(青春極少甜)原來曖昧真係最好既階段: 13-衝突

唔知點解，呢幾日番學，硬係好似俾人望望下咁。係我多心定係點呢……D人好似係到竊竊私語…… 

「油淇！」放學個陣，Tina衝過黎我班房搵我。
「Tina！唔好啦……」麥葵捉住佢，個樣好似好擔心咁。
「咩呀！敢做唔敢認呀？」楊紫晴好大聲咁講。
「做咩？」我問。
「跟我黎啦！」楊紫晴嬲爆爆咁扯我走。 

我地行左去小食部，見到同楊紫晴一班既幾個女仔。佢地就係上次籃球比賽「假公濟私」個幾個女仔。
佢地黑唒面，有D驚青又有D嬲咁。中分個個叫呀魚，齊陰既叫Kiki，其他都唔多出聲。 



最重要係，我見到呀逸都坐左係到。

「做咩事呀？」我小心翼翼咁問。
「有咩不滿咪當面講囉！係自己instagram唱人有咩意思姐！」楊紫晴對住個幾個女仔講。

 我思考緊發生緊咩事。推理之下，我呢幾日受咁多奇怪眼光應該就係因為佢幾個係instagram唱我。但到底佢地無啦啦唱我D咩呢？ 

「妳幾個明知油淇冇instagram，暗地裏做呢D事妳地好意思咩？」Tina都好嬲。
佢地冇望過我地，但塊面越黎越黑。


「佢地……話我D咩……」我細細聲問。
「唉！我都估到妳唔知架喇，我開俾妳睇下。」楊紫晴拎出手機。

有唔少我俾人偷拍影到炒唒車既相，而caption多數係人身攻擊，話我樣衰呀、做作呀之類。而有幾篇，好似提到呀逸……

「妳地鍾意周銘逸關油淇咩事，有咩證據證明佢姣周銘逸？仲要人身攻擊過唔過分左少少呀？」楊紫晴拍台。
「呀逸你幫侑淇出句聲啦。」麥葵望一望呀逸。
「咁樣講人壞話真係好過分，一定要道歉。」呀逸個樣好嚴肅。
「佢幾個鍾意你丫嘛，你而家兜口兜面拒絕啦！」楊紫晴指住個幾個女仔。
呀逸面有難色，可能覺得咁樣有D傷人。



「……好喇喎！我地放係自己private ig有咩問題姐！」呀魚忍唔住出聲，應該係惱羞成怒。
「屌妳private大撚唒？妳個所謂private有成千幾二千個followers喎，咪撚當我智障啦！」永遠唔會輸個勢既楊紫晴好大聲咁講。

小食部已經圍左D人係到食花生。

「咁妳吹撚得我地漲咩？佢係姣婆呀！之前籃球比賽又買毛巾俾呀逸又買俾天培！唔通買兩條有平呀？」
Kiki睥住我，而其他幾個女仔就係到笑。 

楊紫晴佢地唔知呢件事，所以都唔知講咩好，望住我。
呀逸都疑惑咁望住我，條眉皺起左。

然後我望到o岩o岩係樓梯跑落黎，喘住氣望我既魏天培， 

我從來冇見過佢咁嬲既樣。




 魏天培係人群之中穿入黎。 

「買毛巾就係姣婆，咁妳地又買野飲又幫人抹汗係咩？雞？」魏天培冇乜表情咁講。

全部人包括個幾個女仔，連楊紫晴都唔敢出聲，因為冇人見過魏天培咁惡。



「唔洗咁講野呀嘛。」

第一個出聲既…… 




竟然係呀逸。


本身魏天培唔笑已經好得人驚，而家既佢眉頭緊皺，咬實下唇，額頭既青筋都現埋，好恐怖。


「乜原來你係咁樣對你鍾意既女仔？幫鬧佢既人講說話？」魏天培怒視呀逸。

對於「鍾意既女仔」呢一句，全場都投以驚訝既目光，伴隨咬耳仔既低語。

「我冇幫佢地講說話，」
呀逸一開口，所有人又靜唒。
「唔通佢地講野過分，你就要同佢地一樣？」呀逸直視魏天培，對佢既怒氣視若無睹。

兩個人既對視令大家都好緊張。



「咁點解你唔幫林侑淇開口呀？」魏天培開始大聲。
「開咩口。」呀逸依然冷靜。

「條毛巾係你自己拎，林侑淇從來都冇諗住買俾你。」



「因為我唔知原來佢係買俾你。」呀逸雙眉，慢慢皺起。


呢句野，聽落可能似係一句普通既解釋：因為唔知原來毛巾係魏天培既，所以呀逸唔小心拎左。

然而我心入面知道，其實係：因為呀逸鍾意我先拎走我手上既毛巾，如果知道我買俾第二個男仔，佢點都唔會拎。 



魏天培唔再望住呀逸，望番住個幾個一早已經耷低唒頭既女仔。

「毛巾係我叫林侑淇買，周銘逸係順手拎，聽清楚未呀？」魏天培雖然已經降低番聲量，但冇語調既說話都係好可怕。

D女仔唔敢望住魏天培，係咁點頭。 

最後魏天培望左呀逸一眼，拉住我走出左人群。 

圍觀既人係咁起哄， 

而我個心，
就亂到一塌糊塗。