍惜，因為唔夠膽。如果佢唔係鍾意我咁點呢？朋友都冇得做？以後仲可唔可好似平日咁，小息午飯一齊傾下計，久不久傾一下電話？或者放學送佢去圖書館？會唔會所有野都冇哂架？我其實喺佢身邊已經足夠。此時，阿中真係有點亂﹐竟然在阿茵面前拿了一口煙出來，點着了，抽一口。阿中從來都不會在阿茵面前食煙，怕佢唔鍾意。
「你好小喺我面前食煙WOW。」
「我有點亂。」
「咩話？你冇事呀？」
抽了一口，好似定一定，但煙抽入肺，係會減小咗血入面既氧氣度，其實個人應該會緊張咗，只係覺得有D野做下會沒那麼緊張罷了。阿中感覺到自己的心跳快咗。點算？真係要講？
「你係唔係有野想講呀？」阿茵碌大隻眼望住阿中，阿中嚇一嚇。阿茵個樣唔係玩，係有點認真的，唔通佢知我想講咩？佢諗住點回應呢？拒絕定應承呢？
死就死啦！
「阿茵，其實阿立唔係食錯藥，佢係想制造機卑我…..卑我同你講….我鍾意你….」
「……」阿茵呆咗咁望住阿中。阿中唔知點做好，只係想阿立你地快點回來！
「其實我只係想講卑你聽架咋，我知你唔會鍾意我，但係我控制唔到，我想話比你知，冇其他原因，你唔駛放喺心度…..」當阿中想繼續用言語去緩和氣氛時，阿茵流出了一行眼淚。
「你冇事麻阿茵，你唔舒服。」阿中立刻好緊張，唔知茵是否有唔舒服。
「……」阿茵有點咽哽，她抺一抺眼淚，望着阿中，笑了一下。「原來呢，被鍾意既人同自己講鍾意我係好感動架。」
鍾意既人同自己講鍾意我，呢句說入了阿中的腦，他不用多想，也明白，阿茵講緊既係自己。阿中幫阿茵抺了一下眼淚。阿茵繼續甜甜的傻笑，阿中也一齊傻笑。兩個人沒有說話，突然阿中攬住了阿茵。有點突然，阿茵想推開佢。
「我唔想放開。」
「呢度好多人呀。」阿細聲地說。
「我一世都唔會放開，我只會鍾意你一個人，永遠都唔會放開你。」
阿茵真係甜哂，也不再想推開阿中，反而輕輕的攬住了他。
「你放開先啦！」阿茵大力的推開了阿中。阿中有點不明所以，心想你不是鐘意我嗎？點解要推開我。
阿茵在書包找了一找，拿出一盒有花紙包着的禮物。
「生日快樂！」
「你…..你點知我今日生日？」
「我點會連鍾意既人既生日都唔知呀。哈哈。」
阿中接過禮物後，一下的再攬住阿茵，阿茵今次沒再推開，雙手也抱着阿中，頭伏在他心口。
「我一世都唔會放開，我只會鍾意你一個人，永遠都唔會放開你。」
「知喇，講咗一次啦！好肉麻呀你！」
沒錯，阿中實現咗佢既承諾，一生都只係愛阿茵，但他們沒有白頭到老……