(青春極少甜)原來曖昧真係最好既階段: 10-初次約會
即使係平時出街，女仔襯衫已經要搞好耐，何況同自己鍾意既男仔第一次單獨出街。
留意番，句野有三個重點：鍾意既、第一次、單獨。
我都唔例外，諗完著裙定著褲，就諗著長裙定短裙，之後諗襯邊對鞋，頸鏈手鏈帶邊條，髮型又應該點樣整好。
當我襯左成熟look、cutie look同文青look之後，我都係決定著得自然D。著左件白色薄薄地既恤衫，襯條去到大脾一半既灰色傘裙同一對牛津鞋，係咁意梳直左D頭髮就算。
去到戲院門口，Whatsapp呀逸問佢係邊。
呀逸：到喇
我一抬頭，佢就係我面前。感覺好似番番去個日影印房咁樣。
我只可以講……佢真係好靚仔。
其實佢只不過著左件白tee外加白色恤衫唔扣褸摺袖，好basic既黑色長褲，再也普通不過，同係學校最唔同既就係gel左頭，但我就係覺得佢發緊光。
我係咁眨眼、抿唇、吞口水，望到唔記得要打招呼。
「傻妹，望夠未。」佢用食指點左我個鼻一下。
「下、下？望咩呀？」我眨左兩下眼。
「妳話呢？」佢又用個個似笑非笑既表情望住我。
「唔知你講乜。」我不停眨眼。
「行啦，去買飛。」佢低笑左一聲，然後捉起我隻手行。
明明佢都已經掂過我更私人既部位架啦，點解呀林侑淇？點解而家佢拖妳隻手妳就發唒姣咁小鹿亂撞呀？
我竭力唔望佢拖住我既手，僵直咁向前望。由於個腦一片空白，到我地已經坐低左等開場我先回到神。
「諗緊咩？唔出聲既。」
「等睇戲丫嘛，有咩好出聲喎。」
唔通話你知我仲諗緊你拖我既事咩。
睇戲途中，我地冇話咩偷偷地拖手呀、去到某D sweet位就錫呀之類，只係好專心睇戲。
雖然呀逸有時會恰我，例如影印房個陣既「懲罰」，又成日偷偷奸笑呢D位都同正直既男主角一D都唔似，但我個腦，就忍唔住幻想女主角係我，而呀逸就好似男主角歐陽非凡，都係學校男神。
不過，唔知呀逸佢又有冇咁諗過呢？
去到後段，睇過一次既我都仲係忍唔住喊，呀逸轉過黎，俾左張紙巾我，講左聲「傻妹」，一路轉番正面既時候，又摸左我個頭幾下。
睇完出左戲院，我行去掉左張紙巾。
「唔係睇過架喇咩？仲喊既？」佢側一側頭問我。
「咁係好好睇丫嘛……」我摸一摸應該紅左既鼻哥。
佢又笑左一聲。
「妳上次同佢地三個睇，佢地有冇咩評價呀？」
「咪話你好似歐陽非凡囉，男神！」
我扮笑佢係男神，但事實上，佢又真係算係男神既。
「咁妳覺得呢？妳都覺得我似？」
「個type有少少似囉……你知架啦，你咁受歡迎。」
「……但其實相比起佢，我更想妳覺得我係徐太宇。」
佢停係到，收起笑意望住我。
……意思即係……佢鍾意我？
「做唔到徐太宇，做歐陽都好既。」佢又補多句，之後繼續向前行。
「徐太宇咁曳，你邊似喎。」我跟上佢既步伐。
我知佢呢兩句可能有其他意思，但我唔想表錯情。
「乜你覺得我唔夠曳咩？」佢又做個個似笑非笑既樣。
我終於發現到佢呢個笑係忍笑，係得戚緊同覺得好玩既奸笑。然後我又諗起佢係影印房個個勝利者笑容。跟住就諗起佢地話佢同張倩泳一齊係影印房行出黎個陣，張倩泳係笑住。
「曳呀，不過都唔係徐太宇個隻曳。」
「嗯……咁睇黎我要努力D先得喇。」佢輕扯tee恤領口。
我冇出聲。 我唔清楚到底佢咩意思，或者佢係講緊佢鍾意我，但如果唔係既話，我表現出好開心既樣就好柒，所以都係睇定D好。
