唔好玩啦，我係月老個助手？: 3.2

「下咁我之前上到去既係…？」 我好驚訝咁擰去後面。

「只係你個靈魂黎，軀殼並冇上到去，亦都只有月老先可以召喚我地既靈魂上去。」 洛賢一路講一路行到我隔離。

「哦～唔怪得我係返呢到既時候，個意識有啲唔知想點咁。」我回憶返之前醒返個陣。

「我想問呢，咁我地本身係人類黎架嘛，我地點樣會有能力做到瞬間轉移？」 我摷一摷個頭。

「呢樣，呢樣野係可以幫你提供應有既靈力。」月老拎左條紅色既手繩比我。





手工好細緻，用左一種唔知咩既織法去整，上面仲掛左個小鈴鐺，總之種感覺比到我好靚咁。

我嘗試自己將條手繩戴上右手，但綁極都綁唔到條繩，成個樣好似屙屎唔出咁。

「我幫你啦死蠢。」 洛賢捉左我隻右手過去，好快就幫我綁好左。我仲留意到佢左手都戴左條藍色既手繩。

「好，你依家感唔感覺到有陣靈力從你右手傳到去全身？」月老問我。

「開頭唔係咁覺…嘩黎料！」 





我講到一半，條手繩突然收緊左，之後就感覺到有啲野包住我隻手一直去到手臂、個身、最後就去到個頭到，依家好似有層無形保護膜咁包住成個身。之後條手繩就鬆返開。

「睇黎完成左…咁依家正式教你點用。但要記得，當你呢條手繩斷左既時候，你都會同時失去靈力，所以務必要小心。」月老好滿意咁點點頭。

「右手食指同中指點住太陽穴…之後合埋眼諗要去既地方…之後再擘大隻眼…得左啦！！」

我跟住月老咁講去做，我求其諗話去旺角，背脊好似有人推左我一下之後，擘大眼就已經係旺角！

我好興奮咁係到大嗌，「吖！！我得左啦！」，有啲人用好奇異既眼光望住我，有啲仲Hi我話我痴左線。





「喂發完癲未呀你…」 洛賢都瞬間轉移左去我隔離，我一見到佢就興奮到唔知自己做緊咩，竟然一野攬住佢。

「你…乜你咁狼死架。」 洛賢都呆左一陣之後講左呢句野。

「我我…我想分享個開心既感覺姐…」我正想鬆開手個陣，佢突然嗌：「喂喂喂，唔好放手住，等…等我一陣！」

「下？點解啊？」「喂應下我先啦你！」我拍一拍佢。

但我感覺到佢隻手起勢fing，唔知係到撥咩野。

「得未呀你，冇啦啦唔比人放手…」 我塊面好似有少少慶咁。

「得啦得啦。」佢推返開我，擰轉個頭唔比我望到佢個樣。

「冇野既話咁我走啦，我要開始做果個訓練。」 我準備去第二到。





「有咩事就大力搖個鈴鐺啦，我會聽到架。」佢背對住我咁同我講。

「哦，我知啦，咁我走先啦，拜拜！」我同佢揮揮手拜拜之後就轉左去第到，都唔知佢有冇睇到。