(青春極少甜)原來曖昧真係最好既階段: 12-思考

又到左討厭既星期一。

我番到課室，見到台面有袋野。
打開，係一個士多啤梨鬆餅，同一支十字奶。

！

我爭D開心到大叫。
呀逸真係世界級貼心。我淨係食雪糕個陣講過一次想食士多啤梨味，佢就買士多啤梨鬆餅俾我做早餐。仲怕我口渴買埋牛奶咁健康。
然後我見到鬆餅下面有張紙。


真係好sweet呀仲寫埋紙仔俾我！睇下寫咩先。 



「成日唔食早餐小心餓死。
BTW飲多D奶 唔係既話我驚妳胸下垂
食多多薯仔都冇用 淨係會肥」 





……………… 

「魏天培！！！」
我唔算大聲，但叫左出黎。好彩課室仲未算多人，得隔離位望左我一眼。

仲等我以為係呀逸咁有心……

買早餐咪買早餐囉！要窒我既就唔好買啦！D字仲要咁肉酸……
我開始懷疑D野一係過期一係有毒。
 ……但咁係咪代表魏天培已經冇嬲我？


同埋……佢都幾有心既。 
我點點頭，仲不知不覺咁微笑。 

不過點解魏天培會知我鍾意士多啤梨味既野既？
我一路食個鬆餅，一路思考答案。

 為左求証，Lunch個陣我拎完個飯就去尋找魏天培既身影。

「小姐，搵人呀？」
伴隨住呢句說話，我個頭俾人拍左一下。
「係呀，我要搵一個好乞人憎又勁小氣既奇怪人。」
唔洗望都知係邊個做既好事。
「咁既人我就唔識喇，但又靚仔又大方又有型既呢到就有一個。」魏天培一路講一路坐低。
「邊到邊到？睇過睇過。」我望左望右就係唔望佢。
佢一手捉住我下巴，將我扳向佢既方向，對正佢。


「買埋早餐俾妳，仲唔大方？」 

……呢下我係有D心動，不過正常女仔都會架啦。

 「係大方就唔會寫張咁既野啦！」我撥開佢隻手，拎出張紙放係台面。
「講事實姐，薯仔係澱粉質，食得多真係會肥喎。叫妳飲奶係關心妳皮膚緊緻度姐，有咩問題呀？」佢望一望張紙，之後陰陰嘴笑住咁打開飯盒。

我睥左佢一眼，然後都坐低食飯。

「係喎，點解你又知我鍾意士多啤梨味？」
「妳條肥婆每次食完飯都擔住支士多啤梨珍寶珠，係人都知啦。」佢耷低頭畢飯。
「係喎……食慣左自己都唔記得左添……
你做乜咁留意我姐。」 




 「可能我鍾意妳掛。」佢抬高頭望住我。


 我個心停一停，睜大對眼望住佢。

佢依然望住我。

 「冇左妳，我邊有咁多薯仔食。」下一秒佢就奸笑。

…… 

「食屎啦你！」我兜野打落佢個頭到，但我唔記得我拎住隻羹，搞到痴左D飯落佢個頭到。
「喂！都唔洗餵我個頭食飯架！我餵妳食肉醬架死o靚妹！」
講完，佢畢起一羹肉醬扮要打落我到。 
正當我想抵抗既時候，楊紫晴佢地行左過黎。



「咦，乜唔係周銘逸架咩？做乜變左魏天培架？妳鬼馬喇林侑淇。」楊紫晴一坐低就捉住我膊頭。
「哦……你地有路……」Tina指住我同魏天培。

「我先唔會同呢個o靚妹有路。我過番去先，唔阻妳地。」
魏天培冇乜表情咁拎住個飯行番過去佢班男仔friend個邊。我見到佢一坐低，佢班friend又係好似楊紫晴捉我膊頭咁捉住佢係咁笑。

「喂油淇，咩關係姐？之前都唔知你兩有傾計既。」楊紫晴懶係細聲咁問。
「真係冇咩關係，不過佢救過我一次。」 我已經習慣佢地既質問，自己講番上次邱sir單野俾佢聽。 
「下……咦……佢好嘔心呀……妳做乜唔一早話俾我地知呀……」楊紫晴不停掃自己手臂，露出一個嫌惡既樣。
「咪係囉，應該報警架嘛！」麥葵嘟住嘴。
「咁最後我都冇事……同埋都話我唔想俾人知條片既事咯。」
「唉，明明我地三個俾人蝦妳都係第一個企出黎，偏偏一到妳自己有事就變得特別怕事，妳怕呀逸會有咩事就唔追究邱sir，會唔會善良得濟？」Tina用手指捽我額頭。
「係呀，善良到有D戇鳩添呀。」楊紫晴又一齊捽我。



「話時話魏天培又會咁橋撞到你地都有既。」楊紫晴捽完我又繼續食飯。
「我都唔知呀……」
「但英雄救美喎，妳會唔會愛上左佢架？」麥葵問。
「……」我沉默。

 點解我會要諗呢條問題……我應該知我鍾意邊個先係架……我點會鍾意……魏天培……

唔係，其實我知，我知自己想點。
我係時候要面對自己。 

我成日覺得自己係鍾意呀逸，其實一直都係好感。而呢種好感，係建基於佢一直gentle既形象，同個次影印房因為情況氣氛影響既觸碰。但係呀逸俾我既感覺太難捉摸，而家就算我已經同佢單獨相處過，我始終都覺得佢係「男神」，好似仲係觸摸唔到咁。對住佢，我成日都要扮自然，同佢鬥難捉摸……佢係好溫柔好識哄女仔，但我諗佢其實對個個都咁好、咁溫柔，所以周圍先至會成日都圍住咁多女仔。我諗，我對佢，應該就好似想解開、或者探索一個謎咁。

我唔係白痴，都唔係扮無知扮純情，而係因為我覺得自己係鍾意呀逸，咁又點可以承認我心入面……好似有少少魏天培既存在……
所以佢同呀逸一齊受傷，我揀左去搵呀逸。佢身邊都圍住幾個女仔，我扮睇唔到。我同佢相處得好開心，我同自己講係朋友。每次腦海出現佢既影子，我就忽略。
個次佢救左我，好聰明咁拎走埋部電腦。後來佢知我仲未走出陰影，就黎陪我食飯tum我開心。
我從來冇講過，我好懶，成日唔買早餐，所以唔食。但係佢就察覺到，仲一早留意到我好鍾意食士多啤梨珍寶珠。
係佢面前，我會大笑、會講粗口，相處得好舒服。
由佢上次因為呀逸拎左我條毛巾而嬲，我諗我都知佢對我都唔止係朋友。只係我真係唔確定我對佢既感情係點，更唔確定我對呀逸係點。 

我決定將我既諗法講俾佢地三個聽。

「其實感情呢D野真係好難講得清清楚楚，未知咪慢慢諗、慢慢決定囉，好過根本唔清楚自己想點就亂做決定。」Tina咁同我講。
「咪係囉，呢D野都冇得心急架啦。」楊紫晴認同Tina既講法。
「有咩唔知點算既時候咪搵我地傾囉，我地幾時都陪住妳既。」麥葵對住我笑。

 雖然佢三個有時真係又煩又躁又戇鳩，但我真係唔可以冇左佢地。 

「多謝唒。」我一次過攬住佢三個。

「喂食緊飯架！」
「屌攬乜鳩！」
「我隻羹跌左……」

「妳地真係好嘈。」我用笑住既語氣講出呢一句。