我地係商場行左一陣。一路行，我就諗番套戲。女主角本身想追男神，但後來知道自己鍾意既其實係一D都唔男神，仲要係壞份子既徐太宇。咁，呀逸到底係想叫我鍾意佢，定叫我唔好當佢做男神呢？
「食唔食雪糕呀？」呀逸指一指間雪糕店。
「哦，好呀。」我地一齊行入去。食咩味好呢？
「呃……我要呢個……士多啤梨味呀……等陣！士多啤梨味好似好普通喎……都係要呢隻，蜜桃味呀……都係唔好！死啦……荔枝定蜜桃好呀……」
「一個要荔枝，一個要桃，唔該。」
呀逸行前，拎出銀包俾錢。
「咁妳咪可以食唒兩隻味囉。」呀逸一路拎番D散銀一路望住我講。
「但……你鍾意食呢兩隻味咩？」
「我都未食過，咪試下囉。」佢笑得好暖呀……
呀逸俾左桃味我，我就一羹一羹係咁食。
「妳畢一羹我呢個試下。」佢遞佢既荔枝味俾我。
我食左一啖。
「兩個都好好味呀。」然後又畢左一羹我自己個杯準備食。
！！
呀逸哄個頭埋黎食左我本來要食呢啖。
我瞪大對眼望住我隻匙羹，之後又望下佢。
「好似妳呢杯好食D喎。」
佢、又、奸、笑、喇……
我塊面熱熱地，唔想俾佢知我面紅，於是係咁食雪糕。點知食得太快有D頭痛，我皺一皺眉，停左手。
呀逸突然托住我塊面，正當我仲諗緊佢做乜個陣，佢就用手指公按我太陽穴。
「做咩無啦啦食咁快呀，係咪頭痛呀傻妹。」佢輕笑幾聲。
無可否認，佢真係好溫柔。未接近佢，已經覺得佢好nice。接近之後，都係冇發現佢任何缺點，反而展現左更多既溫柔。雖然佢係有少少腹黑，但係我眼中都全部變唒優點。
「唔該……好番D喇。」
「以後唔好食咁快喇。」佢用手指掂左下我個鼻。
我輕輕點頭。
之後段路，我都不停偷望佢。
「我今晚要同屋企人食飯，我差唔多要走喇。」我望一望手機時間。
「嗯，我送妳。」
「唔洗喇，我一落去就有車可以搭。」
「嗯……咁我陪妳等車。」
「好啦咁。」
一路等車既時候，我都諗唔到講咩好，但就想架車唔好咁快到，俾我對多呀逸一陣。
我平時唔係好想同佢講野架咩，點解而家有得講又唔講呀？我平時到底有咩想講架……
呀……係喇……
「其實上次點解你無啦啦停左手既？」
……………………………
我問緊D咩呀？！！！！！！
「呃……我係話……我話……呃……我……」點算呀……點兜呀……
「因為我係一時衝動。」呀逸打斷我既支支吾吾。
佢個樣好認真。
一時衝動，即係……佢根本對我冇意思？
「我根本唔應該咁衝動，咁隨便掂妳。我好後悔。去到個一刻，我醒一醒，知道自己唔應該咁做，所以，我停左。」
「即係……你掂我都只係因為衝動？咁而家你約我又係因為D咩呀？」
「妳個陣咁樣引我，我先會做錯事……」
「即係你話個次既事只係一件錯事？」我開始有D激動，打斷左呀逸既說話。
「係我唔同咁樣同妳開始唔想咁樣既環境同妳做咁唔珍惜妳呀！」呀逸有D大聲咁一口氣講出黎。
我望住佢，原先既憤怒同難過變唒做不解。
「我想……好好咁同妳發展，唔想咁是旦咁……同妳做……明唔明呀……」呀逸別過頭，我好似見到佢面紅紅咁樣。
我唔知作出咩回應，只係望住佢。
呢個時候，我等既巴士到左，我亦行去上車。
「Bye bye。」呀逸開口。
「嗯……bye bye。」我回應。
雖然我地既對話好似未完結，但我好似已經理解到，佢想表達既意思。