唔好玩啦，我係月老個助手？: 3.3

我並冇話轉去其他地方做訓練住，而係先轉左返去屋企，雖然唔知呀媽佢有冇訓緊晏教，但我想執一執行李搬入「姻緣鎖」，可以方便做野吖嘛。

「媽？我返左黎啦。」我好細聲咁一路行去呀媽間房一路問。

「冇人應喎…」 我行到去間房見到呀媽訓係床到訓得好舒服。

「唉…」我幫佢蓋返好張被，見到佢連訓個陣個眉頭都皺緊，雖然唔係皺得好勁，但我諗佢應該都好擔心我。

「對唔住啊，媽。」我從來都冇膽同啊媽講句對唔住，覺得呢啲野大家都心知架啦，使乜講出黎咁肉酸。但我欠得佢最多既正正就係呢一句野。





「今日啲米有特價…整飯…比呀女食…呀女…」佢含糊不清咁講左一堆開口夢，我失笑，一滴眼淚唔小心滴左落呀媽個手背到。

我拿拿聲抹一抹面上既眼淚，然後係枱到搵左張紙，寫低：

「媽，我搵到份工啦，雖然人工唔係話高，但都夠我地生活，你唔使咁擔心我啦，顧掂自己身體要緊呀。依家間公司有宿舍住，因為離公司好近，所以我決定搬去住，但唔使驚我去得太遠做呀，我一得閒就會返黎探你，記得有咩事打比我，我會即刻趕黎架。仲有叫老豆都唔好咁爛賭啦，等佢得閒陪下你仲好。 
愛女 沚緣上」

最後我係間房偷偷地執埋啲行李之後，將我岩岩出黎做野儲返黎個幾千蚊擺係呀媽隻手到。然後準備轉返去「姻緣鎖」。最後我係間房偷偷地執埋啲行李之後，將我岩岩出黎做野儲返黎個幾千蚊擺係呀媽隻手到。然後準備轉返去「姻緣鎖」。

「嘩頂你！人嚇人嚇死人呀大佬！」我行返出廳個陣見到洛賢坐係梳化到。





「我頭先聽到你個鈴鐺響得咁勁，以為你做咩事咪過黎睇下你囉，見你冇事咁即係走得啦。」洛賢企返起身準備走人。

「唔用轉移？」 我問行緊去門口既洛賢。

「呢到離姻緣鎖好近姐，行過去都得啦。」 洛賢又擰返去門口個邊。

「但係…」我望一望個行李。

「唉怕左你，用啦用啦。」 洛賢行過黎，攬住我條腰，我嚇到即刻捉實行李，我連指住太陽穴既手指都未放落黎，佢就連我一齊轉移左。





「嘩洛賢你係勁既，沚緣黎左一個月姐就已經得米，你係得既。」 岩岩轉到返黎就見到小玉係佢呀爺張枱到食緊橙。

「咩咩得米呀，都唔知你講咩…」 今次我見到啦，佢塊面紅到就爆咁，唔通頭先就係因為唔想比我見到，所以先叫我唔好放手？

「拿，你自己睇下你攬住人地條腰攬得幾實！」 小玉用下巴示意攬係我條腰既手。

「岩岩一齊轉移姐…諗多左啦你。」 洛賢佢即刻拎返開隻手，仲行去小玉面前搶左佢舊橙黎食。

「係喎，老野去左邊？」 洛賢行左幾步之後，掉返轉頭問小玉。

「老野？哦～你口中所講既老野依家係你後面。」 小玉講完之後都即刻跑黎我呢邊。

「沚緣，快啲um住對耳呀！」小玉講完都um住左。





「下？哦…」我不明所以但係都照做，係下一秒我就知點解。