唔好玩啦，我係月老個助手？: 3.1

「沚緣，你來一來這邊吖。」 月老係佢張殘到就黎做得文物既枱到拎左本野出黎。 

「係過一過黎！唔係來一來這邊！」 我放低手上既掃把行過去。 

我依家仲係打雜既level，順便做埋月老同學既中文老師，哈哈！係我既教導下，佢啲口語能力升得仲快過神仙～ 

但係依家！我見佢拎左本野出黎！仲唔係有字天書！！ 我終於都唔洗打雜啦！ 

「知道啦，呢到有本野，你拎去啦。」 月老示意住個本好厚既書。 





我一野就拎起個本書，好開心咁攬住佢跳華爾茲，周圍仲好似有啲花花呀心心呀咁係到飄下飄下，我完全感受到仲好似有啲光從身體到發出。 

「小姐，你拎錯左我本野。」 月老從我既懷抱中拎返走佢本野。 

「下，咁我個本呢？」我依然昅實佢本書。 

「呢本就係你既，講明先，佢只係一本好普通既筆記簿，唔好咁多幻想啦。屬於你個本天書呢，就要等你完成左呢個職前訓練先拎得。」 
月老將本野塞落我隻手到。 

我望住本封面係隻玉兔係月亮到椿緊野既筆記簿，我心諗，唔撚係掛！ 





「偷偷地同你講吖，呢本野之前洛賢都用過黎做呢個訓練架。」 月老用極細既聲音同我講。 

「咁咪有好多野睇囉！」 又好似幾正咁喎！得閒搵呢樣野笑佢都好。 

「咁我要做啲咩架？」 我已經開始想睇本筆記簿。 

「記低唔同年齡既情侶或者夫妻，睇下佢地點樣相處，平時會做啲咩個啲，有啲特別個案既話就記係最後一版個到，至於咩係特別既呢，就要由你自己去參透啦。如果有啲咩唔係咁識既話，就參考下前面你師兄做過個啲啦，就係咁。」 

月老個樣雖然後生，但其實我都差啲唔記得原來佢做左幾千年神仙，見過無數對一齊到老既夫妻，但亦都見過無數對最後變做陌生人既情侶。 





唉，做神仙難，做月老更難。 

「呀係啦，為左我既小助手唔使咁辛苦，我會教你點瞬間轉移。」 果然老左真係冇乜記性。 

「係咪即係你成日做個啲？！」，月老點點頭，「我終於有機會學到啦！傳說中既瞬間轉移！！」 我起勢錫本筆記簿。 

「但用既過程要小心，唔好去左啲本身人類去唔到既地方，唔係真係神仙都救你唔到。」 月老突然勁嚴肅咁同我講。 

「例如呢？」 我試探性咁問。 

「月宮。」 洛賢把聲係後面傳過黎。